上座部比丘尼分别（巴利原文）

Theravāda Vinaya

Bhikkhunivibhaṅga

Pācittiyakaṇḍa

Gabbhinivagga

62. Pāyantisikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena bhikkhuniyo pāyantiṁ vuṭṭhāpenti.

Sā piṇḍāya carati.

Manussā evamāhaṁsu—

“dethāyyāya bhikkhaṁ, sadutiyikā ayyā”ti.

Manussā ujjhāyanti khiyyanti vipācenti—

“kathañhi nāma bhikkhuniyo pāyantiṁ vuṭṭhāpessantī”ti.

Assosuṁ kho bhikkhuniyo tesaṁ manussānaṁ ujjhāyantānaṁ khiyyantānaṁ vipācentānaṁ.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma bhikkhuniyo pāyantiṁ vuṭṭhāpessantī”ti …pe…

“saccaṁ kira, bhikkhave, bhikkhuniyo pāyantiṁ vuṭṭhāpentī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, bhikkhuniyo pāyantiṁ vuṭṭhāpessanti.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī pāyantiṁ vuṭṭhāpeyya, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Pāyantī nāma

mātā vā hoti dhāti vā.

Vuṭṭhāpeyyāti

upasampādeyya.

“Vuṭṭhāpessāmī”ti gaṇaṁ vā ācariniṁ vā pattaṁ vā cīvaraṁ vā pariyesati, sīmaṁ vā sammannati, āpatti dukkaṭassa.

Ñattiyā dukkaṭaṁ.

Dvīhi kammavācāhi dukkaṭā.

Kammavācāpariyosāne upajjhāyāya āpatti pācittiyassa.

Gaṇassa ca ācariniyā ca āpatti dukkaṭassa.

Pāyantiyā pāyantisaññā vuṭṭhāpeti, āpatti pācittiyassa.

Pāyantiyā vematikā vuṭṭhāpeti, āpatti dukkaṭassa.

Pāyantiyā apāyantisaññā vuṭṭhāpeti, anāpatti.

Apāyantiyā pāyantisaññā, āpatti dukkaṭassa.

Apāyantiyā vematikā, āpatti dukkaṭassa.

Apāyantiyā apāyantisaññā, anāpatti.

Anāpatti—

pāyantiṁ apāyantisaññā vuṭṭhāpeti,

apāyantiṁ apāyantisaññā vuṭṭhāpeti,

ummattikāya,

ādikammikāyāti.

Dutiyasikkhāpadaṁ niṭṭhitaṁ.