上座部比丘尼分别（巴利原文）

Theravāda Vinaya

Bhikkhunivibhaṅga

Pācittiyakaṇḍa

Naggavagga

27. Paṭibāhanasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena bhikkhunisaṅghassa akālacīvaraṁ uppannaṁ hoti.

Atha kho bhikkhunisaṅgho taṁ cīvaraṁ bhājetukāmo sannipati.

Tena kho pana samayena thullanandāya bhikkhuniyā antevāsiniyo bhikkhuniyo pakkantā honti.

Thullanandā bhikkhunī tā bhikkhuniyo etadavoca—

“ayye, bhikkhuniyo pakkantā, na tāva cīvaraṁ bhājīyissatī”ti.

Cīvaravibhaṅgaṁ paṭibāhi.

Bhikkhuniyo na tāva cīvaraṁ bhājīyissatīti pakkamiṁsu.

Thullanandā bhikkhunī antevāsinīsu bhikkhunīsu āgatāsu taṁ cīvaraṁ bhājāpesi.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma ayyā thullanandā dhammikaṁ cīvaravibhaṅgaṁ paṭibāhissatī”ti …pe…

“saccaṁ kira, bhikkhave, thullanandā bhikkhunī dhammikaṁ cīvaravibhaṅgaṁ paṭibāhatī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, thullanandā bhikkhunī dhammikaṁ cīvaravibhaṅgaṁ paṭibāhissati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī dhammikaṁ cīvaravibhaṅgaṁ paṭibāheyya, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Dhammiko nāma cīvaravibhaṅgo

samaggo bhikkhunisaṅgho sannipatitvā bhājeti.

Paṭibāheyyāti

kathaṁ imaṁ cīvaraṁ na bhājeyyāti paṭibāhati, āpatti pācittiyassa.

Dhammike dhammikasaññā paṭibāhati, āpatti pācittiyassa.

Dhammike vematikā paṭibāhati, āpatti dukkaṭassa.

Dhammike adhammikasaññā paṭibāhati, anāpatti.

Adhammike dhammikasaññā, āpatti dukkaṭassa.

Adhammike vematikā, āpatti dukkaṭassa.

Adhammike adhammikasaññā, anāpatti.

Anāpatti—

ānisaṁsaṁ dassetvā paṭibāhati,

ummattikāya,

ādikammikāyāti.

Sattamasikkhāpadaṁ niṭṭhitaṁ.