上座部比丘尼分别（巴利原文）

Theravāda Vinaya

Bhikkhunivibhaṅga

Pācittiyakaṇḍa

Gabbhinivagga

63. Sikkhamānasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena bhikkhuniyo dve vassāni chasu dhammesu asikkhitasikkhaṁ sikkhamānaṁ vuṭṭhāpenti.

Tā bālā honti abyattā na jānanti kappiyaṁ vā akappiyaṁ vā.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma bhikkhuniyo dve vassāni chasu dhammesu asikkhitasikkhaṁ sikkhamānaṁ vuṭṭhāpessantī”ti …pe…

“saccaṁ kira, bhikkhave, bhikkhuniyo dve vassāni chasu dhammesu asikkhitasikkhaṁ sikkhamānaṁ vuṭṭhāpentī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, bhikkhuniyo dve vassāni chasu dhammesu asikkhitasikkhaṁ sikkhamānaṁ vuṭṭhāpessanti.

Netaṁ, bhikkhave, appasannānaṁ vā pasādāya …pe…

vigarahitvā …pe…

dhammiṁ kathaṁ katvā bhikkhū āmantesi—

“anujānāmi, bhikkhave, sikkhamānāya dve vassāni chasu dhammesu sikkhāsammutiṁ dātuṁ.

Evañca pana, bhikkhave, dātabbā.

Tāya sikkhamānāya saṅghaṁ upasaṅkamitvā ekaṁsaṁ uttarāsaṅgaṁ karitvā bhikkhunīnaṁ pāde vanditvā ukkuṭikaṁ nisīditvā añjaliṁ paggahetvā evamassa vacanīyo—

‘ahaṁ, ayye, itthannāmā itthannāmāya ayyāya sikkhamānā.

Saṅghaṁ dve vassāni chasu dhammesu sikkhāsammutiṁ yācāmī’ti.

Dutiyampi yācitabbā.

Tatiyampi yācitabbā.

Byattāya bhikkhuniyā paṭibalāya saṅgho ñāpetabbo—

‘Suṇātu me, ayye, saṅgho.

Ayaṁ itthannāmā itthannāmāya ayyāya sikkhamānā saṅghaṁ dve vassāni chasu dhammesu sikkhāsammutiṁ yācati.

Yadi saṅghassa pattakallaṁ saṅgho itthannāmāya sikkhamānāya dve vassāni chasu dhammesu sikkhāsammutiṁ dadeyya.

Esā ñatti.

Suṇātu me, ayye, saṅgho.

Ayaṁ itthannāmā itthannāmāya ayyāya sikkhamānā saṅghaṁ dve vassāni chasu dhammesu sikkhāsammutiṁ yācati.

Saṅgho itthannāmāya sikkhamānāya dve vassāni chasu dhammesu sikkhāsammutiṁ deti.

Yassā ayyāya khamati itthannāmāya sikkhamānāya dve vassāni chasu dhammesu sikkhāsammutiyā dānaṁ, sā tuṇhassa;

yassā nakkhamati, sā bhāseyya.

Dinnā saṅghena itthannāmāya sikkhamānāya dve vassāni chasu dhammesu sikkhāsammuti.

Khamati saṅghassa, tasmā tuṇhī, evametaṁ dhārayāmī’”ti.

Sā sikkhamānā “evaṁ vadehī”ti vattabbā—

“pāṇātipātā veramaṇiṁ dve vassāni avītikkamma samādānaṁ samādiyāmi.

Adinnādānā veramaṇiṁ dve vassāni avītikkamma samādānaṁ samādiyāmi.

Abrahmacariyā veramaṇiṁ dve vassāni avītikkamma samādānaṁ samādiyāmi.

Musāvādā veramaṇiṁ dve vassāni avītikkamma samādānaṁ samādiyāmi.

Surāmerayamajjappamādaṭṭhānā veramaṇiṁ dve vassāni avītikkamma samādānaṁ samādiyāmi.

Vikālabhojanā veramaṇiṁ dve vassāni avītikkamma samādānaṁ samādiyāmī”ti.

Atha kho bhagavā tā bhikkhuniyo anekapariyāyena vigarahitvā dubbharatāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī dve vassāni chasu dhammesu asikkhitasikkhaṁ sikkhamānaṁ vuṭṭhāpeyya, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Dve vassānīti

dve saṁvaccharāni.

Asikkhitasikkhā nāma

sikkhā vā na dinnā hoti, dinnā vā sikkhā kupitā.

Vuṭṭhāpeyyāti

upasampādeyya.

“Vuṭṭhāpessāmī”ti gaṇaṁ vā ācariniṁ vā pattaṁ vā cīvaraṁ vā pariyesati, sīmaṁ vā sammannati, āpatti dukkaṭassa.

Ñattiyā dukkaṭaṁ.

Dvīhi kammavācāhi dukkaṭā.

Kammavācāpariyosāne upajjhāyāya āpatti pācittiyassa.

Gaṇassa ca ācariniyā ca āpatti dukkaṭassa.

Dhammakamme dhammakammasaññā vuṭṭhāpeti, āpatti pācittiyassa.

Dhammakamme vematikā vuṭṭhāpeti, āpatti pācittiyassa.

Dhammakamme adhammakammasaññā vuṭṭhāpeti, āpatti pācittiyassa.

Adhammakamme dhammakammasaññā, āpatti dukkaṭassa.

Adhammakamme vematikā, āpatti dukkaṭassa.

Adhammakamme adhammakammasaññā, āpatti dukkaṭassa.

Anāpatti—

dve vassāni chasu dhammesu sikkhitasikkhaṁ sikkhamānaṁ vuṭṭhāpeti,

ummattikāya,

ādikammikāyāti.

Tatiyasikkhāpadaṁ niṭṭhitaṁ.