上座部比丘尼分别（巴利原文）

Theravāda Vinaya

Bhikkhunivibhaṅga

Saṅghādisesakaṇḍa

1. Ussayavādikāsikkhāpada

Ime kho panāyyāyo sattarasa saṅghādisesā dhammā uddesaṁ āgacchanti.

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena aññataro upāsako bhikkhunisaṅghassa udositaṁ datvā kālaṅkato hoti.

Tassa dve puttā honti—

eko assaddho appasanno, eko saddho pasanno.

Te pettikaṁ sāpateyyaṁ vibhajiṁsu.

Atha kho so assaddho appasanno taṁ saddhaṁ pasannaṁ etadavoca—

“amhākaṁ udosito, taṁ bhājemā”ti.

Evaṁ vutte, so saddho pasanno taṁ assaddhaṁ appasannaṁ etadavoca—

“māyyo, evaṁ avaca.

Amhākaṁ pitunā bhikkhunisaṅghassa dinno”ti.

Dutiyampi kho so assaddho appasanno taṁ saddhaṁ pasannaṁ etadavoca—

“amhākaṁ udosito, taṁ bhājemā”ti.

Atha kho so saddho pasanno taṁ assaddhaṁ appasannaṁ etadavoca—

“māyyo, evaṁ avaca.

Amhākaṁ pitunā bhikkhunisaṅghassa dinno”ti.

Tatiyampi kho so assaddho appasanno taṁ saddhaṁ pasannaṁ etadavoca—

“amhākaṁ udosito, taṁ bhājemā”ti.

Atha kho so saddho pasanno—

“sace mayhaṁ bhavissati, ahampi bhikkhunisaṅghassa dassāmī”ti—

taṁ assaddhaṁ appasannaṁ etadavoca—

“bhājemā”ti.

Atha kho so udosito tehi bhājīyamāno tassa assaddhassa appasannassa pāpuṇāti.

Atha kho so assaddho appasanno bhikkhuniyo upasaṅkamitvā etadavoca—

“nikkhamathāyye, amhākaṁ udosito”ti.

Evaṁ vutte thullanandā bhikkhunī taṁ purisaṁ etadavoca—

“māyyo, evaṁ avaca, tumhākaṁ pitunā bhikkhunisaṅghassa dinno”ti.

“Dinno na dinno”ti vohārike mahāmatte pucchiṁsu.

Mahāmattā evamāhaṁsu—

“ko, ayye, jānāti bhikkhunisaṅghassa dinno”ti?

Evaṁ vutte, thullanandā bhikkhunī te mahāmatte etadavoca—

“api nāyyā tumhehi diṭṭhaṁ vā sutaṁ vā sakkhiṁ ṭhapayitvā dānaṁ diyyamānan”ti?

Atha kho te mahāmattā—

“saccaṁ kho ayyā āhā”ti taṁ udositaṁ bhikkhunisaṅghassa akaṁsu.

Atha kho so puriso parājito ujjhāyati khiyyati vipāceti—

“assamaṇiyo imā muṇḍā bandhakiniyo.

Kathañhi nāma amhākaṁ udositaṁ acchindāpessantī”ti.

Thullanandā bhikkhunī mahāmattānaṁ etamatthaṁ ārocesi.

Mahāmattā taṁ purisaṁ daṇḍāpesuṁ.

Atha kho so puriso daṇḍito bhikkhunupassayassa avidūre ājīvakaseyyaṁ kārāpetvā ājīvake uyyojesi—

“etā bhikkhuniyo accāvadathā”ti.

Thullanandā bhikkhunī mahāmattānaṁ etamatthaṁ ārocesi.

Mahāmattā taṁ purisaṁ bandhāpesuṁ.

Manussā ujjhāyanti khiyyanti vipācenti—

“paṭhamaṁ bhikkhuniyo udositaṁ acchindāpesuṁ, dutiyaṁ daṇḍāpesuṁ, tatiyaṁ bandhāpesuṁ.

Idāni ghātāpessantī”ti.

Assosuṁ kho bhikkhuniyo tesaṁ manussānaṁ ujjhāyantānaṁ khiyyantānaṁ vipācentānaṁ.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma ayyā thullanandā ussayavādikā viharissatī”ti.

Atha kho tā bhikkhuniyo bhikkhūnaṁ etamatthaṁ ārocesuṁ …pe…

“saccaṁ kira, bhikkhave, thullanandā bhikkhunī ussayavādikā viharatī”ti.

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, thullanandā bhikkhunī ussayavādikā viharissati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī ussayavādikā vihareyya gahapatinā vā gahapatiputtena vā dāsena vā kammakārena vā antamaso samaṇaparibbājakenāpi, ayaṁ bhikkhunī paṭhamāpattikaṁ dhammaṁ āpannā nissāraṇīyaṁ saṅghādisesan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Ussayavādikā nāma

aḍḍakārikā vuccati.

Gahapati nāma

yo koci agāraṁ ajjhāvasati.

Gahapatiputto nāma

ye keci puttabhātaro.

Dāso nāma

antojāto dhanakkīto karamarānīto.

Kammakāro nāma

bhaṭako āhatako.

Samaṇaparibbājako nāma

bhikkhuñca bhikkhuniñca sikkhamānañca sāmaṇerañca sāmaṇeriñca ṭhapetvā yo koci paribbājakasamāpanno.

Aḍḍaṁ karissāmīti dutiyaṁ vā pariyesati gacchati vā, āpatti dukkaṭassa.

Ekassa āroceti, āpatti dukkaṭassa.

Dutiyassa āroceti, āpatti thullaccayassa.

Aḍḍapariyosāne āpatti saṅghādisesassa.

Paṭhamāpattikanti

saha vatthujjhācārā āpajjati asamanubhāsanāya.

Nissāraṇīyanti

saṅghamhā nissārīyati.

Saṅghādisesanti

saṅghova tassā āpattiyā mānattaṁ deti mūlāya paṭikassati abbheti, na sambahulā na ekā bhikkhunī. Tena vuccati “saṅghādiseso”ti.

Tasseva āpattinikāyassa nāmakammaṁ adhivacanaṁ. Tenapi vuccati “saṅghādiseso”ti.

Anāpatti—

manussehi ākaḍḍhīyamānā gacchati,

ārakkhaṁ yācati,

anodissa ācikkhati,

ummattikāya …pe…

ādikammikāyāti.

Paṭhamasaṅghādisesasikkhāpadaṁ niṭṭhitaṁ.