上座部比丘尼分别（巴利原文）

Theravāda Vinaya

Bhikkhunivibhaṅga

Pāṭidesanīyakaṇḍa

1. Sappiviññāpanasikkhāpada

Ime kho panāyyāyo aṭṭha pāṭidesanīyā dhammā uddesaṁ āgacchanti.

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena chabbaggiyā bhikkhuniyo sappiṁ viññāpetvā bhuñjanti.

Manussā ujjhāyanti khiyyanti vipācenti—

“kathañhi nāma bhikkhuniyo sappiṁ viññāpetvā bhuñjissanti.

Kassa sampannaṁ na manāpaṁ, kassa sāduṁ na ruccatī”ti.

Assosuṁ kho bhikkhuniyo tesaṁ manussānaṁ ujjhāyantānaṁ khiyyantānaṁ vipācentānaṁ.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma chabbaggiyā bhikkhuniyo sappiṁ viññāpetvā bhuñjissantī”ti …pe…

“saccaṁ kira, bhikkhave, chabbaggiyā, bhikkhuniyo sappiṁ viññāpetvā bhuñjantī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, chabbaggiyā bhikkhuniyo sappiṁ viññāpetvā bhuñjissanti.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī sappiṁ viññāpetvā bhuñjeyya, paṭidesetabbaṁ tāya bhikkhuniyā—

‘gārayhaṁ, ayye, dhammaṁ āpajjiṁ asappāyaṁ pāṭidesanīyaṁ, taṁ paṭidesemī’”ti.

Evañcidaṁ bhagavatā bhikkhunīnaṁ sikkhāpadaṁ paññattaṁ hoti.

Tena kho pana samayena bhikkhuniyo gilānā honti.

Gilānapucchikā bhikkhuniyo gilānā bhikkhuniyo etadavocuṁ—

“kacci, ayye, khamanīyaṁ, kacci yāpanīyan”ti?

“Pubbe mayaṁ, ayye, sappiṁ viññāpetvā bhuñjāma, tena no phāsu hoti;

idāni pana ‘bhagavatā paṭikkhittan’ti kukkuccāyantā na viññāpema, tena no na phāsu hotī”ti …pe…

bhagavato etamatthaṁ ārocesuṁ …pe…

anujānāmi, bhikkhave, gilānāya bhikkhuniyā sappiṁ viññāpetvā bhuñjituṁ.

Evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī agilānā sappiṁ viññāpetvā bhuñjeyya, paṭidesetabbaṁ tāya bhikkhuniyā—

‘gārayhaṁ, ayye, dhammaṁ āpajjiṁ asappāyaṁ pāṭidesanīyaṁ taṁ paṭidesemī’”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Agilānā nāma

yassā vinā sappinā phāsu hoti.

Gilānā nāma

yassā vinā sappinā na phāsu hoti.

Sappi nāma

gosappi vā ajikāsappi vā mahiṁsasappi vā. Yesaṁ maṁsaṁ kappati tesaṁ sappi.

Agilānā attano atthāya viññāpeti, payoge dukkaṭaṁ.

Paṭilābhena “bhuñjissāmī”ti paṭiggaṇhāti, āpatti dukkaṭassa.

Ajjhohāre ajjhohāre āpatti pāṭidesanīyassa.

Agilānā agilānasaññā sappiṁ viññāpetvā bhuñjati, āpatti pāṭidesanīyassa.

Agilānā vematikā sappiṁ viññāpetvā bhuñjati, āpatti pāṭidesanīyassa.

Agilānā gilānasaññā sappiṁ viññāpetvā bhuñjati, āpatti pāṭidesanīyassa.

Gilānā agilānasaññā, āpatti dukkaṭassa.

Gilānā vematikā, āpatti dukkaṭassa.

Gilānā gilānasaññā, anāpatti.

Anāpatti—

gilānāya,

gilānā hutvā viññāpetvā agilānā bhuñjati,

gilānāya sesakaṁ bhuñjati,

ñātakānaṁ,

pavāritānaṁ,

aññassatthāya,

attano dhanena,

ummattikāya,

ādikammikāyāti.

Paṭhamapāṭidesanīyasikkhāpadaṁ niṭṭhitaṁ.