上座部比丘尼分别（巴利原文）

Theravāda Vinaya

Bhikkhunivibhaṅga

Saṅghādisesakaṇḍa

10. Sikkhaṁpaccācikkhaṇasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena caṇḍakāḷī bhikkhunī bhikkhunīhi saddhiṁ bhaṇḍitvā kupitā anattamanā evaṁ vadeti—

“buddhaṁ paccācikkhāmi, dhammaṁ paccācikkhāmi, saṅghaṁ paccācikkhāmi, sikkhaṁ paccācikkhāmi.

Kinnumāva samaṇiyo yā samaṇiyo sakyadhītaro, santaññāpi samaṇiyo lajjiniyo kukkuccikā sikkhākāmā tāsāhaṁ santike brahmacariyaṁ carissāmī”ti.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma ayyā caṇḍakāḷī kupitā anattamanā evaṁ vakkhati—

‘buddhaṁ paccācikkhāmi …pe… sikkhaṁ paccācikkhāmi.

Kinnumāva samaṇiyo yā samaṇiyo sakyadhītaro, santaññāpi samaṇiyo lajjiniyo kukkuccikā sikkhākāmā tāsāhaṁ santike brahmacariyaṁ carissāmī’”ti …pe…

“saccaṁ kira, bhikkhave, caṇḍakāḷī bhikkhunī kupitā anattamanā evaṁ vadeti—

‘buddhaṁ paccācikkhāmi …pe… sikkhaṁ paccācikkhāmi.

Kinnumāva samaṇiyo yā samaṇiyo sakyadhītaro, santaññāpi samaṇiyo lajjiniyo kukkuccikā sikkhākāmā, tāsāhaṁ santike brahmacariyaṁ carissāmī’”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, caṇḍakāḷī bhikkhunī kupitā anattamanā evaṁ vakkhati—

‘buddhaṁ paccācikkhāmi …pe… sikkhaṁ paccācikkhāmi.

Kinnumāva samaṇiyo yā samaṇiyo sakyadhītaro, santaññāpi samaṇiyo lajjiniyo kukkuccikā sikkhākāmā, tāsāhaṁ santike brahmacariyaṁ carissāmī’ti.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī kupitā anattamanā evaṁ vadeyya—

‘buddhaṁ paccācikkhāmi, dhammaṁ paccācikkhāmi, saṅghaṁ paccācikkhāmi, sikkhaṁ paccācikkhāmi. Kinnumāva samaṇiyo yā samaṇiyo sakyadhītaro. Santaññāpi samaṇiyo lajjiniyo kukkuccikā sikkhākāmā, tāsāhaṁ santike brahmacariyaṁ carissāmī’ti,

sā bhikkhunī bhikkhunīhi evamassa vacanīyā—

‘māyye, kupitā anattamanā evaṁ avaca— buddhaṁ paccācikkhāmi, dhammaṁ paccācikkhāmi, saṅghaṁ paccācikkhāmi, sikkhaṁ paccācikkhāmi. Kinnumāva samaṇiyo yā samaṇiyo sakyadhītaro. Santaññāpi samaṇiyo lajjiniyo kukkuccikā sikkhākāmā, tāsāhaṁ santike brahmacariyaṁ carissāmīti, abhiramāyye, svākkhāto dhammo; cara brahmacariyaṁ sammā dukkhassa antakiriyāyā’ti.

Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṁ samanubhāsitabbā tassa paṭinissaggāya.

Yāvatatiyañce samanubhāsīyamānā taṁ paṭinissajjeyya iccetaṁ kusalaṁ;

no ce paṭinissajjeyya, ayampi bhikkhunī yāvatatiyakaṁ dhammaṁ āpannā nissāraṇīyaṁ saṅghādisesan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Kupitā anattamanāti

anabhiraddhā āhatacittā khilajātā.

Evaṁ vadeyyāti—

“buddhaṁ paccācikkhāmi …pe… sikkhaṁ paccācikkhāmi. Kinnumāva samaṇiyo yā samaṇiyo sakyadhītaro. Santaññāpi samaṇiyo lajjiniyo kukkuccikā sikkhākāmā, tāsāhaṁ santike brahmacariyaṁ carissāmī”ti.

Sā bhikkhunīti

yā sā evaṁvādinī bhikkhunī.

Bhikkhunīhīti

aññāhi bhikkhunīhi. Yā passanti yā suṇanti tāhi vattabbā—

“māyye, kupitā anattamanā evaṁ avaca—

‘buddhaṁ paccācikkhāmi …pe… sikkhaṁ paccācikkhāmi.

Kinnumāva samaṇiyo yā samaṇiyo sakyadhītaro.

Santaññāpi samaṇiyo lajjiniyo kukkuccikā sikkhākāmā, tāsāhaṁ santike brahmacariyaṁ carissāmī’ti.

Abhiramāyye, svākkhāto dhammo;

cara brahmacariyaṁ sammā dukkhassa antakiriyāyā”ti.

