上座部比丘尼分别（巴利原文）

Theravāda Vinaya

Bhikkhunivibhaṅga

Saṅghādisesakaṇḍa

5. Bhojanapaṭiggahaṇasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena sundarīnandā bhikkhunī abhirūpā hoti dassanīyā pāsādikā.

Manussā bhattagge sundarīnandaṁ bhikkhuniṁ passitvā avassutā avassutāya sundarīnandāya bhikkhuniyā aggamaggāni bhojanāni denti.

Sundarīnandā bhikkhunī yāvadatthaṁ bhuñjati;

aññā bhikkhuniyo na cittarūpaṁ labhanti.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma ayyā sundarīnandā avassutā avassutassa purisapuggalassa hatthato khādanīyaṁ vā bhojanīyaṁ vā sahatthā paṭiggahetvā khādissati bhuñjissatī”ti …pe…

“saccaṁ kira, bhikkhave, sundarīnandā bhikkhunī avassutā avassutassa purisapuggalassa hatthato khādanīyaṁ vā bhojanīyaṁ vā sahatthā paṭiggahetvā khādati bhuñjatī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, sundarīnandā bhikkhunī avassutā avassutassa purisapuggalassa hatthato khādanīyaṁ vā bhojanīyaṁ vā sahatthā paṭiggahetvā khādissati bhuñjissati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī avassutā avassutassa purisapuggalassa hatthato khādanīyaṁ vā bhojanīyaṁ vā sahatthā paṭiggahetvā khādeyya vā bhuñjeyya vā, ayampi bhikkhunī paṭhamāpattikaṁ dhammaṁ āpannā nissāraṇīyaṁ saṅghādisesan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Avassutā nāma

sārattā apekkhavatī paṭibaddhacittā.

Avassuto nāma

sāratto apekkhavā paṭibaddhacitto.

Purisapuggalo nāma

manussapuriso, na yakkho na peto na tiracchānagato, viññū paṭibalo sārajjituṁ.

Khādanīyaṁ nāma

pañca bhojanāni udakadantaponaṁ ṭhapetvā avasesaṁ khādanīyaṁ nāma.

Bhojanīyaṁ nāma

pañca bhojanāni—odano, kummāso, sattu, maccho, maṁsaṁ.

“Khādissāmi bhuñjissāmī”ti paṭiggaṇhāti, āpatti thullaccayassa.

Ajjhohāre ajjhohāre āpatti saṅghādisesassa.

Ayampīti

purimāyo upādāya vuccati.

Paṭhamāpattikanti

saha vatthujjhācārā āpajjati asamanubhāsanāya.

Nissāraṇīyanti

saṅghamhā nissārīyati.

Saṅghādisesoti

…pe… tenapi vuccati saṅghādisesoti.

Udakadantaponaṁ paṭiggaṇhāti, āpatti dukkaṭassa.

Ekatoavassute “khādissāmi bhuñjissāmī”ti paṭiggaṇhāti, āpatti dukkaṭassa.

Ajjhohāre ajjhohāre āpatti thullaccayassa.

Udakadantaponaṁ paṭiggaṇhāti, āpatti dukkaṭassa.

Ubhatoavassute yakkhassa vā petassa vā paṇḍakassa vā tiracchānagatamanussaviggahassa vā hatthato “khādissāmi bhuñjissāmī”ti paṭiggaṇhāti, āpatti dukkaṭassa.

Ajjhohāre ajjhohāre āpatti thullaccayassa.

Udakadantaponaṁ paṭiggaṇhāti, āpatti dukkaṭassa.

Ekatoavassute “khādissāmi bhuñjissāmī”ti paṭiggaṇhāti, āpatti dukkaṭassa.

Ajjhohāre ajjhohāre āpatti dukkaṭassa.

Udakadantaponaṁ paṭiggaṇhāti, āpatti dukkaṭassa.

Anāpatti—

ubhatoanavassutā honti,

“anavassuto”ti jānantī paṭiggaṇhāti,

ummattikāya,

ādikammikāyāti.

Pañcamasaṅghādisesasikkhāpadaṁ niṭṭhitaṁ.