上座部比丘尼分别（巴利原文）

Theravāda Vinaya

Bhikkhunivibhaṅga

Pācittiyakaṇḍa

Lasuṇavagga

1. Lasuṇasikkhāpada

Ime kho panāyyāyo chasaṭṭhisatā pācittiyā dhammā uddesaṁ āgacchanti.

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena aññatarena upāsakena bhikkhunisaṅgho lasuṇena pavārito hoti—

“yāsaṁ ayyānaṁ lasuṇena attho, ahaṁ lasuṇenā”ti.

Khettapālo ca āṇatto hoti—

“sace bhikkhuniyo āgacchanti, ekamekāya bhikkhuniyā dvetayo bhaṇḍike dehī”ti.

Tena kho pana samayena sāvatthiyaṁ ussavo hoti.

Yathābhataṁ lasuṇaṁ parikkhayaṁ agamāsi.

Bhikkhuniyo taṁ upāsakaṁ upasaṅkamitvā etadavocuṁ—

“lasuṇena, āvuso, attho”ti.

“Natthāyye.

Yathābhataṁ lasuṇaṁ parikkhīṇaṁ.

Khettaṁ gacchathā”ti.

Thullanandā bhikkhunī khettaṁ gantvā na mattaṁ jānitvā bahuṁ lasuṇaṁ harāpesi.

Khettapālo ujjhāyati khiyyati vipāceti—

“kathañhi nāma bhikkhuniyo na mattaṁ jānitvā bahuṁ lasuṇaṁ harāpessantī”ti.

Assosuṁ kho bhikkhuniyo tassa khettapālassa ujjhāyantassa khiyyantassa vipācentassa.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma ayyā thullanandā na mattaṁ jānitvā bahuṁ lasuṇaṁ harāpessatī”ti …pe…

“saccaṁ kira, bhikkhave, thullanandā bhikkhunī na mattaṁ jānitvā bahuṁ lasuṇaṁ harāpetī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, thullanandā bhikkhunī na mattaṁ jānitvā bahuṁ lasuṇaṁ harāpessati.

Netaṁ, bhikkhave, appasannānaṁ vā pasādāya …pe…

dhammiṁ kathaṁ katvā bhikkhū āmantesi—

“Bhūtapubbaṁ, bhikkhave, thullanandā bhikkhunī aññatarassa brāhmaṇassa pajāpati ahosi.

Tisso ca dhītaro—

nandā, nandavatī, sundarīnandā.

Atha kho, bhikkhave, so brāhmaṇo kālaṁ katvā aññataraṁ haṁsayoniṁ upapajji.

Tassa sabbasovaṇṇamayā pattā ahesuṁ.

So tāsaṁ ekekaṁ pattaṁ deti.

Atha kho, bhikkhave, thullanandā bhikkhunī ‘ayaṁ haṁso amhākaṁ ekekaṁ pattaṁ detī’ti taṁ haṁsarājaṁ gahetvā nippattaṁ akāsi.

Tassa puna jāyamānā pattā setā sampajjiṁsu.

Tadāpi, bhikkhave, thullanandā bhikkhunī atilobhena suvaṇṇā parihīnā.

Idāni lasuṇā parihāyissatīti.

Yaṁ laddhaṁ tena tuṭṭhabbaṁ,

Atilobho hi pāpako;

Haṁsarājaṁ gahetvāna,

Suvaṇṇā parihāyathā”ti.

Atha kho bhagavā thullanandaṁ bhikkhuniṁ anekapariyāyena vigarahitvā dubbharatāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī lasuṇaṁ khādeyya pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Lasuṇaṁ nāma

māgadhakaṁ vuccati.

“Khādissāmīti paṭiggaṇhā”ti, āpatti dukkaṭassa.

Ajjhohāre ajjhohāre āpatti pācittiyassa.

Lasuṇe lasuṇasaññā khādati, āpatti pācittiyassa.

Lasuṇe vematikā khādati, āpatti pācittiyassa.

Lasuṇe alasuṇasaññā khādati, āpatti pācittiyassa.

Alasuṇe lasuṇasaññā khādati, āpatti dukkaṭassa.

Alasuṇe vematikā khādati, āpatti dukkaṭassa.

Alasuṇe alasuṇasaññā khādati, anāpatti.

Anāpatti—

palaṇḍuke,

bhañjanake,

harītake,

cāpalasuṇe,

sūpasampāke,

maṁsasampāke,

telasampāke,

sāḷave,

uttaribhaṅge,

ummattikāya,

ādikammikāyāti.

Lasuṇasikkhāpadaṁ paṭhamaṁ niṭṭhitaṁ.