上座部比丘尼分别（巴利原文）

Theravāda Vinaya

Bhikkhunivibhaṅga

Pācittiyakaṇḍa

Rattandhakāravagga

15. Anāpucchāpakkamanasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena aññatarā bhikkhunī aññatarassa kulassa kulūpikā hoti niccabhattikā.

Atha kho sā bhikkhunī pubbaṇhasamayaṁ nivāsetvā pattacīvaramādāya yena taṁ kulaṁ tenupasaṅkami; upasaṅkamitvā āsane nisīditvā sāmike anāpucchā pakkāmi.

Tassa kulassa dāsī gharaṁ sammajjantī taṁ āsanaṁ bhājanantarikāya pakkhipi.

Manussā taṁ āsanaṁ apassantā taṁ bhikkhuniṁ etadavocuṁ—

“kahaṁ taṁ, ayye, āsanan”ti?

“Nāhaṁ taṁ, āvuso, āsanaṁ passāmī”ti.

“Dethāyye, taṁ āsanan”ti paribhāsitvā niccabhattaṁ pacchindiṁsu.

Atha kho te manussā gharaṁ sodhentā taṁ āsanaṁ bhājanantarikāya passitvā taṁ bhikkhuniṁ khamāpetvā niccabhattaṁ paṭṭhapesuṁ.

Atha kho sā bhikkhunī bhikkhunīnaṁ etamatthaṁ ārocesi.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma bhikkhunī purebhattaṁ kulāni upasaṅkamitvā āsane nisīditvā sāmike anāpucchā pakkamissatī”ti …pe…

“saccaṁ kira, bhikkhave, bhikkhunī purebhattaṁ kulāni upasaṅkamitvā āsane nisīditvā sāmike anāpucchā pakkamatī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave bhikkhunī purebhattaṁ kulāni upasaṅkamitvā āsane nisīditvā sāmike anāpucchā pakkamissati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī purebhattaṁ kulāni upasaṅkamitvā āsane nisīditvā sāmike anāpucchā pakkameyya, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Purebhattaṁ nāma

aruṇuggamanaṁ upādāya yāva majjhanhikā.

Kulaṁ nāma

cattāri kulāni— khattiyakulaṁ, brāhmaṇakulaṁ, vessakulaṁ, suddakulaṁ.

Upasaṅkamitvāti

tattha gantvā.

Āsanaṁ nāma

pallaṅkassa okāso vuccati.

Nisīditvāti

tasmiṁ nisīditvā.

Sāmike anāpucchā pakkameyyāti

yo tasmiṁ kule manusso viññū taṁ anāpucchā anovassakaṁ atikkāmentiyā āpatti pācittiyassa.

Ajjhokāse upacāraṁ atikkāmentiyā āpatti pācittiyassa.

Anāpucchite anāpucchitasaññā pakkamati, āpatti pācittiyassa.

Anāpucchite vematikā pakkamati, āpatti pācittiyassa.

Anāpucchite āpucchitasaññā pakkamati, āpatti pācittiyassa.

Pallaṅkassa anokāse āpatti dukkaṭassa.

Āpucchite anāpucchitasaññā, āpatti dukkaṭassa.

Āpucchite vematikā, āpatti dukkaṭassa.

Āpucchite āpucchitasaññā, anāpatti.

Anāpatti—

āpucchā gacchati,

asaṁhārime,

gilānāya,

āpadāsu,

ummattikāya,

ādikammikāyāti.

Pañcamasikkhāpadaṁ niṭṭhitaṁ.