德格《甘珠尔》D724

དུ། །ཐུབ་པའི་སྐྱེས་མཆོག་གིས་གསུངས་སོ། །དུས་ཀྱི་ཚད་ནི་བཞི་ཡིན་ཏེ། །བར་མར་ཡོངས་སུ་བསྒྲགས་པ་ཡིན། །དེ་ནས་ཉི་མ་ཕྱེད་ནུབ་ན། །སྔགས་ཀྱི་བཟླས་པ་དེ་ཚེ་བཏང་། །སྔགས་ཟློས་བོར་བ་དེ་ཡི་ཚེ། །མཆོད་ཡོན་ཕུལ་ནས་གཤེགས་

སུ་གསོལ། །བརྟུལ་ཞུགས་ཅན་གྱིས་རྣམ་གཞན་སྤང་། །དེ་ཚེ་བོར་བའི་གདུགས་ལྷག་ན། །ཐུབ་པའི་བསྟན་ལ་དགེ་བ་བྱ། །ཤེས་རབ་ཕ་རོལ་ཕྱིན་ལ་སོགས། །དམ་པའི་ཆོས་ནི་ཀློག་པ་དང་། །ས་བཅུ་པ་ཡི་གླེགས་བམ་ནི། །མཆོད་དང་ཀློག་པ་

རྟག་ཏུའོ། །དེ་ནས་དུས་ལ་བབ་གྱུར་ན། །རང་སྔགས་སྔགས་ཀྱི་མགོན་པོ་དང་། །ཐུབ་པ་སྐྱེས་མཆོག་ཕྱག་བྱས་ནས། །དེ་ནས་འཚོ་བ་ལ་འགྲོ་ཞིང་། །དེ་བཞིན་དུས་སུ་སྤྱོད་པར་ལྡན། །དུས་སུ་ཟ་ཞིང་དབང་པོ་ཐུལ། །སྒྲུབ་པོ་ཆོས་དང་ལྡན་པ་

དང་། །སངས་རྒྱས་བསྟན་ལ་རབ་དད་བརྩོན། །གྲོང་གཞན་དུ་ནི་འཇུག་པ་ན། །མི་སྨྲ་གཙང་སྦྲ་སྤྱོད་ལ་དགའ། །སེམས་ཅན་རྟག་ཏུ་ཆོས་ལྡན་པའི། །ཁྱིམ་དུ་བསོད་སྙོམས་དག་ལ་འཇུག །ཟློས་པོ་སྲོག་ཆགས་མེད་པའི་ཆུ། །ཚོས་པར་གྲུབ་པ་

གཙང་མར་འདོད། །ཡང་དག་ལྟ་བ་ཕུན་སུམ་ཚོགས། །སངས་རྒྱས་བསྟན་ལ་རབ་ཏུ་དད། །དེ་ལྟའི་ཁྱིམ་དུ་རྟག་ཏུ་ནི། །བསོད་སྙོམས་དོན་དུ་སློང་མོ་བླང་། །དཔེར་ན་བརྩོན་པས་གོ་བགོས་ཏེ། །ཉམ་ངའི་ཡུལ་དུ་རབ་ཏུ་འཇུག །རྟག་ཏུ་དགྲ་ནི་

འཇོམས་པར་བྱེད། །དགྲ་རྣམས་ཀྱིས་གཞོམ་མི་ནུས་པ། །དེ་བཞིན་སྔགས་པ་སློང་མོས་འཚོ། །རྟག་ཏུ་གྲོང་དུ་འཇུག་པ་ན། །དེ་བཞིན་ཆགས་པར་འོས་པ་ཡི། །གཟུགས་སྒྲ་མཐོང་ན་མི་དགེ་བ། །འདོད་ཆགས་ཞི་བའི་དོན་གྱི་ཕྱིར། །

མི་སྡུག་དགེ་བ་བསྒོམ་པར་བྱ། །ལང་ཚོའི་རྣམ་པས་བརྒྱན་པ་ཡི། །བུད་མེད་ལུས་ནི་མཐོང་ནས་ཀྱང་། །སྨད་ཅིང་རུལ་བའི་ལུས་རྣམས་ནི། །སྲིན་བུས་ཟོས་ཤིང་དུར་ཁྲོད་གནས། །ལུས་ཀྱི་མི་རྟག་སྡུག་བསྔལ་བ། །མི་གཙང་དྲི་མི་ཞིམ་