上座部比丘尼分别（巴利原文）

Theravāda Vinaya

Bhikkhunivibhaṅga

Pācittiyakaṇḍa

Lasuṇavagga

4. Jatumaṭṭhakasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena aññatarā purāṇarājorodhā bhikkhunīsu pabbajitā hoti.

Aññatarā bhikkhunī anabhiratiyā pīḷitā yena sā bhikkhunī tenupasaṅkami; upasaṅkamitvā taṁ bhikkhuniṁ etadavoca—

“rājā kho, ayye, tumhe cirāciraṁ gacchati.

Kathaṁ tumhe dhārethā”ti?

“Jatumaṭṭhakena, ayye”ti.

“Kiṁ etaṁ, ayye, jatumaṭṭhakan”ti?

Atha kho sā bhikkhunī tassā bhikkhuniyā jatumaṭṭhakaṁ ācikkhi.

Atha kho sā bhikkhunī jatumaṭṭhakaṁ ādiyitvā dhovituṁ vissaritvā ekamantaṁ chaḍḍesi.

Bhikkhuniyo makkhikāhi samparikiṇṇaṁ passitvā evamāhaṁsu—

“kassidaṁ kamman”ti?

Sā evamāha— “mayhidaṁ kamman”ti.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma bhikkhunī jatumaṭṭhakaṁ ādiyissatī”ti …pe…

“saccaṁ kira, bhikkhave, bhikkhunī jatumaṭṭhakaṁ ādiyatī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, bhikkhunī jatumaṭṭhakaṁ ādiyissati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Jatumaṭṭhake pācittiyan”ti.

Jatumaṭṭhakaṁ nāma

jatumayaṁ kaṭṭhamayaṁ piṭṭhamayaṁ mattikāmayaṁ.

Ādiyeyyāti

samphassaṁ sādiyantī antamaso uppalapattampi muttakaraṇaṁ paveseti, āpatti pācittiyassa.

Anāpatti—

ābādhapaccayā,

ummattikāya,

ādikammikāyāti.

Catutthasikkhāpadaṁ niṭṭhitaṁ.