德格《甘珠尔》D724

ནི་བསྔགས་པ་སྟེ། །དངོས་གྲུབ་འདོད་པའི་དོན་དུ་བྱ། །རྒྱས་པ་ཅན་ཡང་བཤད་བྱ་སྟེ། །དེ་བཞིན་ཀུན་ཏུ་ཡང་དག་བསམས། །སྒྲུབ་པོས་ལེགས་པར་བསྒྲུབ་པར་བྱ། །དེ་ནས་མཛེས་པའི་སྦྱིན་སྲེག་ནི། །རྟག་ཏུ་འབད་པས་བྱ་བ་ཡིན། །ངེས་པ་ཁོ་ནས་རྫུ་

འཕྲུལ་འགྱུར། །སྐྱེ་བ་འདི་ཡི་དབང་བསྐུར་དོན། །བིལ་བ་མྱ་ངན་མེད་ལ་སོགས། །རབ་བརྗོད་པ་ལཱ་ཤ་དང་ནི། །ཨ་ཤྭཏྠ་དང་པ་ཛཱ་ཀ། །རྒྱས་པ་ཅན་ལ་སྦྱིན་སྲེག་ཀུན། །དེ་ཡི་ཡམ་ཤིང་བྱ་བ་ནི། །ཨུ་དུམ་བཱ་ར་ནྱ་གྲོ་དྷ། །ཨ་ཤྭཏྠ་དང་འོ་མར་བཅས། །གང་

ཡང་ཞི་ལ་གྲགས་པ་ཉིད། །ལས་རྣམས་ཀུན་ལ་ཡམ་ཤིང་དོན། །སྒྲུབ་པ་སེང་ལྡེང་ཨ་རིཥྚ། །ནིམྤ་དང་ནི་ཚེར་ཅན་བཤད། །དེ་བཞིན་གཞན་དུ་མངོན་མཛེས་པ། །ཡང་དག་སྒྲུབ་བྱེད་ཐེ་ཙོམ་མེད། །བ་བླ་མིག་སྨན་ལ་སོགས་པ། །རྫས་རྣམས་སྒྲུབ་པ་ལ་ཡང་ནི། །

བ་བྱུང་ལྔ་ཡི་གཙང་སྦྲ་དང་། །དེ་ཚེ་རིག་པ་ལྡན་པ་ཡིས། །ཡང་ན་ལྷ་ཡི་ཆུ་ལ་ནི། །དྲི་ཞིམ་དྲི་སོགས་ཡང་དག་སྡོམ། །ཨུ་དུམ་བཱ་ར་གཤེར་འདབ་བམ། །ཡང་ན་ཨ་ཤྭཏྠ་ལས་བྱུང་། །མེ་ཏོག་ཅན་གྱི་སྔགས་ཀྱི་ནང་། །བཱ་ན་ཏྲ་འམ་བཤོལ་ལྡན་ལ། །ཡོངས་སུ་

སྲུང་བའི་ཆོ་ག་ནི། །བྱས་ནས་ཆོ་ག་ལས་བསྒྲུབ་བྱ། །གསོ་སྦྱོང་ཅན་གྱིས་ཇི་སྲིད་དུ། །འཆར་བ་འབྱུང་བ་དེ་སྲིད་དུ། །ངེས་པར་སྒྲུབ་བམ་མུག་འདི་ནི། །ཉེ་བར་བླང་ཕྱིར་བླང་བར་བྱ། །བར་སྐབས་འདིར་བདག་ཉིད་ལ་དགོངས་སུ་གསོལ། ཞེས་པ་ནི་སྲོག་ཆགས་ཐམས་

ཅད་གསོད་པ་དང་། རྟག་ཏུ་གཞན་གྱི་ནོར་འཕྲོག་པ་ལས་ཀྱང་མི་ཚངས་པར་སྤྱོད་པ་ལས་དང་། ལག་ཏུ་བྱིན་པ་ཉིད་ལས་ཀྱང་རྟག་ཏུ་མྱོས་བྱེད་འཐུང་བ་དང་། སྐྱེ་བོ་རྣམས་ཕན་ཚུན་གཉིས་འཐབ་པར་བྱེད་པ་རིམ་པ་གང་ལས་ཕྲེང་བ་དང་། ཁ་དོག་དང་། གར་གྱི་དོན་དང་།

རོལ་པ་དང་། དྲེགས་པ་དང་། མལ་སྟན་ཆེན་པོ་དང་། མཐོན་པོ་ཅན་ལས་ལོག་སྟེ་གང་ད་ལྟ་དགྲ་བཅོམ་པ་ཡན་ལག་བརྒྱད་དང་ལྡན་པའི་གསོ་སྦྱོང་དང་ལྡན་པར་འགྱུར་བའོ། །བསྡུ་བར་བྱའོ་ཞེས་བརྗོད་པར་བྱ་བ་ཡོད་པར་བསམ་པས་སེམས་ཅན་ཐམས་ཅད་ཀྱི་དོན་དུ་ཡང་