完整藏文原文 · 德格版页 当前仅加载第 93 函德格 83a 版页；藏文 NFD、目录标记与异常页序保留在来源切片中，重复版页行以稳定序号区分。
འབྱུང་པོ་རྣམས་འཚེ་བར་བགྱིད་ན། བདག་རྟག་ཏུ་དེར་མཆི་ཞིང་ཀུན་ཏུ་བསྲུང་བར་བགྱི་སྟེ། ཡོངས་སུ་སྤོང་བར་མི་བགྱིད་དོ། །དེའི་ཚེ་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་འདི་སྐད་
D690.093.0083a01.01ཅེས་གསོལ་ཏོ། །བཙུན་པ་བཅོམ་ལྡན་འདས་སླད་མའི་དུས་ལྔ་བརྒྱ་པ་ཐམས་ཅད་སེམས་ཅན་ཕལ་ཆེར་རྙོག་པ་ཅན་དུ་འགྱུར་ཏེ། དགེ་བའི་རྩ་བ་ཆུང་ཞིང་རྟག་པར་རྒྱུན་དུ་དགེ་བའི་ཕྱོགས་བགྱིད་མི་ནུས་པ་དང་། གལ་ཏེ་འཛིན་ན་ཡང་དེའི་ཚེ། ལྷ་དང་། འབྱུང་པོ་འཚེ་བར་འགྱུར་བས། བདག་
D690.093.0083a02.01གིས་ལྷ་དང་མི་དང་ལྷ་མ་ཡིན་ལ་སོགས་པ་སེམས་ཅན་ཐམས་ཅད་ལ་སྨན་པ་དང་། བདེ་བ་དང་། ཞི་བར་བགྱིད་པའི་སླད་དུ། སངས་རྒྱས་བཅོམ་ལྡན་འདས་ཀྱི་མཐུ་དང་། རྫུ་འཕྲུལ་གྱི་སྟོབས་ཀྱིས་གཟུངས་འདིའི་ཆོ་ག་ད་བཤད་པར་བགྱིའོ། །བདག་གིས་ཀྱང་འདས་པའི་བསྐལ་པ་དུ་མར་གཟུངས་
D690.093.0083a03.01འདི་ལ་མཆོད་པ་བགྱིས་སོ། །འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་ཇི་སྙེད་པ་རྣམས་ཀྱིས་ཀྱང་གཟུངས་འདི་ལ་བརྟེན་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་བརྙེས་སོ། །རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་
D690.093.0083a04.01རྟག་ཏུ་གཟུངས་འདི་འཛིན་ཅིང་འཆང་ན། དེའི་ཚེ་འདི་ཉིད་ལ་ཚིག་གི་རྒྱུན་ཐོགས་པ་མེད་པར་འགྱུར། དབང་པོ་རྣོ་ཞིང་མཁས་པར་འགྱུར། སྤོབས་པ་མྱུར་བར་འགྱུར། ལྷ་དང་། མི་ཐམས་ཅད་ཀྱི་མཆོག་ཏུ་འགྱུར་རོ། །གང་སུའི་སྒྲ་དང་། ཚིགས་སུ་བཅད་པ་དང་། གྲགས་
D690.093.0083a05.01པ་ཡང་ཐོས་ཤིང་བདེ་བ་དང་། དགའ་བར་ཡང་འགྱུར་རོ། །ཕྱག་བྱ་བའི་འོས་སུ་ཡང་འགྱུར་རོ། །གང་དང་གང་དུ་སྐྱེས་པར་ཡང་སངས་རྒྱས་དང་། ཆོས་དང་། དགེ་འདུན་ཡང་མཐོང་བར་འགྱུར། ཚིག་ལ་ཡང་ཡིད་ཆེས་ཤིང་ཡིད་རྟོན་པར་འགྱུར་རོ། །དེ་ཡང་འདི་ལྟར་སངས་
D690.093.0083a06.01རྒྱས་བཅོམ་ལྡན་འདས་རྣམས་ཀྱི་མཐུ་ལགས་པར་བགྱི་ཡི། བདག་ཉིད་ཀྱི་ནི་མ་ལགས་སོ། །དེ་ནས་བཅོམ་ལྡན་འདས་ཀྱིས། བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་ལ་བསྟོད་ནས། ལེགས་སོ་ཞེས་བྱ་བ་ཡང་བྱིན་ཏེ། ཁྱོད་ནི་ལྷ་དང་མི་ལ་སོགས་པ་ལ་
D690.093.0083a07.01