巴特那法句经

Patna Dharmapada

7. Kalyāṇī

abhittaretha kallāṇe pāpā cittaṁnivāraye।

daṁdhaṁhikaratopuṁñaṁ pāpamhi ramatemano ।।

kayira ce puruṣo pāpaṁ na naṁ kayirā punappuno ।

na tamhi chanda⟨ṁ?⟩ kayirātha dukkho pāpassa sa⟨ṁ?⟩ayo ।।

kayira ce puruṣo pu⟨ṁ?⟩ña⟨ṁ?⟩ kay⟨i?⟩ra cena⟨ṁ?⟩ punappuno ।

tamh⟨i?⟩ eva chanda⟨ṁ?⟩ kayirātha sukho puṁñassa saṁcayo ।।

śuddhasseva sadā phaggū suddasso ’poṣatho sadā ।

śuddhassa śucikammassa sadā saṁpajjate vrataṁ ।।

akataṁ dukkataṁ śreyo pacchā tapati dukkataṁ ।

dukkataṁ me kataṁ ti śocati bhūyo śocati doggatiṁ gato ।।

katañ ca sukataṁ sādhu yaṁ kattā nānutappati ।

sukataṁ me kataṁ ti nandati bhūyo nandati soggatiṅ gato ।।

pāpo pi paśśate bhadraṁ yāva pāpaṁ na paccati ।

yadā tu paccate pāpaṁ atha pāpo pāpāni paśśati ।।

bhadro pi paśśate pāpaṁ yāva bhadraṁ na paccati ।

yadā tu paccate bhadraṁ atha bhadro bhadrāṇi paśśati ।।

pāpaṁ pi karato bhadraṁ yāva pāpaṁ na paccati ।

atha payirāgate kāle pāpo pāpāni paśśati ।।

bhadraṁ pi karato pāpaṁ yāva bhadraṁ na paccati ।

atha payirāgate kāle bhadro bhadrāṇi paśśati ।।

pāṇimhi ce vraṇo nā ’ssa dhāreyā pāṇinā viṣaṁ ।

nāvraṇe viṣam anneti nāsti pāpaṁ akurvvato ।।

na hi pāpakaṁ kataṁ kammaṁ sajjaṁ chīraṁ va mucchati ।

dahantaṁ bālam anneti bhassachanno va pāpako ।।

na hi pāpakaṁ kataṁ kammaṁ sajjaṁ śastam va kantati ।

maraṇo ’peto hi jānāti yā gatī pāpakaṁmuṇo ।।

anāgataṁ paṭikayirātha kiccaṁ mā vo kiccaṁ kiccakāle vyadheyā ।

taṁ tārisaṁ paṭikatakiccakāriṁ na naṁ kiccaṁ kiccakāle vyadheti ।।

paṭikacceva taṁ kayirā yaṁ ñāyyā hitam āttano ।

na śākaṭikamanti ssa mantaṁ dhīro parākrame ।।

yathā śākaṭiko māggaṁ samaṁ hettā mahāpathaṁ ।

viṣamaṁ māggam āsājja akkhachinno tha jhāyati ।।

evaṁ dhammā apakrāṁma adhaṁmam anuvattiya ।

bālo maccumukhaṁ prātto akkhachinno va jhāyati ।।

kāṣāyakaṁṭhā bahavo pāpadhaṁmā asaṁyyatā ।

pāpā pāpehi kaṁmehi nirayaṁ te upapajjatha ।।

abhūtavādī nirayaṁ upeti yo cāpi kattā na karomī ti āha ।

ubho pi te precca samā bhavanti nihīnakaṁmā manujā paratra ।।

yo apraduṣṭassa naro praduṣyati śuddhassa poṣassa anaṁgaṇassa ।

tam eva bālaṁ pracceti pāpaṁ sukhumo rajo paṭivātaṁ va khitto ।।

vāṇijo va bhayaṁ māggaṁ appasāttho mahaddhano ।

viṣaṁ jīvitukāmo va pāpāni parivajjaye ।।

paradukkhopadhānena yo icche sukham āttano ।

verasaṁsaggasaṁsaṭṭho dukkhā na parimuccati ।।

kuṇapassa pi gandhucchijjati u ’ddhukitassa pi rāti accayā ।

puruṣassa adhammacāriṇo annāhaṁ gandho na chijjati ।।

yatha ggrahapatayo prabhūtaratanā āḍitte nagaramhi dahyamāne ।

muttāmaṇiphaṭikarajataheto vyāyamanti api nīharema kiṁci ।।

tatha-r-iva śamaṇā prabhūtapraṁñā ayirā ayirapathesu sicchamānā ।

jātijarāmaraṇabhayāddittā dukkhāṭṭā vyāyamanti api prāpuṇema śāntiṁ ।।

Kalyāṇīvarggaḥ