上座部比丘尼分别（巴利原文）

Theravāda Vinaya

Bhikkhunivibhaṅga

Pācittiyakaṇḍa

Cittāgāravagga

48. Āvasathavihārasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena thullanandā bhikkhunī āvasathaṁ anissajjitvā cārikaṁ pakkāmi.

Tena kho pana samayena thullanandāya bhikkhuniyā āvasatho ḍayhati.

Bhikkhuniyo evamāhaṁsu—

“handāyye, bhaṇḍakaṁ nīharāmā”ti.

Ekaccā evamāhaṁsu—

“na mayaṁ, ayye, nīharissāma.

Yaṁ kiñci naṭṭhaṁ sabbaṁ amhe abhiyuñjissatī”ti.

Thullanandā bhikkhunī punadeva taṁ āvasathaṁ paccāgantvā bhikkhuniyo pucchi—

“apāyye, bhaṇḍakaṁ nīharitthā”ti?

“Na mayaṁ, ayye, nīharimhā”ti.

Thullanandā bhikkhunī ujjhāyati khiyyati vipāceti—

“kathañhi nāma bhikkhuniyo āvasathe ḍayhamāne bhaṇḍakaṁ na nīharissantī”ti.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma ayyā thullanandā āvasathaṁ anissajjitvā cārikaṁ pakkamissatī”ti …pe…

“saccaṁ kira, bhikkhave, thullanandā bhikkhunī āvasathaṁ anissajjitvā cārikaṁ pakkamatī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, thullanandā bhikkhunī āvasathaṁ anissajjitvā cārikaṁ pakkamissati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī āvasathaṁ anissajjitvā cārikaṁ pakkameyya, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Āvasatho nāma

kavāṭabaddho vuccati.

Anissajjitvā cārikaṁ pakkameyyāti

bhikkhuniyā vā sikkhamānāya vā sāmaṇeriyā vā anissajjitvā parikkhittassa āvasathassa parikkhepaṁ atikkāmentiyā āpatti pācittiyassa.

Aparikkhittassa āvasathassa upacāraṁ atikkāmentiyā āpatti pācittiyassa.

Anissajjite anissajjitasaññā pakkamati, āpatti pācittiyassa.

Anissajjite vematikā pakkamati, āpatti pācittiyassa.

Anissajjite nissajjitasaññā pakkamati, āpatti pācittiyassa.

Akavāṭabaddhaṁ anissajjitvā pakkamati, āpatti dukkaṭassa.

Nissajjite anissajjitasaññā, āpatti dukkaṭassa.

Nissajjite vematikā, āpatti dukkaṭassa.

Nissajjite nissajjitasaññā, anāpatti.

Anāpatti—

nissajjitvā pakkamati,

sati antarāye,

pariyesitvā na labhati,

gilānāya,

āpadāsu,

ummattikāya,

ādikammikāyāti.

Aṭṭhamasikkhāpadaṁ niṭṭhitaṁ.