上座部比丘尼分别（巴利原文）

Theravāda Vinaya

Bhikkhunivibhaṅga

Pācittiyakaṇḍa

Lasuṇavagga

6. Upatiṭṭhanasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena ārohanto nāma mahāmatto bhikkhūsu pabbajito hoti.

Tassa purāṇadutiyikā bhikkhunīsu pabbajitā hoti.

Tena kho pana samayena so bhikkhu tassā bhikkhuniyā santike bhattavissaggaṁ karoti.

Atha kho sā bhikkhunī tassa bhikkhuno bhuñjantassa pānīyena ca vidhūpanena ca upatiṭṭhitvā accāvadati.

Atha kho so bhikkhu taṁ bhikkhuniṁ apasādeti—

“mā, bhagini, evarūpaṁ akāsi.

Netaṁ kappatī”ti.

“Pubbe maṁ tvaṁ evañca evañca karosi, idāni ettakaṁ na sahasī”ti—

pānīyathālakaṁ matthake āsumbhitvā vidhūpanena pahāraṁ adāsi.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma bhikkhunī bhikkhussa pahāraṁ dassatī”ti …pe…

“saccaṁ kira, bhikkhave, bhikkhunī bhikkhussa pahāraṁ adāsī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, bhikkhunī bhikkhussa pahāraṁ dassati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī bhikkhussa bhuñjantassa pānīyena vā vidhūpanena vā upatiṭṭheyya, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Bhikkhussāti

upasampannassa.

Bhuñjantassāti

pañcannaṁ bhojanānaṁ aññataraṁ bhojanaṁ bhuñjantassa.

Pānīyaṁ nāma

yaṁ kiñci pānīyaṁ.

Vidhūpanaṁ nāma

yā kāci bījanī.

Upatiṭṭheyyāti

hatthapāse tiṭṭhati, āpatti pācittiyassa.

Upasampanne upasampannasaññā pānīyena vā vidhūpanena vā upatiṭṭhati, āpatti pācittiyassa.

Upasampanne vematikā pānīyena vā vidhūpanena vā upatiṭṭhati, āpatti pācittiyassa.

Upasampanne anupasampannasaññā pānīyena vā vidhūpanena vā upatiṭṭhati, āpatti pācittiyassa.

Hatthapāsaṁ vijahitvā upatiṭṭhati, āpatti dukkaṭassa.

Khādanīyaṁ khādantassa upatiṭṭhati, āpatti dukkaṭassa.

Anupasampannassa upatiṭṭhati, āpatti dukkaṭassa.

Anupasampanne upasampannasaññā, āpatti dukkaṭassa.

Anupasampanne vematikā, āpatti dukkaṭassa.

Anupasampanne anupasampannasaññā, āpatti dukkaṭassa.

Anāpatti—

deti,

dāpeti,

anupasampannaṁ āṇāpeti,

ummattikāya,

ādikammikāyāti.

Chaṭṭhasikkhāpadaṁ niṭṭhitaṁ.