上座部比丘尼分别（巴利原文）

Theravāda Vinaya

Bhikkhunivibhaṅga

Nissaggiyakaṇḍa

Pattavagga

4. Aññaviññāpanasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena thullanandā bhikkhunī gilānā hoti.

Atha kho aññataro upāsako yena thullanandā bhikkhunī tenupasaṅkami; upasaṅkamitvā thullanandaṁ bhikkhuniṁ etadavoca—

“kiṁ te, ayye, aphāsu, kiṁ āharīyatū”ti?

“Sappinā me, āvuso, attho”ti.

Atha kho so upāsako aññatarassa āpaṇikassa gharā kahāpaṇassa sappiṁ āharitvā thullanandāya bhikkhuniyā adāsi.

Thullanandā bhikkhunī evamāha—

“na me, āvuso, sappinā attho;

telena me attho”ti.

Atha kho so upāsako yena so āpaṇiko tenupasaṅkami; upasaṅkamitvā taṁ āpaṇikaṁ etadavoca—

“na kirāyyo, ayyāya sappinā attho, telena attho.

Handa te sappiṁ, telaṁ me dehī”ti.

“Sace mayaṁ, ayyo, vikkītaṁ bhaṇḍaṁ puna ādiyissāma, kadā amhākaṁ bhaṇḍaṁ vikkāyissati;

sappissa kayena sappi haṭaṁ, telassa kayaṁ āhara, telaṁ harissasī”ti.

Atha kho so upāsako ujjhāyati khiyyati vipāceti—

“kathañhi nāma ayyā thullanandā aññaṁ viññāpetvā aññaṁ viññāpessatī”ti.

Assosuṁ kho bhikkhuniyo tassa upāsakassa ujjhāyantassa khiyyantassa vipācentassa.

Yā tā bhikkhuniyo appicchā …pe… tā ujjhāyanti khiyyanti vipācenti …pe…

atha kho tā bhikkhuniyo bhikkhūnaṁ etamatthaṁ ārocesuṁ.

Bhikkhū bhagavato etamatthaṁ ārocesuṁ …pe…

“saccaṁ kira, bhikkhave, thullanandā bhikkhunī aññaṁ viññāpetvā aññaṁ viññāpetī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, thullanandā bhikkhunī aññaṁ viññāpetvā aññaṁ viññāpessati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī aññaṁ viññāpetvā aññaṁ viññāpeyya, nissaggiyaṁ pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Aññaṁ viññāpetvāti

yaṁ kiñci viññāpetvā.

Aññaṁ viññāpeyyāti

taṁ ṭhapetvā aññaṁ viññāpeti, payoge dukkaṭaṁ.

Paṭilābhena nissaggiyaṁ hoti.

Nissajjitabbaṁ saṅghassa vā gaṇassa vā ekabhikkhuniyā vā.

Evañca pana, bhikkhave, nissajjitabbaṁ.

…pe…

“idaṁ me, ayye, aññaṁ viññāpetvā aññaṁ viññāpitaṁ nissaggiyaṁ, imāhaṁ saṅghassa nissajjāmī”ti …pe…

dadeyyā”ti …pe…

dadeyyun”ti …pe…

ayyāya dammī”ti.

Aññe aññasaññā aññaṁ viññāpeti, nissaggiyaṁ pācittiyaṁ.

Aññe vematikā aññaṁ viññāpeti, nissaggiyaṁ pācittiyaṁ.

Aññe anaññasaññā aññaṁ viññāpeti, nissaggiyaṁ pācittiyaṁ.

Anaññe aññasaññā anaññaṁ viññāpeti, āpatti dukkaṭassa.

Anaññe vematikā anaññaṁ viññāpeti, āpatti dukkaṭassa.

Anaññe anaññasaññā, anāpatti.

Anāpatti—

taññeva viññāpeti, aññañca viññāpeti,

ānisaṁsaṁ dassetvā viññāpeti,

ummattikāya,

ādikammikāyāti.

Catutthasikkhāpadaṁ niṭṭhitaṁ.