上座部比丘尼分别（巴利原文）

Theravāda Vinaya

Bhikkhunivibhaṅga

Pācittiyakaṇḍa

Tuvaṭṭavagga

35. Nikkaḍḍhanasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena bhaddā kāpilānī sākete vassaṁ upagatā hoti.

Sā kenacideva karaṇīyena ubbāḷhā thullanandāya bhikkhuniyā santike dūtaṁ pāhesi—

“sace me ayyā thullanandā upassayaṁ dadeyya āgaccheyyāmahaṁ sāvatthin”ti.

Thullanandā bhikkhunī evamāha—

“āgacchatu, dassāmī”ti.

Atha kho bhaddā kāpilānī sāketā sāvatthiṁ agamāsi.

Thullanandā bhikkhunī bhaddāya kāpilāniyā upassayaṁ adāsi.

Tena kho pana samayena thullanandā bhikkhunī bahussutā hoti bhāṇikā visāradā paṭṭā dhammiṁ kathaṁ kātuṁ.

Bhaddāpi kāpilānī bahussutā hoti bhāṇikā visāradā paṭṭā dhammiṁ kathaṁ kātuṁ uḷārasambhāvitā.

Manussā—

“ayyā bhaddā kāpilānī bahussutā bhāṇikā visāradā paṭṭā dhammiṁ kathaṁ kātuṁ uḷārasambhāvitā”ti bhaddaṁ kāpilāniṁ paṭhamaṁ payirupāsitvā pacchā thullanandaṁ bhikkhuniṁ payirupāsanti.

Thullanandā bhikkhunī issāpakatā—

“imā kira appicchā santuṭṭhā pavivittā asaṁsaṭṭhā yā imā saññattibahulā viññattibahulā viharantī”ti kupitā anattamanā bhaddaṁ kāpilāniṁ upassayā nikkaḍḍhi.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma ayyā thullanandā ayyāya bhaddāya kāpilāniyā upassayaṁ datvā kupitā anattamanā nikkaḍḍhissatī”ti …pe…

“saccaṁ kira, bhikkhave, thullanandā bhikkhunī bhaddāya kāpilāniyā upassayaṁ datvā kupitā anattamanā nikkaḍḍhatī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, thullanandā bhikkhunī bhaddāya kāpilāniyā upassayaṁ datvā kupitā anattamanā nikkaḍḍhissati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī bhikkhuniyā upassayaṁ datvā kupitā anattamanā nikkaḍḍheyya vā nikkaḍḍhāpeyya vā, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Bhikkhuniyāti

aññāya bhikkhuniyā.

Upassayo nāma

kavāṭabaddho vuccati.

Datvāti

sayaṁ datvā.

Kupitā anattamanāti

anabhiraddhā āhatacittā khilajātā.

Nikkaḍḍheyyāti

gabbhe gahetvā pamukhaṁ nikkaḍḍhati, āpatti pācittiyassa.

Pamukhe gahetvā bahi nikkaḍḍhati, āpatti pācittiyassa.

Ekena payogena bahukepi dvāre atikkāmeti, āpatti pācittiyassa.

Nikkaḍḍhāpeyyāti

aññaṁ āṇāpeti, āpatti pācittiyassa.

Sakiṁ āṇattā bahukepi dvāre atikkāmeti, āpatti pācittiyassa.

Upasampannāya upasampannasaññā upassayaṁ datvā kupitā anattamanā nikkaḍḍhati vā nikkaḍḍhāpeti vā, āpatti pācittiyassa.

Upasampannāya vematikā upassayaṁ datvā kupitā anattamanā nikkaḍḍhati vā nikkaḍḍhāpeti vā, āpatti pācittiyassa.

Upasampannāya anupasampannasaññā upassayaṁ datvā kupitā anattamanā nikkaḍḍhati vā nikkaḍḍhāpeti vā, āpatti pācittiyassa.

Tassā parikkhāraṁ nikkaḍḍhati vā nikkaḍḍhāpeti vā, āpatti dukkaṭassa.

Akavāṭabaddhā nikkaḍḍhati vā nikkaḍḍhāpeti vā, āpatti dukkaṭassa.

Tassā parikkhāraṁ nikkaḍḍhati vā nikkaḍḍhāpeti vā, āpatti dukkaṭassa.

Anupasampannaṁ kavāṭabaddhā vā akavāṭabaddhā vā nikkaḍḍhati vā nikkaḍḍhāpeti vā, āpatti dukkaṭassa.

Tassā parikkhāraṁ nikkaḍḍhati vā nikkaḍḍhāpeti vā, āpatti dukkaṭassa.

Anupasampannāya upasampannasaññā, āpatti dukkaṭassa.

Anupasampannāya vematikā, āpatti dukkaṭassa.

Anupasampannāya anupasampannasaññā, āpatti dukkaṭassa.

Anāpatti—

alajjiniṁ nikkaḍḍhati vā nikkaḍḍhāpeti vā,

tassā parikkhāraṁ nikkaḍḍhati vā nikkaḍḍhāpeti vā,

ummattikaṁ nikkaḍḍhati vā nikkaḍḍhāpeti vā,

tassā parikkhāraṁ nikkaḍḍhati vā nikkaḍḍhāpeti vā,

bhaṇḍanakārikaṁ kalahakārikaṁ vivādakārikaṁ bhassakārikaṁ saṅghe adhikaraṇakārikaṁ nikkaḍḍhati vā nikkaḍḍhāpeti vā,

tassā parikkhāraṁ nikkaḍḍhati vā nikkaḍḍhāpeti vā,

antevāsiniṁ vā saddhivihāriniṁ vā na sammā vattantiṁ nikkaḍḍhati vā nikkaḍḍhāpeti vā,

tassā parikkhāraṁ nikkaḍḍhati vā nikkaḍḍhāpeti vā,

ummattikāya,

ādikammikāyāti.

Pañcamasikkhāpadaṁ niṭṭhitaṁ.