巴特那法句经

Patna Dharmapada

5. Attha

atthesu jātesusukhā sakhāyā puṁñaṁ sukhaṁjīvitasaṁkhayamhi ।

toṣṭī sukhā yā itarī[tarena] sabbassa pāpassa sukhaṁ prahāṇaṁ ।।

sukhā mātreatā loke tato petteatā sukhā ।

śāmannatā sukhā loke tato brāhmannatā sukhā ।।

sukhaṁ yāvaj jarā śīlaṁ sukhā śraddhā pratiṣṭhitā ।

sukhā attharasā vācā assiṁ mānakkhayo sukho ।।

sukho buddhāna uppādo sukhā dhammassa deśanā ।

sukhā saṁghassa sāmaggrī samaggrāṇāṁ tapo sukho ।।

sukhaṁ daṁśanam ayirāṇāṁ saṁvāso pi satāṁ sukho ।

addaṁśanena bālānāṁ niccam eva sukhī siyā ।।

bālāsaṅgatacārī hi drīgham addhāna śocati ।

dukkho bālehi saṁvāso amittehi-r-iva sabbadā ।

dhīrā tu sukhasaṁvāsā ñātīnaṁ vā samāgamo ।।

tassā hi dhīraṁ ca bahuśśutañ ca dhoreyaśīlavratamantam ayiraṁ ।

taṁ tārisaṁ sappuruṣaṁ sumedhaṁ sevetha nakkhattapathe va candramā ।।

priyāto jāyate dukkhaṁ priyā śokā priyā bhayaṁ ।

priyāto vipramuttassa nāsti śokā kato bhayaṁ ।।

mā priyehi samāgaṁma apriyehi kadācanaṁ ।

priyassa addaṁśanaṁ dukkhaṁ apriyassa ca daṁśanaṁ ।।

tassā priyaṁ na kayirātha priyāvādo hi pāpako ।

ggraṁthā tesaṁ na vijjanti yesaṁ nāsti priyāpriyaṁ ।।

chudhā parama rogāṇāṁ saṁkhāraparamaṁ dukhaṁ ।

etaṁ ñāttā yathābhūtaṁ nibbāṇaparamaṁ sukhaṁ ।।

āroggaparamā lābhā sāṁtoṣṭīparamaṁ dhanaṁ ।

viśśāsaparamā ñātī nibbāṇaparamaṁ sukhaṁ ।।

māttāsukhapariccāgā paśśe ce vipulāṁ sukhaṁ ।

caje māttāsukhaṁ dhīro saṁpaśśaṁ vipulāṁ sukham ।।

manujassa sadā satīmato māttaṁ jāniya laddhibhojane ।

tanukā ’ssa bhavanti vedanā śanikaṁ jīrati āyu pālayaṁ ।।

dullabho puruṣājaṁño na so sabbattha jāyati ।

yattha so jāyate vīro taṁ kulaṁ sukham edhati ।।

sabbattha ve sappuruṣā bhavanti na kāmakāmā lapayanti santo ।

sukhena phuṭṭhā uttavā dukhena noccāvacaṁ sappuruṣā karonti ।।

jayaṁ veraṁ prasavati dukkhaṁ śeti parājito ।

upaśānto sukhaṁ śeti hettā jayaparājayaṁ ।।

sukhā najjo sūpatitthā sukho dhammajito jano ।

sukho śraddhapaṭīlābho pāpassa akaraṇaṁ sukhaṁ ।।

sukhaṁ draṣṭuṁ śīlavanto sukhaṁ draṣṭuṁ bahuśśutā ।

arahanto pi sukhaṁ draṣṭuṁ vipramuttā niropadhī ।।

Atthavarggaḥ