上座部比丘尼分别（巴利原文）

Theravāda Vinaya

Bhikkhunivibhaṅga

Pācittiyakaṇḍa

Lasuṇavagga

5. Udakasuddhikasikkhāpada

Tena samayena buddho bhagavā sakkesu viharati kapilavatthusmiṁ nigrodhārāme.

Atha kho mahāpajāpati gotamī yena bhagavā tenupasaṅkami; upasaṅkamitvā bhagavantaṁ abhivādetvā adhovāte aṭṭhāsi—

“duggandho, bhagavā, mātugāmo”ti.

Atha kho bhagavā—

“ādiyantu kho bhikkhuniyo udakasuddhikan”ti, mahāpajāpatiṁ gotamiṁ dhammiyā kathāya sandassesi samādapesi samuttejesi sampahaṁsesi.

Atha kho mahāpajāpati gotamī bhagavatā dhammiyā kathāya sandassitā samādapitā samuttejitā sampahaṁsitā bhagavantaṁ abhivādetvā padakkhiṇaṁ katvā pakkāmi.

Atha kho bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū āmantesi—

“anujānāmi, bhikkhave, bhikkhunīnaṁ udakasuddhikan”ti.

Tena kho pana samayena aññatarā bhikkhunī—

“bhagavatā udakasuddhikā anuññātā”ti atigambhīraṁ udakasuddhikaṁ ādiyantī muttakaraṇe vaṇaṁ akāsi.

Atha kho sā bhikkhunī bhikkhunīnaṁ etamatthaṁ āroceti.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma bhikkhunī atigambhīraṁ udakasuddhikaṁ ādiyissatī”ti …pe…

“saccaṁ kira, bhikkhave, bhikkhunī atigambhīraṁ udakasuddhikaṁ ādiyatī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, bhikkhunī atigambhīraṁ udakasuddhikaṁ ādiyissati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Udakasuddhikaṁ pana bhikkhuniyā ādiyamānāya dvaṅgulapabbaparamaṁ ādātabbaṁ. Taṁ atikkāmentiyā pācittiyan”ti.

Udakasuddhikaṁ nāma

muttakaraṇassa dhovanā vuccati.

Ādiyamānāyāti

dhovantiyā.

Dvaṅgulapabbaparamaṁ ādātabbanti

dvīsu aṅgulesu dve pabbaparamā ādātabbā.

Taṁ atikkāmentiyāti

samphassaṁ sādiyantī antamaso kesaggamattampi atikkāmeti, āpatti pācittiyassa.

Atirekadvaṅgulapabbe atirekasaññā ādiyati, āpatti pācittiyassa.

Atirekadvaṅgulapabbe vematikā ādiyati, āpatti pācittiyassa.

Atirekadvaṅgulapabbe ūnakasaññā ādiyati, āpatti pācittiyassa.

Ūnakadvaṅgulapabbe atirekasaññā, āpatti dukkaṭassa.

Ūnakadvaṅgulapabbe vematikā, āpatti dukkaṭassa.

Ūnakadvaṅgulapabbe ūnakasaññā, anāpatti.

Anāpatti—

dvaṅgulapabbaparamaṁ ādiyati,

ūnakadvaṅgulapabbaparamaṁ ādiyati,

ābādhapaccayā,

ummattikāya,

ādikammikāyāti.

Pañcamasikkhāpadaṁ niṭṭhitaṁ.