上座部比丘尼分别（巴利原文）

Theravāda Vinaya

Bhikkhunivibhaṅga

Nissaggiyakaṇḍa

Cīvaravagga

11. Garupāvuraṇasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena thullanandā bhikkhunī bahussutā hoti bhāṇikā visāradā paṭṭā dhammiṁ kathaṁ kātuṁ.

Atha kho rājā pasenadi kosalo sītakāle mahagghaṁ kambalaṁ pārupitvā yena thullanandā bhikkhunī tenupasaṅkami; upasaṅkamitvā thullanandaṁ bhikkhuniṁ abhivādetvā ekamantaṁ nisīdi.

Ekamantaṁ nisinnaṁ kho rājānaṁ pasenadiṁ kosalaṁ thullanandā bhikkhunī dhammiyā kathāya sandassesi samādapesi samuttejesi sampahaṁsesi.

Atha kho rājā pasenadi kosalo thullanandāya bhikkhuniyā dhammiyā kathāya sandassito samādapito samuttejito sampahaṁsito thullanandaṁ bhikkhuniṁ etadavoca—

“vadeyyāsi, ayye, yena attho”ti?

“Sace me tvaṁ, mahārāja, dātukāmosi, imaṁ kambalaṁ dehī”ti.

Atha kho rājā pasenadi kosalo thullanandāya bhikkhuniyā kambalaṁ datvā uṭṭhāyāsanā thullanandaṁ bhikkhuniṁ abhivādetvā padakkhiṇaṁ katvā pakkāmi.

Manussā ujjhāyanti khiyyanti vipācenti—

“mahicchā imā bhikkhuniyo asantuṭṭhā.

Kathañhi nāma rājānaṁ kambalaṁ viññāpessantī”ti.

Assosuṁ kho bhikkhuniyo tesaṁ manussānaṁ ujjhāyantānaṁ khiyyantānaṁ vipācentānaṁ.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma ayyā thullanandā rājānaṁ kambalaṁ viññāpessatī”ti …pe…

“saccaṁ kira, bhikkhave, thullanandā bhikkhunī rājānaṁ kambalaṁ viññāpetī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, thullanandā bhikkhunī rājānaṁ kambalaṁ viññāpessati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Garupāvuraṇaṁ pana bhikkhuniyā cetāpentiyā catukkaṁsaparamaṁ cetāpetabbaṁ. Tato ce uttari cetāpeyya, nissaggiyaṁ pācittiyan”ti.

Garupāvuraṇaṁ nāma

yaṁ kiñci sītakāle pāvuraṇaṁ.

Cetāpentiyāti

viññāpentiyā.

Catukkaṁsaparamaṁ cetāpetabbanti

soḷasakahāpaṇagghanakaṁ cetāpetabbaṁ.

Tato ce uttari cetāpeyyāti

tatuttari viññāpeti, payoge dukkaṭaṁ.

Paṭilābhena nissaggiyaṁ hoti.

Nissajjitabbaṁ saṅghassa vā gaṇassa vā ekabhikkhuniyā vā.

Evañca pana, bhikkhave, nissajjitabbaṁ.

…pe…

“idaṁ me, ayye, garupāvuraṇaṁ atirekacatukkaṁsaparamaṁ cetāpitaṁ nissaggiyaṁ, imāhaṁ saṅghassa nissajjāmī”ti …pe…

dadeyyāti …pe…

dadeyyunti …pe…

ayyāya dammīti.

Atirekacatukkaṁse atirekasaññā cetāpeti, nissaggiyaṁ pācittiyaṁ.

Atirekacatukkaṁse vematikā cetāpeti, nissaggiyaṁ pācittiyaṁ.

Atirekacatukkaṁse ūnakasaññā cetāpeti, nissaggiyaṁ pācittiyaṁ.

Ūnakacatukkaṁse atirekasaññā, āpatti dukkaṭassa.

Ūnakacatukkaṁse vematikā, āpatti dukkaṭassa.

Ūnakacatukkaṁse ūnakasaññā, anāpatti.

Anāpatti—

catukkaṁsaparamaṁ cetāpeti,

ūnakacatukkaṁsaparamaṁ cetāpeti,

ñātakānaṁ,

pavāritānaṁ,

aññassatthāya,

attano dhanena,

mahagghaṁ cetāpetukāmassa appagghaṁ cetāpeti,

ummattikāya,

ādikammikāyāti.

Ekādasamasikkhāpadaṁ niṭṭhitaṁ.