上座部比丘尼分别（巴利原文）

Theravāda Vinaya

Bhikkhunivibhaṅga

Nissaggiyakaṇḍa

Pattavagga

5. Aññacetāpanasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena thullanandā bhikkhunī gilānā hoti.

Atha kho aññataro upāsako yena thullanandā bhikkhunī tenupasaṅkami; upasaṅkamitvā thullanandaṁ bhikkhuniṁ etadavoca—

“kacci, ayye, khamanīyaṁ kacci yāpanīyan”ti?

“Na me, āvuso, khamanīyaṁ, na yāpanīyan”ti.

“Amukassa, ayye, āpaṇikassa ghare kahāpaṇaṁ nikkhipissāmi, tato yaṁ iccheyyāsi taṁ āharāpeyyāsī”ti.

Thullanandā bhikkhunī aññataraṁ sikkhamānaṁ āṇāpesi—

“gaccha, sikkhamāne, amukassa āpaṇikassa gharā kahāpaṇassa telaṁ āharā”ti.

Atha kho sā sikkhamānā tassa āpaṇikassa gharā kahāpaṇassa telaṁ āharitvā thullanandāya bhikkhuniyā adāsi.

Thullanandā bhikkhunī evamāha—

“na me, sikkhamāne, telena attho, sappinā me attho”ti.

Atha kho sā sikkhamānā yena so āpaṇiko tenupasaṅkami; upasaṅkamitvā taṁ āpaṇikaṁ etadavoca—

“na kira, āvuso, ayyāya telena attho, sappinā attho, handa te telaṁ, sappiṁ me dehī”ti.

“Sace mayaṁ, ayye, vikkītaṁ bhaṇḍaṁ puna ādiyissāma, kadā amhākaṁ bhaṇḍaṁ vikkāyissati.

Telassa kayena telaṁ haṭaṁ, sappissa kayaṁ āhara, sappiṁ harissasī”ti.

Atha kho sā sikkhamānā rodantī aṭṭhāsi.

Bhikkhuniyo taṁ sikkhamānaṁ etadavocuṁ—

“kissa tvaṁ, sikkhamāne, rodasī”ti?

Atha kho sā sikkhamānā bhikkhunīnaṁ etamatthaṁ ārocesi.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma ayyā thullanandā aññaṁ cetāpetvā aññaṁ cetāpessatī”ti …pe…

“saccaṁ kira, bhikkhave, thullanandā bhikkhunī aññaṁ cetāpetvā aññaṁ cetāpetī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, thullanandā bhikkhunī aññaṁ cetāpetvā aññaṁ cetāpessati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī aññaṁ cetāpetvā aññaṁ cetāpeyya, nissaggiyaṁ pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Aññaṁ cetāpetvāti

yaṁ kiñci cetāpetvā.

Aññaṁ cetāpeyyāti

taṁ ṭhapetvā aññaṁ cetāpeti, payoge dukkaṭaṁ.

Paṭilābhena nissaggiyaṁ hoti.

Nissajjitabbaṁ saṅghassa vā gaṇassa vā ekabhikkhuniyā vā.

Evañca pana, bhikkhave, nissajjitabbaṁ.

…pe…

“idaṁ me, ayye, aññaṁ cetāpetvā aññaṁ cetāpitaṁ nissaggiyaṁ, imāhaṁ saṅghassa nissajjāmī”ti …pe…

dadeyyāti …pe…

dadeyyunti …pe…

ayyāya dammīti.

Aññe aññasaññā aññaṁ cetāpeti, nissaggiyaṁ pācittiyaṁ.

Aññe vematikā aññaṁ cetāpeti, nissaggiyaṁ pācittiyaṁ.

Aññe anaññasaññā aññaṁ cetāpeti, nissaggiyaṁ pācittiyaṁ.

Anaññe aññasaññā anaññaṁ cetāpeti, āpatti dukkaṭassa.

Anaññe vematikā anaññaṁ cetāpeti, āpatti dukkaṭassa.

Anaññe anaññasaññā anāpatti.

Anāpatti—

taññeva cetāpeti, aññañca cetāpeti,

ānisaṁsaṁ dassetvā cetāpeti,

ummattikāya,

ādikammikāyāti.

Pañcamasikkhāpadaṁ niṭṭhitaṁ.