巴特那法句经

Patna Dharmapada

10. Mala

asajjhāyamalāvedā anuṭṭhāṇamalā gharā ।

malo vaṇṇassa kosajjaṁ pramādo rakkhatāṁ malo ।।

malo istiye duccaritaṁ maccheraṁ dadatāṁ malo ।

malo pāpāni kaṁmāṇi assiṁ loke paramhi ca ।।

tato malataraṁ brūmi avijjā maraṇaṁ malaṁ ।

ete male prahattāna niṁmalā caratha bhikkhavo ।।

ayasā tu malo samuṭṭhito tato uṭṭhāya tam eva khādati ।

em eva vidhūnacāriyaṁ sakāni kaṁmāṇi nayanti doggatiṁ ।।

pāṇḍupalāśo ca dāni si yamapuruṣā pi ca te upaṭṭhitā ।

uyyogamukhe ca tiṣṭhasi pātheyaṁ pi ca te na vijjati ।।

uyyamassa ghaṭassa āttanā kaṁmāro rajataṁ va niddhame ।

niddhāntamalo anaṅgano bitiyaṁ ariyabhūmim esi ।।

anupūrvveṇa medhāvī thokathokaṁ khaṇe khaṇe ।

kammāro rajatasseva niddhame malam āttano ।।

sujīvaṁ ahirīkena saṁkiliṣṭan tu jīvati ।

prakkhaṇḍinā pragabbheṇa kākaśūreṇa dhansinā ।।

hirīmatā tu dujjīvaṁ niccaṁ śucigaveṣiṇā ।

alīnenāpragabbheṇa śuddhājīvena paśśatā ।।

supaśśaṁ vajjaṁ aṁñesaṁ āttano puna duddaśaṁ ।

paresām iha vajjāni uppunāti yathā busaṁ ।

āttano puna chādeti kalim va kṛtavāṁ śaṭho ।।

sukarāṇi asādhūni āttano ahitāni ca ।

yaṁ ve hitaṁ ca sādhuñ ca taṁ ve paramadukkaraṁ ।।

sukarāṇi asādhūni āttano ahitāni ca ।

yāni hitāni sādhūni tāni kurvvanti paṇḍitā ।।

alajjitavve lajjanti lajjitavve na lajjatha ।

abhaye bhayadaṁśāvī bhaye cābhayadaṁśino ।

micchadṛṣṭisamādānā sattā gacchanti doggatiṁ ।।

avajje vajjamatino vajje cāvajjasaṁñino ।

micchadṛṣṭisamādānā sattā gacchanti doggatiṁ ।।

asāre sāramatino sāre cā ’sārasaṁñino ।

te sāran nādhigacchanti micchasaṁkappagocarā ।।

sārañ ca sārato ññāttā asārañ ca asārato ।

te sāram adhigacchanti saṁmasaṁkappagocarā ।।

ayoge yuñjiyāttānaṁ yogamhi ca ayuṁjiya ।

atthaṁ hettā priyaggrāhī pṛhayantatthānuyogināṁ ।।

Malavarggaḥ