完整藏文原文 · 德格版页 当前仅加载第 49 函德格 172b 版页；藏文 NFD、目录标记与异常页序保留在来源切片中，重复版页行以稳定序号区分。
མུ་སྟེགས་ཅན་གྱི་སྨྲ་བར་འགྱུར། །མི་སྐྱེ་བ་ལ་སྐྱེ་བ་མང་། །ཤི་འཕོས་མེད་ཅིང་འཆི་འཕོར་འགྱུར། །ཞིང་རྣམས་བྱེ་བར་ཅིག་ཅར་ཡང་། །ཆུ་ཡི་ཟླ་བ་བཞིན་དུ་སྣང་། །གཅིག་དང་མང་པོར་གྱུར་ནས་ནི། །མེ་ཡང་འབར་ཞིང་ཆར་ཡང་འབེབས། །སེམས་ལ་སེམས་ཀྱིར་གྱུར་ནས་ནི། །དེ་དག་སེམས་ཙམ་དུ་ཡང་
D107.049.0172b01.01སྨྲ། །སེམས་རྣམས་ལ་ནི་སེམས་ཙམ་དང་། །སེམས་མེད་པར་ནི་སེམས་ལས་བྱུང་། །རྣམ་པ་སྣ་ཚོགས་གཟུགས་དང་དབྱིབས། །སེམས་ཙམ་དུ་ནི་རྟོགས་པར་རིག །ཐུབ་དབང་དང་ནི་ཉན་ཐོས་གཟུགས། །རང་རྒྱལ་དང་ཡང་འདྲ་བ་དང་། །རྣམ་པ་མང་པོའི་གཟུགས་གཞན་གྱིས། །སེམས་ཙམ་དུ་ནི་དེ་
D107.049.0172b02.01དག་སྨྲ། །གཟུགས་མེད་པས་ནི་གཟུགས་མེད་གཟུགས། །དམྱལ་བ་པ་ལ་དམྱལ་བའི་གཟུགས། །སེམས་ཙམ་གྱི་ནི་རྒྱུ་དག་ཀྱང་། །སེམས་ཅན་རྣམས་ལ་སྟོན་པར་བྱེད། །དེ་དག་ཤིན་ཏུ་གྱུར་ནས་ནི། །སྒྱུ་མ་འདྲ་བའི་ཏིང་འཛིན་དང་། །ཡིད་ཀྱི་ལུས་ཀྱང་དེ་བཞིན་ཏེ། །དབང་དང་ས་བཅུ་རྣམས་ཀྱང་འཐོབ། །
D107.049.0172b03.01རང་གི་རྣམ་རྟོག་ཕྱིན་ཅི་ལོག །སྤྲོས་པ་དང་ནི་གཡོ་བ་དང་། །ཐོས་མཐོང་ཤེས་དང་རྟོགས་པ་དང་། །འདུ་ཤེས་དག་གིས་བུས་པ་བཅིངས། །གཞན་གྱི་དབང་ནི་མཚན་མ་སྟེ། །གང་མིང་དེ་ནི་ཀུན་བརྟགས་པས། །ཀུན་རྟོག་པ་དང་མཚན་མ་ནི། །གཞན་གྱི་དབང་ལས་ཤིན་ཏུ་འབྱུང་། །བློ་ཡིས་རབ་ཏུ་གཞིག་
D107.049.0172b04.01ནས་ནི། །བརྟག་པ་མེད་ཅིང་དབང་ཡང་མེད། །གྲུབ་པའི་དངོས་པོ་ཡོད་མེད་ན། །ཇི་ལྟར་བློ་ཡིས་རྣམ་པར་བརྟག །ཡོད་དང་མེད་པ་སྤངས་པ་ཡི། །གྲུབ་པ་ཡི་ནི་དངོས་པོ་ཡོད། །དངོས་པོ་ཡོད་མེད་རྣམ་གྲོལ་བའི། །རང་བཞིན་གཉིས་སུ་ཇི་ལྟར་འགྱུར། །
D107.049.0172b05.01ཀུན་ཏུ་བརྟགས་པའི་རང་བཞིན་ལ། །རང་བཞིན་དག་ནི་གཉིས་གནས་ཏེ། །བརྟགས་པ་རྣམ་པ་སྣ་ཚོགས་སྣང་། །རྣམ་དག་འཕགས་པའི་སྤྱོད་ཡུལ་ལོ། །བརྟགས་པ་སྣ་ཚོགས་སྣང་བ་ལ། །གཞན་གྱི་དབང་ཞེས་རྟོག་བྱེད་དེ། །རྣམ་པ་གཞན་དུ་
D107.049.0172b06.01རྟོག་ན་ནི། །མུ་སྟེགས་སྨྲ་ལ་གནས་པར་འགྱུར། །རྟོག་པས་བརྟགས་ཤེས་བཤད་པ་སྟེ། །མཐོང་ཕྱིར་རྒྱུ་ལས་བྱུང་བ་ཡིན། །རྣམ་རྟོག་གཉིས་ལས་གྲོལ་བ་ནི། །རྫོགས་པ་ཉིད་ཀྱང་དེ་ཡིན་ནོ། །
D107.049.0172b07.01