Dutiyampi vattabbā.

Tatiyampi vattabbā.

Sace paṭinissajjati iccetaṁ kusalaṁ,

no ce paṭinissajjati āpatti dukkaṭassa.

Sutvā na vadanti, āpatti dukkaṭassa.

Sā bhikkhunī saṅghamajjhampi ākaḍḍhitvā vattabbā—

“māyye, kupitā anattamanā evaṁ avaca—

‘buddhaṁ paccācikkhāmi …pe… sikkhaṁ paccācikkhāmi.

Kinnumāva samaṇiyo yā samaṇiyo sakyadhītaro.

Santaññāpi samaṇiyo lajjiniyo kukkuccikā sikkhākāmā, tāsāhaṁ santike brahmacariyaṁ carissāmī’ti.

Abhiramāyye, svākkhāto dhammo;

cara brahmacariyaṁ sammā dukkhassa antakiriyāyā”ti.

Dutiyampi vattabbā.

Tatiyampi vattabbā.

Sace paṭinissajjati iccetaṁ kusalaṁ,

no ce paṭinissajjati āpatti dukkaṭassa.

Sā bhikkhunī samanubhāsitabbā.

Evañca pana, bhikkhave, samanubhāsitabbā.

Byattāya bhikkhuniyā paṭibalāya saṅgho ñāpetabbo—

“Suṇātu me, ayye, saṅgho.

Ayaṁ itthannāmā bhikkhunī kupitā anattamanā evaṁ vadeti—

‘buddhaṁ paccācikkhāmi, dhammaṁ paccācikkhāmi, saṅghaṁ paccācikkhāmi, sikkhaṁ paccācikkhāmi.

Kinnumāva samaṇiyo yā samaṇiyo sakyadhītaro.

Santaññāpi samaṇiyo lajjiniyo kukkuccikā sikkhākāmā tāsāhaṁ santike brahmacariyaṁ carissāmī’ti.

Sā taṁ vatthuṁ na paṭinissajjati.

Yadi saṅghassa pattakallaṁ, saṅgho itthannāmaṁ bhikkhuniṁ samanubhāseyya tassa vatthussa paṭinissaggāya.

Esā ñatti.

Suṇātu me, ayye, saṅgho.

Ayaṁ itthannāmā bhikkhunī kupitā anattamanā evaṁ vadeti—

‘buddhaṁ paccācikkhāmi …pe… sikkhaṁ paccācikkhāmi.

Kinnumāva samaṇiyo yā samaṇiyo sakyadhītaro.

Santaññāpi samaṇiyo lajjiniyo kukkuccikā sikkhākāmā, tāsāhaṁ santike brahmacariyaṁ carissāmī’ti.

Sā taṁ vatthuṁ na paṭinissajjati.

Saṅgho itthannāmaṁ bhikkhuniṁ samanubhāsati tassa vatthussa paṭinissaggāya.

Yassā ayyāya khamati itthannāmāya bhikkhuniyā samanubhāsanā tassa vatthussa paṭinissaggāya, sā tuṇhassa;

yassā nakkhamati sā, bhāseyya.

Dutiyampi etamatthaṁ vadāmi …pe…

tatiyampi etamatthaṁ vadāmi …pe….

Samanubhaṭṭhā saṅghena itthannāmā bhikkhunī tassa vatthussa paṭinissaggāya.

Khamati saṅghassa, tasmā tuṇhī, evametaṁ dhārayāmī”ti.

Ñattiyā dukkaṭaṁ.

Dvīhi kammavācāhi thullaccayā.

Kammavācāpariyosāne āpatti saṅghādisesassa.

Saṅghādisesaṁ ajjhāpajjantiyā ñattiyā dukkaṭaṁ, dvīhi kammavācāhi thullaccayā paṭippassambhanti.

Ayampīti

purimāyo upādāya vuccati.

Yāvatatiyakanti

yāvatatiyaṁ samanubhāsanāya āpajjati, na saha vatthujjhācārā.

Nissāraṇīyanti

saṅghamhā nissārīyati.

Saṅghādisesoti

…pe… tenapi vuccati saṅghādisesoti.

Dhammakamme dhammakammasaññā na paṭinissajjati, āpatti saṅghādisesassa.

Dhammakamme vematikā na paṭinissajjati, āpatti saṅghādisesassa.

Dhammakamme adhammakammasaññā na paṭinissajjati, āpatti saṅghādisesassa.

Adhammakamme dhammakammasaññā, āpatti dukkaṭassa.

Adhammakamme vematikā, āpatti dukkaṭassa.

Adhammakamme adhammakammasaññā, āpatti dukkaṭassa.

Anāpatti—

asamanubhāsantiyā,

paṭinissajjantiyā,

ummattikāya,

ādikammikāyāti.

Sattamasaṅghādisesasikkhāpadaṁ niṭṭhitaṁ.