上座部比丘尼分别（巴利原文）

Theravāda Vinaya

Bhikkhunivibhaṅga

Saṅghādisesakaṇḍa

6. Dutiyabhojanapaṭiggahaṇasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena sundarīnandā bhikkhunī abhirūpā hoti dassanīyā pāsādikā.

Manussā bhattagge sundarīnandaṁ bhikkhuniṁ passitvā avassutā sundarīnandāya bhikkhuniyā aggamaggāni bhojanāni denti.

Sundarīnandā bhikkhunī kukkuccāyantī na paṭiggaṇhāti.

Anantarikā bhikkhunī sundarīnandaṁ bhikkhuniṁ etadavoca—

“kissa tvaṁ, ayye, na paṭiggaṇhāsī”ti?

“Avassutā, ayye”ti.

“Tvaṁ pana, ayye, avassutā”ti?

“Nāhaṁ, ayye, avassutā”ti.

“Kiṁ te, ayye, eso purisapuggalo karissati avassuto vā anavassuto vā, yato tvaṁ anavassutā.

Iṅgha, ayye, yaṁ te eso purisapuggalo deti khādanīyaṁ vā bhojanīyaṁ vā taṁ tvaṁ sahatthā paṭiggahetvā khāda vā, bhuñja vā”ti.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma bhikkhunī evaṁ vakkhati—

‘kiṁ te, ayye, eso purisapuggalo karissati avassuto vā anavassuto vā, yato tvaṁ anavassutā.

Iṅgha, ayye, yaṁ te eso purisapuggalo deti khādanīyaṁ vā bhojanīyaṁ vā taṁ tvaṁ sahatthā paṭiggahetvā khāda vā bhuñja vā’”ti …pe…

“saccaṁ kira, bhikkhave, bhikkhunī evaṁ vadeti—

‘kiṁ te, ayye, eso purisapuggalo karissati avassuto vā anavassuto vā yato tvaṁ anavassutā.

Iṅgha, ayye, yaṁ te eso purisapuggalo deti khādanīyaṁ vā bhojanīyaṁ vā taṁ tvaṁ sahatthā paṭiggahetvā khāda vā bhuñja vā’”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, bhikkhunī evaṁ vakkhati—

‘kiṁ te, ayye, eso purisapuggalo karissati avassuto vā anavassuto vā yato tvaṁ anavassutā;

iṅgha, ayye, yaṁ te eso purisapuggalo deti khādanīyaṁ vā bhojanīyaṁ vā taṁ tvaṁ sahatthā paṭiggahetvā khāda vā bhuñja vā’ti.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī evaṁ vadeyya— ‘kiṁ te, ayye, eso purisapuggalo karissati avassuto vā anavassuto vā, yato tvaṁ anavassutā. Iṅgha, ayye, yaṁ te eso purisapuggalo deti khādanīyaṁ vā bhojanīyaṁ vā taṁ tvaṁ sahatthā paṭiggahetvā khāda vā bhuñja vā’ti, ayampi bhikkhunī paṭhamāpattikaṁ dhammaṁ āpannā nissāraṇīyaṁ saṅghādisesan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Evaṁ vadeyyāti—

“kiṁ te, ayye, eso purisapuggalo karissati avassuto vā anavassuto vā, yato tvaṁ anavassutā. Iṅgha, ayye, yaṁ te eso purisapuggalo deti khādanīyaṁ vā bhojanīyaṁ vā taṁ tvaṁ sahatthā paṭiggahetvā khāda vā bhuñja vā”ti uyyojeti, āpatti dukkaṭassa.

Tassā vacanena “khādissāmi bhuñjissāmī”ti paṭiggaṇhāti, āpatti dukkaṭassa.

Ajjhohāre ajjhohāre āpatti thullaccayassa.

Bhojanapariyosāne āpatti saṅghādisesassa.

Ayampīti

purimāyo upādāya vuccati.

Paṭhamāpattikanti

saha vatthujjhācārā āpajjati asamanubhāsanāya.

Nissāraṇīyanti

saṅghamhā nissārīyati.

Saṅghādisesoti

…pe… tenapi vuccati saṅghādisesoti.

Udakadantaponaṁ “paṭiggaṇhā”ti uyyojeti, āpatti dukkaṭassa.

Tassā vacanena “khādissāmi bhuñjissāmī”ti paṭiggaṇhāti, āpatti dukkaṭassa.

Ekatoavassute yakkhassa vā petassa vā paṇḍakassa vā tiracchānagatamanussaviggahassa vā hatthato khādanīyaṁ vā bhojanīyaṁ vā “khāda vā bhuñja vā”ti uyyojeti, āpatti dukkaṭassa.

Tassā vacanena “khādissāmi bhuñjissāmī”ti paṭiggaṇhāti, āpatti dukkaṭassa.

Ajjhohāre ajjhohāre āpatti dukkaṭassa.

Bhojanapariyosāne āpatti thullaccayassa.

Udakadantaponaṁ paṭiggaṇhāti uyyojeti, āpatti dukkaṭassa.

Tassā vacanena “khādissāmi bhuñjissāmī”ti paṭiggaṇhāti, āpatti dukkaṭassa.

Anāpatti—

“anavassuto”ti jānantī uyyojeti,

“kupitā na paṭiggaṇhātī”ti uyyojeti,

“kulānuddayatāya na paṭiggaṇhātī”ti uyyojeti,

ummattikāya,

ādikammikāyāti.

Chaṭṭhasaṅghādisesasikkhāpadaṁ niṭṭhitaṁ.