完整藏文原文 · 德格版页 当前仅加载第 59 函德格 125a 版页；藏文 NFD、目录标记与异常页序保留在来源切片中，重复版页行以稳定序号区分。
སེམས་དཔའ་རྣམས་ཀྱི་སྤྱོད་པ་ལ་སྤོབས་པར་གྱིས་ཤིག །འཇམ་དཔལ་གྱིས་སྨྲས་པ། ལྷའི་བུ་བསམ་པ་ཡོངས་སུ་དག་ཅིང་། ནང་དང་། ཕྱི་རོལ་དབེན་པ་ཉིད་ཀྱིས་ལྷག་པའི་བསམ་པ་ལ་སྤྱོད་པ་དང་། རབ་ཏུ་སྤྱོད་པ་མེད་པ་ཉིད་ཀྱིས་སྦྱོར་བ་ལ་སྤྱོད་པ་དང་།
D161.059.0125a01.01སེམས་མི་བརྗེད་པ་ཉིད་ཀྱིས་བྱང་ཆུབ་ཀྱི་སེམས་མི་བརྗེད་པ་ལ་སྤྱོད་པ་དང་། སེམས་དུལ་བ་ཉིད་ཀྱིས་སྦྱིན་པ་ལ་སྤྱོད་པ་དང་། སེམས་ཞི་བ་ཉིད་ཀྱིས་ཚུལ་ཁྲིམས་ལ་སྤྱོད་པ་དང་། རྨས་པ་མེད་པ་ཉིད་ཀྱིས་བཟོད་པ་ལ་སྤྱོད་པ་དང་། ལུས་དང་སེམས་དབེན་པ་ཉིད་ཀྱིས་བརྩོན་
D161.059.0125a02.01འགྲུས་ལ་སྤྱོད་པ་དང་། ཆོས་ཀྱི་དབྱིངས་རྣམ་པར་གཡེང་བ་མེད་པ་ཉིད་ཀྱིས་བསམ་གཏན་ལ་སྤྱོད་པ་དང་། སྤྲོས་པ་མེད་པ་ཉིད་ཀྱིས་ཤེས་རབ་ལ་སྤྱོད་པ་དང་། སེམས་ཅན་ལ་བདག་མེད་པ་ཉིད་ཀྱིས་བྱམས་པ་ལ་སྤྱོད་པ་དང་། ཉོན་མོངས་པ་ཡོད་པ་མ་ཡིན་པར་རབ་ཏུ་ཞི་བ་
D161.059.0125a03.01ཉིད་ཀྱིས་སྙིང་རྗེ་ལ་སྤྱོད་པ་དང་། རང་བཞིན་གྱིས་རྣམ་པར་གྲོལ་བའི་ཕྱིར་དགའ་བ་ལ་སྤྱོད་པ་དང་། མཐའ་གཉིས་དང་བྲལ་བའི་ཕྱིར་བཏང་སྙོམས་ལ་སྤྱོད་པ་དང་། གཟོད་མ་ནས་མ་སྐྱེས་པའི་ཕྱིར་མི་རྟག་པ་ལ་སོ་སོར་རྟོག་པ་ལ་སྤྱོད་པ་དང་། ཡོངས་སུ་རྟོག་པ་སྡུག་བསྔལ་
D161.059.0125a04.01བའི་ཕྱིར་སྡུག་བསྔལ་ལ་སོ་སོར་རྟོག་པ་ལ་སྤྱོད་པ་དང་། ཕྱིན་ཅི་ལོག་རང་བཞིན་མེད་པའི་ཕྱིར་བདག་མེད་པ་ལ་སོ་སོར་རྟོག་པ་ལ་སྤྱོད་པ་དང་། འདུ་ཤེས་ཡོངས་སུ་ཤེས་པའི་ཕྱིར་ཞི་བ་ལ་སོ་སོར་རྟོག་པ་ལ་སྤྱོད་པ་དང་། ཕུང་པོ་སྒྱུ་མ་ལྟ་བུར་ཡོངས་སུ་ཤེས་པའི་ཕྱིར་སྡུག་བསྔལ་ཡོངས་སུ་ཤེས་
D161.059.0125a05.01པ་ལ་སྤྱོད་པ་དང་། མ་རིག་པ་སྔོན་དུ་འགྲོ་བའི་ཕྱིར་ཀུན་འབྱུང་བ་ཤེས་པ་ལ་སྤྱོད་པ་དང་། རང་བཞིན་གྱིས་འགགས་པའི་ཕྱིར་འགོག་པ་ཤེས་པ་ལ་སྤྱོད་པ་དང་། འདུས་བྱས་ལ་མངོན་པར་ཞེན་པ་མེད་པའི་ཕྱིར་ལམ་ཤེས་པ་ལ་སྤྱོད་པ་དང་། འབྲས་བུ་ཡོངས་སུ་ཤེས་པ་ཉིད་ཀྱིས་རྒྱུ་
D161.059.0125a06.01ཤེས་པ་ལ་སྤྱོད་པ་དང་། རྟེན་ཅིང་འབྲེལ་པར་འབྱུང་བའི་ཕྱིར་རྐྱེན་ཤེས་པ་ལ་སྤྱོད་པ་དང་། དུ་མའི་ཕྱིར་ཚོགས་པ་ལ་སྤྱོད་པ་དང་། བརྗོད་དུ་མེད་པའི་ཕྱིར་དོན་སོ་སོ་ཡང་དག་པར་རིག་པ་ལ་སྤྱོད་པ་དང་། ཆོས་ཀྱི་དབྱིངས་དབྱེར་མེད་པའི་ཕྱིར་ཆོས་སོ་སོ་ཡང་དག་པར་རིག་པ་ལ་སྤྱོད་པ་
D161.059.0125a07.01