上座部比丘尼分别（巴利原文）

Theravāda Vinaya

Bhikkhunivibhaṅga

Nissaggiyakaṇḍa

Pattavagga

9. Dutiyagaṇikacetāpanasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena aññatarassa pūgassa pariveṇavāsikā bhikkhuniyo yāguyā kilamanti.

Atha kho so pūgo bhikkhunīnaṁ yāguatthāya chandakaṁ saṅgharitvā aññatarassa āpaṇikassa ghare parikkhāraṁ nikkhipitvā bhikkhuniyo upasaṅkamitvā etadavoca—

“amukassa, ayye, āpaṇikassa ghare yāguatthāya parikkhāro nikkhitto.

Tato taṇḍule āharāpetvā yāguṁ pacāpetvā paribhuñjathā”ti.

Bhikkhuniyo tena ca parikkhārena sayampi yācitvā bhesajjaṁ cetāpetvā paribhuñjiṁsu.

So pūgo jānitvā ujjhāyati khiyyati vipāceti—

“kathañhi nāma bhikkhuniyo aññadatthikena parikkhārena aññuddisikena mahājanikena saññācikena aññaṁ cetāpessantī”ti …pe…

“saccaṁ kira, bhikkhave, bhikkhuniyo aññadatthikena parikkhārena aññuddisikena mahājanikena saññācikena aññaṁ cetāpentī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, bhikkhuniyo aññadatthikena parikkhārena aññuddisikena mahājanikena saññācikena aññaṁ cetāpessanti.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī aññadatthikena parikkhārena aññuddisikena mahājanikena saññācikena aññaṁ cetāpeyya, nissaggiyaṁ pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Aññadatthikena parikkhārena aññuddisikenāti

aññassatthāya dinnena.

Mahājanikenāti

gaṇassa, na saṅghassa, na ekabhikkhuniyā.

Saññācikenāti

sayaṁ yācitvā.

Aññaṁ cetāpeyyāti

yaṁatthāya dinnaṁ taṁ ṭhapetvā aññaṁ cetāpeti, payoge dukkaṭaṁ.

Paṭilābhena nissaggiyaṁ hoti.

Nissajjitabbaṁ saṅghassa vā gaṇassa vā ekabhikkhuniyā vā.

Evañca pana, bhikkhave, nissajjitabbaṁ.

…pe…

“idaṁ me, ayye, aññadatthikena parikkhārena aññuddisikena mahājanikena saññācikena aññaṁ cetāpitaṁ nissaggiyaṁ.

Imāhaṁ saṅghassa nissajjāmī”ti …pe…

dadeyyā”ti …pe…

dadeyyun”ti …pe…

ayyāya dammī”ti.

Aññadatthike aññadatthikasaññā aññaṁ cetāpeti, nissaggiyaṁ pācittiyaṁ.

Aññadatthike vematikā aññaṁ cetāpeti, nissaggiyaṁ pācittiyaṁ.

Aññadatthike anaññadatthikasaññā aññaṁ cetāpeti, nissaggiyaṁ pācittiyaṁ.

Nissaṭṭhaṁ paṭilabhitvā yathādāne upanetabbaṁ.

Anaññadatthike aññadatthikasaññā, āpatti dukkaṭassa.

Anaññadatthike vematikā, āpatti dukkaṭassa.

Anaññadatthike anaññadatthikasaññā anāpatti.

Anāpatti—

sesakaṁ upaneti,

sāmike apaloketvā upaneti,

āpadāsu,

ummattikāya,

ādikammikāyāti.

Navamasikkhāpadaṁ niṭṭhitaṁ.