完整藏文原文 · 德格版页 当前仅加载第 44 函德格 262b 版页；藏文 NFD、目录标记与异常页序保留在来源切片中，重复版页行以稳定序号区分。
དེ་ལྟར་མྱ་ངན་སྐྱེད་པ་དང་དེ་ལྟར་སྨྲེ་སྔགས་འདོན་པར་བྱེད་པའི་དགེ་བའི་ཆོས་གཞན་གཅིག་ཀྱང་མ་མཐོང་ངོ་། །ལྷ་མོ་དཔེར་ན་བ་ལང་གི་མཆོག་ཁྱུ་མཆོག་གིས་ནི་འདི་ལྟར་འཕང་མཐོ་བ་དང་ཆུ་ཞེང་གིས་བ་ལང་གི་ཚོགས་ཐམས་ཅད་ཟིལ་གྱིས་མནན་ཏེ་མངོན་པར་བརྗིད་ཅིང་ཡང་དག་པར་
D92.044.0262b01.01མངོན་པར་བརྗིད་དོ། །ལྷ་མོ་དེ་བཞིན་དུ་ཐེག་པ་ཆེན་པོ་པའི་དམ་པའི་ཆོས་ཡོངས་སུ་འཛིན་པ་ཡང་ཆུང་དུ་ཟིན་ཀྱང་འདི་ལྟར་རྒྱས་པ་དང་། རྒྱ་ཆེན་པོར་གྱུར་པས་ཉན་ཐོས་དང་རང་སངས་རྒྱས་ཀྱི་ཐེག་པ་པ་རྣམས་ཀྱི་དགེ་བའི་ཆོས་ཐམས་ཅད་ཟིལ་གྱིས་གནོན་ཏོ། །ལྷ་མོ་དཔེར་ན་རིའི་རྒྱལ་པོ་
D92.044.0262b02.01རི་རབ་ཀྱིས་ནི་འདི་ལྟར་མཐོ་བ་དང་། རྒྱ་ཆེ་བས་རི་ནག་པོ་ཐམས་ཅད་ཟིལ་གྱིས་གནོན་ཅིང་མངོན་པར་ལྷག་གེར་འདུག་གོ །ལྷ་མོ་དེ་བཞིན་དུ་ཐེག་པ་ཆེན་པོ་པའི་ལུས་དང་སྲོག་ལ་མི་ལྟ་ཞིང་། ཕན་གདགས་པའི་སེམས་དང་ལྡན་པའི་དམ་པའི་ཆོས་ཡོངས་སུ་འཛིན་པ་ཡང་འདི་ལྟར་རྒྱས་
D92.044.0262b03.01པ་དང་རྒྱ་ཆེན་པོར་གྱུར་པས་ཐེག་པ་ཆེན་པོ་པ་ཐེག་པ་ལ་གསར་དུ་ཞུགས་པ་ལུས་དང་སྲོག་ལ་ལྟ་བ་རྣམས་ཀྱི་དགེ་བའི་ཆོས་ཐམས་ཅད་ཟིལ་གྱིས་གནོན་ན་གཞན་དག་གི་ལྟ་ཅི་སྨོས་ཏེ། ལྷ་མོ་དེ་བས་ན་སེམས་ཅན་རྣམས་དམ་པའི་ཆོས་ཡོངས་སུ་གཟུང་བ་ཉིད་ཡང་དག་པར་འཛིན་དུ་གཞུག་
D92.044.0262b04.01པར་བྱ། ཡང་དག་པར་བསྟན་པར་བྱ། ཡང་དག་པར་གཟེངས་བསྟོད་པར་བྱ། ཡང་དག་པར་རབ་ཏུ་དགའ་བར་བྱ། གཟུད་པར་བྱ་དགོད་པར་བྱའོ། །ལྷ་མོ་དམ་པའི་ཆོས་ཡོངས་སུ་འཛིན་པ་ནི་དེ་ལྟར་དོན་ཆེའོ། །དེ་ལྟར་འབྲས་བུ་ཆེའོ། །དེ་ལྟར་ཕན་ཡོན་ཆེའོ། །ལྷ་མོ་གལ་
D92.044.0262b05.01ཏེ་བསྐལ་པ་གྲངས་མེད་དཔག་ཏུ་མེད་པར་དམ་པའི་ཆོས་ཡོངས་སུ་འཛིན་པའི་ཡོན་ཏན་དང་ཕན་ཡོན་ངས་བཤད་དུ་ཟིན་ཀྱང་ལྷ་མོ་དམ་པའི་ཆོས་ཡོངས་སུ་འཛིན་པའི་ཡོན་ཏན་དང་། ཕན་ཡོན་བཤད་པ་དེ་དག་གི་མཐའ་འམ་མུར་ཐུག་པར་མི་འགྱུར་རོ། །ལྷ་མོ་དམ་པའི་ཆོས་ཡོངས་སུ་འཛིན་པ་
D92.044.0262b06.01ནི་དེ་ལྟར་ཡོན་ཏན་མཐའ་ཡས་པ་དང་ལྡན་ནོ། །ལྷ་མོ་དམ་པའི་ཡོངས་སུ་གཟུང་བ་སངས་རྒྱས་ཐམས་ཅད་ཀྱིས་བཞེད་པ་ངས་བསྟན་པ་དེད་ཁྱོད་ཀྱིས་བཤད་པ་སྤོབས་པར་གྱིས་ཤིག །དེ་ནས་ལྷ་མོ་དཔལ་ཕྲེང་གིས་བཅོམ་ལྡན་འདས་ལ་ལེགས་སོ་ཞེས་གསོལ་ནས་བཅོམ་ལྡན་འདས་ཀྱིས་
D92.044.0262b07.01