上座部比丘尼分别（巴利原文）

Theravāda Vinaya

Bhikkhunivibhaṅga

Pācittiyakaṇḍa

Naggavagga

30. Kathinuddhārasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena aññatarena upāsakena saṅghaṁ uddissa vihāro kārāpito hoti.

So tassa vihārassa mahe ubhatosaṅghassa akālacīvaraṁ dātukāmo hoti.

Tena kho pana samayena ubhatosaṅghassa kathinaṁ atthataṁ hoti.

Atha kho so upāsako saṅghaṁ upasaṅkamitvā kathinuddhāraṁ yāci.

Bhagavato etamatthaṁ ārocesuṁ.

Atha kho bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū āmantesi—

“anujānāmi, bhikkhave, kathinaṁ uddharituṁ.

Evañca pana bhikkhave kathinaṁ uddharitabbaṁ.

Byattena bhikkhunā paṭibalena saṅgho ñāpetabbo—

‘Suṇātu me, bhante, saṅgho.

Yadi saṅghassa pattakallaṁ, saṅgho kathinaṁ uddhareyya.

Esā ñatti.

Suṇātu me, bhante, saṅgho.

Saṅgho kathinaṁ uddharati.

Yassāyasmato khamati kathinassa uddhāro, so tuṇhassa;

yassa nakkhamati, so bhāseyya.

Ubbhataṁ saṅghena kathinaṁ, khamati saṅghassa, tasmā tuṇhī, evametaṁ dhārayāmī’”ti.

Atha kho so upāsako bhikkhunisaṅghaṁ upasaṅkamitvā kathinuddhāraṁ yāci.

Thullanandā bhikkhunī—

“cīvaraṁ amhākaṁ bhavissatī”ti kathinuddhāraṁ paṭibāhi.

Atha kho so upāsako ujjhāyati khiyyati vipāceti—

“kathañhi nāma bhikkhuniyo amhākaṁ kathinuddhāraṁ na dassantī”ti.

Assosuṁ kho bhikkhuniyo tassa upāsakassa ujjhāyantassa khiyyantassa vipācentassa.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma ayyā thullanandā dhammikaṁ kathinuddhāraṁ paṭibāhissatī”ti …pe…

“saccaṁ kira, bhikkhave, thullanandā bhikkhunī dhammikaṁ kathinuddhāraṁ paṭibāhatī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, thullanandā bhikkhunī dhammikaṁ kathinuddhāraṁ paṭibāhissati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī dhammikaṁ kathinuddhāraṁ paṭibāheyya, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Dhammiko nāma kathinuddhāro

samaggo bhikkhunisaṅgho sannipatitvā uddharati.

Paṭibāheyyāti

“kathaṁ idaṁ kathinaṁ na uddhareyyā”ti paṭibāhati, āpatti pācittiyassa.

Dhammike dhammikasaññā paṭibāhati, āpatti pācittiyassa.

Dhammike vematikā paṭibāhati, āpatti dukkaṭassa.

Dhammike adhammikasaññā paṭibāhati, anāpatti.

Adhammike dhammikasaññā, āpatti dukkaṭassa.

Adhammike vematikā, āpatti dukkaṭassa.

Adhammike adhammikasaññā, anāpatti.

Anāpatti—

ānisaṁsaṁ dassetvā paṭibāhati,

ummattikāya,

ādikammikāyāti.

Dasamasikkhāpadaṁ niṭṭhitaṁ.

Naggavaggo tatiyo.