上座部比丘尼分别（巴利原文）

Theravāda Vinaya

Bhikkhunivibhaṅga

Pācittiyakaṇḍa

Tuvaṭṭavagga

39. Antovassasikkhāpada

Tena samayena buddho bhagavā rājagahe viharati veḷuvane kalandakanivāpe.

Tena kho pana samayena bhikkhuniyo antovassaṁ cārikaṁ caranti.

Manussā ujjhāyanti khiyyanti vipācenti—

“kathañhi nāma bhikkhuniyo antovassaṁ cārikaṁ carissanti haritāni tiṇāni ca sammaddantā, ekindriyaṁ jīvaṁ viheṭhentā, bahū khuddake pāṇe saṅghātaṁ āpādentā”ti.

Assosuṁ kho bhikkhuniyo tesaṁ manussānaṁ ujjhāyantānaṁ khiyyantānaṁ vipācentānaṁ.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma bhikkhuniyo antovassaṁ cārikaṁ carissantī”ti …pe…

“saccaṁ kira, bhikkhave, bhikkhuniyo antovassaṁ cārikaṁ carantī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, bhikkhuniyo antovassaṁ cārikaṁ carissanti.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī antovassaṁ cārikaṁ careyya, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Antovassanti

purimaṁ vā temāsaṁ pacchimaṁ vā temāsaṁ avasitvā.

Cārikaṁ careyyāti

kukkuṭasampāte gāme gāmantare gāmantare āpatti pācittiyassa.

Agāmake araññe addhayojane addhayojane āpatti pācittiyassa.

Anāpatti—

sattāhakaraṇīyena gacchati,

kenaci ubbāḷhā gacchati,

āpadāsu,

ummattikāya,

ādikammikāyāti.

Navamasikkhāpadaṁ niṭṭhitaṁ.