Peṭakopadesa · PE8 · Hārasampātabhūmi

完整巴利原文 · 稳定分页　当前仅加载第 27 阅读页；保留 Bilara 原生段落标识，每页最多 120 段。

0.1

Peṭakopadesa

0.2

Hārasampātabhūmi

1.1

Yāni cattāri jhānāni, tesaṁ jhānānaṁ imāni aṅgāni, tesaṁ aṅgānaṁ samūho assa aṅgā, ayaṁ jhānabhūmi ko visesoti assa viseso.

pe8:1.1

1.2

Ime sambhārā tehi ayaṁ samudāgamo, tassa samudāgamassa ayaṁ upanisā, tāya upanisāya ayaṁ bhāvanā.

pe8:1.2

1.3

Tassā bhāvanāya ayaṁ ādīnavo.

pe8:1.3

1.4

Tena ayaṁ parihāni.

pe8:1.4

1.5

Kassa parihānīti tadupagajjhāyino.

pe8:1.5

1.6

Taṁ yathā bhaṇitaṁ paccavekkhanto ayaṁ viseso.

pe8:1.6

1.7

Tena visesena ayaṁ assādo, so kassa assādo ajhāniyā jhāyino, tassā ajhāniyā jhāyino, idaṁ kallitā kosalle ṭhitajjhānaṁ anomaddiyataṁ gacchati jhānabalaṁ, jhānabale ṭhitassa ayaṁ pāramippattassa imāni jhānaṅgāni anāvilasaṅkappo paṭhame jhāne jhānaṅgāni bhāvī.

pe8:1.7

1.8

So pīti tadanusārittāva paṭhame jhāne jhānaṅgaṁ tassaṅguno ca dhammā tadabhisannitāya ca.

pe8:1.8

1.9

Pīti dutiye jhāne jhānaṅgadhammatā kho pana tathā pavattassa sahagataṁ jhānaṅgadhammaṁ sasukhatāya ajjhattaṁ sampasādo dutiye jhāne jhānaṅgaṁ manosampasādanatāya tadabhisannitāya ca.

pe8:1.9

1.10

Pīti dutiye jhāne jhānaṅgaṁ ajjhattaṁ sampasādanaṁ samādhitā pīti dutiye jhāne jhānaṅgaṁ, cetaso ekodibhāvo dutiye jhāne jhānaṅgaṁ, upekkhā phassatā tatiye jhāne jhānaṅgaṁ, sukhaṁ tassa aṅganti ca.

pe8:1.10

1.11

Cetaso ekodibhāvo catutthe jhāne jhānaṅgaṁ, upekkhā adukkhamasukhā catutthe jhāne jhānaṅgaṁ, abhinisābhūmi upekkhāsatipārisuddhi catutthe jhāne jhānaṅgaṁ.

pe8:1.11

1.12

Satipārisuddhi ca anekajjhānabhūmīsu jhānaṅgasamāyuttā pīti cetaso ekodibhāvo catutthe jhāne jhānaṅgaṁ.

pe8:1.12

2.1

Tattha katamā jhānabhūmi?

pe8:2.1

2.2

Savitakke savicāre vivekā anugatā paṭhame jhāne jhānabhūmi.

pe8:2.2

2.3

Avitakke avicāre ajjhattaṁ sampasādanaṁ janitaṁ pītimanugatā dutiye jhāne jhānabhūmi.

pe8:2.3

2.4

Sukhasātasamohitā sappītikā tatiye jhāne jhānabhūmi.

pe8:2.4

2.5

Tassa sukhadukkhasahagatā abhinīhārasahagatā catutthe jhāne jhānabhūmi.

pe8:2.5

2.6

Appamāṇasahagatā sattārammaṇā paṭhame jhāne jhānabhūmi.

pe8:2.6

2.7

Abhibhūmiāyatanasahagatā rūpasaññīsu dutiye jhāne jhānabhūmi.

pe8:2.7

2.8

Vimokkhasahagatānaṁ vimokkhesu tatiye jhāne jhānabhūmi.

pe8:2.8

2.9

Anupassanāsahagatā kāyasaṅkhārā sammā catutthassa jhānassa bhūmi.

pe8:2.9

3.1

Tattha katame jhānavisesā?

pe8:3.1

3.2

Vivicceva kāmehi vivicca pāpakehi akusalehi dhammehi cittacetasikasahagatā kāmadhātusamatikkamanatāpi, ayaṁ jhānaviseso.

pe8:3.2

3.3

Avitakkā ceva avicārā ca sappītikāya satisahagatāya pītisahagatā saññāmanasikārā samudācaranti.

pe8:3.3

3.4

Ayaṁ jhānaviseso.

pe8:3.4

3.5

Avitakkāya bhūmiyā avicāreyeva sati anugatā upekkhāsahagatā manasikārā samudācaranti.

