上座部比丘尼分别（巴利原文）

Theravāda Vinaya

Bhikkhunivibhaṅga

Pācittiyakaṇḍa

Kumāribhūtavagga

78. Dutiyasikkhamāna-navuṭṭhāpanasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena aññatarā sikkhamānā thullanandaṁ bhikkhuniṁ upasaṅkamitvā upasampadaṁ yāci.

Thullanandā bhikkhunī taṁ sikkhamānaṁ “sace maṁ tvaṁ, ayye, dve vassāni anubandhissasi evāhaṁ taṁ vuṭṭhāpessāmī”ti vatvā, neva vuṭṭhāpeti na vuṭṭhāpanāya ussukkaṁ karoti.

Atha kho sā sikkhamānā bhikkhunīnaṁ etamatthaṁ ārocesi.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma ayyā thullanandā sikkhamānaṁ—

‘sace maṁ tvaṁ, ayye, dve vassāni anubandhissasi evāhaṁ taṁ vuṭṭhāpessāmī’ti vatvā, neva vuṭṭhāpessati na vuṭṭhāpanāya ussukkaṁ karissatī”ti …pe…

“saccaṁ kira, bhikkhave, thullanandā bhikkhunī sikkhamānaṁ—

‘sace maṁ tvaṁ, ayye, dve vassāni anubandhissasi evāhaṁ taṁ vuṭṭhāpessāmī’ti vatvā, neva vuṭṭhāpeti na vuṭṭhāpanāya ussukkaṁ karotī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, thullanandā bhikkhunī sikkhamānaṁ—

‘sace maṁ tvaṁ, ayye, dve vassāni anubandhissasi evāhaṁ taṁ vuṭṭhāpessāmī’ti vatvā, neva vuṭṭhāpessati na vuṭṭhāpanāya ussukkaṁ karissati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī sikkhamānaṁ— ‘sace maṁ tvaṁ, ayye, dve vassāni anubandhissasi evāhaṁ taṁ vuṭṭhāpessāmī’ti vatvā, sā pacchā anantarāyikinī neva vuṭṭhāpeyya na vuṭṭhāpanāya ussukkaṁ kareyya, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Sikkhamānā nāma

dve vassāni chasu dhammesu sikkhitasikkhā.

Sace maṁ tvaṁ, ayye, dve vassāni anubandhissasīti

dve saṁvaccharāni upaṭṭhahissasi.

Evāhaṁ taṁ vuṭṭhāpessāmīti

evāhaṁ taṁ upasampādessāmi.

Sā pacchā anantarāyikinīti

asati antarāye.

Neva vuṭṭhāpeyyāti

na sayaṁ vuṭṭhāpeyya.

Na vuṭṭhāpanāya ussukkaṁ kareyyāti

na aññaṁ āṇāpeyya.

“Neva vuṭṭhāpessāmi na vuṭṭhāpanāya ussukkaṁ karissāmī”ti dhuraṁ nikkhittamatte āpatti pācittiyassa.

Anāpatti—

sati antarāye,

pariyesitvā na labhati,

gilānāya,

āpadāsu,

ummattikāya,

ādikammikāyāti.

Aṭṭhamasikkhāpadaṁ niṭṭhitaṁ.