上座部比丘尼分别（巴利原文）

Theravāda Vinaya

Bhikkhunivibhaṅga

Pācittiyakaṇḍa

Gabbhinivagga

70. Dutiyasahajīvinīsikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena thullanandā bhikkhunī sahajīviniṁ vuṭṭhāpetvā neva vūpakāseti na vūpakāsāpeti.

Sāmiko aggahesi.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma ayyā thullanandā sahajīviniṁ vuṭṭhāpetvā neva vūpakāsessati na vūpakāsāpessati, sāmiko aggahesi.

Sacāyaṁ bhikkhunī pakkantā assa, na ca sāmiko gaṇheyyā”ti …pe…

“saccaṁ kira, bhikkhave, thullanandā bhikkhunī sahajīviniṁ vuṭṭhāpetvā neva vūpakāseti na vūpakāsāpeti, sāmiko aggahesī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, thullanandā bhikkhunī sahajīviniṁ vuṭṭhāpetvā neva vūpakāsessati na vūpakāsāpessati, sāmiko aggahesi.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī sahajīviniṁ vuṭṭhāpetvā neva vūpakāseyya na vūpakāsāpeyya antamaso chappañcayojanānipi, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Sahajīvinī nāma

saddhivihārinī vuccati.

Vuṭṭhāpetvāti

upasampādetvā.

Neva vūpakāseyyāti

na sayaṁ vūpakāseyya.

Na vūpakāsāpeyyāti

na aññaṁ āṇāpeyya.

“Neva vūpakāsessāmi na vūpakāsāpessāmi antamaso chappañcayojanānipī”ti dhuraṁ nikkhittamatte āpatti pācittiyassa.

Anāpatti—

sati antarāye,

pariyesitvā dutiyikaṁ bhikkhuniṁ na labhati,

gilānāya,

āpadāsu,

ummattikāya,

ādikammikāyāti.

Dasamasikkhāpadaṁ niṭṭhitaṁ.

Gabbhinivaggo sattamo.