上座部比丘尼分别（巴利原文）

Theravāda Vinaya

Bhikkhunivibhaṅga

Pācittiyakaṇḍa

Rattandhakāravagga

16. Anāpucchāabhinisīdanasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena thullanandā bhikkhunī pacchābhattaṁ kulāni upasaṅkamitvā sāmike anāpucchā āsane abhinisīdatipi abhinipajjatipi.

Manussā thullanandaṁ bhikkhuniṁ hirīyamānā āsane neva abhinisīdanti na abhinipajjanti.

Manussā ujjhāyanti khiyyanti vipācenti—

“kathañhi nāma ayyā thullanandā pacchābhattaṁ kulāni upasaṅkamitvā sāmike anāpucchā āsane abhinisīdissatipi abhinipajjissatipī”ti.

Assosuṁ kho bhikkhuniyo tesaṁ manussānaṁ ujjhāyantānaṁ khiyyantānaṁ vipācentānaṁ.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma ayyā thullanandā pacchābhattaṁ kulāni upasaṅkamitvā sāmike anāpucchā āsane abhinisīdissatipi abhinipajjissatipī”ti …pe…

“saccaṁ kira, bhikkhave, thullanandā bhikkhunī pacchābhattaṁ kulāni upasaṅkamitvā sāmike anāpucchā āsane abhinisīdatipi abhinipajjatipī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, thullanandā bhikkhunī pacchābhattaṁ kulāni upasaṅkamitvā sāmike anāpucchā āsane abhinisīdissatipi abhinipajjissatipi.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī pacchābhattaṁ kulāni upasaṅkamitvā sāmike anāpucchā āsane abhinisīdeyya vā abhinipajjeyya vā, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Pacchābhattaṁ nāma

majjhanhike vītivatte yāva atthaṅgate sūriye.

Kulaṁ nāma

cattāri kulāni— khattiyakulaṁ, brāhmaṇakulaṁ, vessakulaṁ, suddakulaṁ.

Upasaṅkamitvāti

tattha gantvā.

Sāmike anāpucchāti

yo tasmiṁ kule manusso sāmiko dātuṁ, taṁ anāpucchā.

Āsanaṁ nāma

pallaṅkassa okāso vuccati.

Abhinisīdeyyāti

tasmiṁ abhinisīdati, āpatti pācittiyassa.

Abhinipajjeyyāti

tasmiṁ abhinipajjati, āpatti pācittiyassa.

Anāpucchite anāpucchitasaññā āsane abhinisīdati vā abhinipajjati vā, āpatti pācittiyassa.

Anāpucchite vematikā āsane abhinisīdati vā abhinipajjati vā, āpatti pācittiyassa.

Anāpucchite āpucchitasaññā āsane abhinisīdati vā abhinipajjati vā, āpatti pācittiyassa.

Pallaṅkassa anokāse āpatti dukkaṭassa.

Āpucchite anāpucchitasaññā, āpatti dukkaṭassa.

Āpucchite vematikā, āpatti dukkaṭassa.

Āpucchite āpucchitasaññā, anāpatti.

Anāpatti—

āpucchā āsane abhinisīdati vā abhinipajjati vā,

dhuvapaññatte,

gilānāya,

āpadāsu,

ummattikāya,

ādikammikāyāti.

Chaṭṭhasikkhāpadaṁ niṭṭhitaṁ.