上座部比丘尼分别（巴利原文）

Theravāda Vinaya

Bhikkhunivibhaṅga

Pācittiyakaṇḍa

Naggavagga

29. Kālaatikkamanasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena thullanandāya bhikkhuniyā upaṭṭhākakulaṁ thullanandaṁ bhikkhuniṁ etadavoca—

“sace mayaṁ, ayye, sakkoma, bhikkhunisaṅghassa cīvaraṁ dassāmā”ti.

Tena kho pana samayena vassaṁvuṭṭhā bhikkhuniyo cīvaraṁ bhājetukāmā sannipatiṁsu.

Thullanandā bhikkhunī tā bhikkhuniyo etadavoca—

“āgametha, ayye, atthi bhikkhunisaṅghassa cīvarapaccāsā”ti.

Bhikkhuniyo thullanandaṁ bhikkhuniṁ etadavocuṁ—

“gacchāyye, taṁ cīvaraṁ jānāhī”ti.

Thullanandā bhikkhunī yena taṁ kulaṁ tenupasaṅkami; upasaṅkamitvā te manusse etadavoca—

“dethāvuso, bhikkhunisaṅghassa cīvaran”ti.

“Na mayaṁ, ayye, sakkoma bhikkhunisaṅghassa cīvaraṁ dātun”ti.

Thullanandā bhikkhunī bhikkhunīnaṁ etamatthaṁ ārocesi.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma ayyā thullanandā dubbalacīvarapaccāsāya cīvarakālasamayaṁ atikkāmessatī”ti …pe…

“saccaṁ kira, bhikkhave, thullanandā bhikkhunī dubbalacīvarapaccāsāya cīvarakālasamayaṁ atikkāmetī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, thullanandā bhikkhunī dubbalacīvarapaccāsāya cīvarakālasamayaṁ atikkāmessati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī dubbalacīvarapaccāsāya cīvarakālasamayaṁ atikkāmeyya, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Dubbalacīvarapaccāsā nāma

“sace mayaṁ sakkoma, dassāma karissāmā”ti vācā bhinnā hoti.

Cīvarakālasamayo nāma

anatthate kathine vassānassa pacchimo māso, atthate kathine pañca māsā.

Cīvarakālasamayaṁ atikkāmeyyāti

anatthate kathine vassānassa pacchimaṁ divasaṁ atikkāmeti, āpatti pācittiyassa.

Atthate kathine kathinuddhāradivasaṁ atikkāmeti, āpatti pācittiyassa.

Dubbalacīvare dubbalacīvarasaññā cīvarakālasamayaṁ atikkāmeti, āpatti pācittiyassa.

Dubbalacīvare vematikā cīvarakālasamayaṁ atikkāmeti, āpatti dukkaṭassa.

Dubbalacīvare adubbalacīvarasaññā cīvarakālasamayaṁ atikkāmeti, anāpatti.

Adubbalacīvare dubbalacīvarasaññā, āpatti dukkaṭassa.

Adubbalacīvare vematikā, āpatti dukkaṭassa.

Adubbalacīvare adubbalacīvarasaññā, anāpatti.

Anāpatti—

ānisaṁsaṁ dassetvā nivāreti,

ummattikāya,

ādikammikāyāti.

Navamasikkhāpadaṁ niṭṭhitaṁ.