上座部比丘尼分别（巴利原文）

Theravāda Vinaya

Bhikkhunivibhaṅga

Pācittiyakaṇḍa

Rattandhakāravagga

20. Rodanasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena caṇḍakāḷī bhikkhunī bhikkhunīhi saddhiṁ bhaṇḍitvā attānaṁ vadhitvā vadhitvā rodati.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma ayyā caṇḍakāḷī attānaṁ vadhitvā vadhitvā rodissatī”ti …pe…

“saccaṁ kira, bhikkhave, caṇḍakāḷī bhikkhunī attānaṁ vadhitvā vadhitvā rodatī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, caṇḍakāḷī bhikkhunī attānaṁ vadhitvā vadhitvā rodissati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī attānaṁ vadhitvā vadhitvā rodeyya, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Attānanti

paccattaṁ.

Vadhitvā vadhitvā rodati, āpatti pācittiyassa.

Vadhati na rodati, āpatti dukkaṭassa.

Rodati na vadhati, āpatti dukkaṭassa.

Anāpatti—

ñātibyasanena vā bhogabyasanena vā rogabyasanena vā phuṭṭhā rodati na vadhati,

ummattikāya,

ādikammikāyāti.

Dasamasikkhāpadaṁ niṭṭhitaṁ.

Andhakāravaggo dutiyo.