pe8:3.5

3.6

Tadanudhammatāya ca sati saṇḍahati.

pe8:3.6

3.7

Tañca bhūmiṁ upasampajja viharati, ayaṁ jhānaviseso.

pe8:3.7

3.8

Satipārisuddhisahagatā saññāmanasikārā samudācaranti, tañca bhūmiṁ upasampajja viharati, ayaṁ jhānaviseso.

pe8:3.8

3.9

Viññāṇañcāyatanasahagatāya bhūmiyaṁ ākiñcaññāyatanasahagatā saññāmanasikārā samudācaranti, tañca bhūmiṁ upasampajja viharati, ayaṁ jhānaviseso.

pe8:3.9

4.1

Jhānasambhārā nekkhammavitakko sambhāro kāmavitakkavinodanādhippāyatā.

pe8:4.1

4.2

Abyāpādavitakko sambhāro byāpādavitakkapaṭivinodanādhippāyatā.

pe8:4.2

4.3

Avihiṁsāvitakko sambhāro vihiṁsāvitakkapaṭivinodanādhippāyatā.

pe8:4.3

4.4

Indriyesu guttadvāratā appicchatā sambhāro parisuddhājīvo catunnaṁ samāpattīnaṁ sambhāro akammassa vihāritā.

pe8:4.4

4.5

Maggasambhāro samāpattipajjanatā.

pe8:4.5

4.6

Phalasambhāro jhānanibbattitāya jhānasamudāgamo.

pe8:4.6

4.7

Kusalahetu yaṁ jhānaṁ samudayaṁ gacchanti ko ca na kutoci nekkhammappattā samudāgacchanti.

pe8:4.7

4.8

Ālambanirodhasamādhi santo samudāgacchanti.

pe8:4.8

4.9

Avītikkantā samudāgacchanti.

pe8:4.9

4.10

Sukhindriyaṁ somanassindriyaṁ pahānāya te ca abyāpajjatāya samudāgacchanti.

pe8:4.10

4.11

Taṁ pana sandhāya samudāgacchanti.

pe8:4.11

4.12

Aparidāhanāya samudāgacchanti.

pe8:4.12

4.13

Ayaṁ ñāṇasamudāgamo.

pe8:4.13

5.1

Tattha katamā upanisā?

pe8:5.1

5.2

Kalyāṇamittatā jhānassa upanisā.

pe8:5.2

5.3

Kalyāṇasampavaṅkatā jhānassa upanisā.

pe8:5.3

5.4

Indriyesu guttadvāratā jhānassa upanisā.

pe8:5.4

5.5

Asantuṭṭhitā kusalesu dhammesu jhānassa upanisā.

pe8:5.5

5.6

Saddhammassavanaṁ jhānassa upanisā.

pe8:5.6

5.7

Saṁvejaniye ṭhāne saṁviggassa yoniso padhānaṁ.

pe8:5.7

5.8

Ayaṁ jhānopanisā.

pe8:5.8

6.1

Tattha katamā bhāvanā?

pe8:6.1

6.2

Mettāsevanā abyāpādavitakkabhāvanā.

pe8:6.2

6.3

Karuṇāsevanā avihiṁsāvitakkabhāvanā.

pe8:6.3

6.4

Muditābhāvanā pītisukhasampajaññā kāritā.

pe8:6.4

6.5

Upekkhābhāvanā passavatā upekkhābhāvanā apassavatā upekkhā ca ajjhupekkhā ca, asubhasaññābhāvanā dukkhāpaṭipadā dandhābhiññā bhavasandhābhiññā bhavasandhānaṁ, sā chabbidhā bhāvanā bhāvitā bahulīkatā anuṭṭhitā vatthukatā yānīkatā paricitā susamāraddhā.

pe8:6.5

6.6

Ayaṁ bhāvanā.

pe8:6.6

7.1

Evaṁ bhāvayantassa ayaṁ ādīnavo.

pe8:7.1

7.2

Paṭhame jhāne saṅkhārasamannāgato eso dhammo assuto sāsavo.

pe8:7.2

7.3

Sace esa dhammo ayaṁ sīlo āsannapaṭipakkho ca esa dhammo kāmo paticāro pativicāro samāpattīnaṁ ca sabboḷāriko esa dhammo vitakkavicāro ca.

pe8:7.3

7.4

Tattha cittaṁ khobhenti, kāyo cettha kilamati, kāyamhi cettha kilante cittaṁ vihaññati.

pe8:7.4

7.5

Anabhinīhārakkhamova abhiññānaṁ ime ādīnavā paṭhame jhāne.

pe8:7.5

8.1

Dutiye jhāne ime ādīnavā pītipharaṇasahagato ca eso dhammo, na samudācārasseti cittaṁ.

pe8:8.1

8.2

Asodhayaṁ upagamo cesa dhammo upagamiparissayo domanassapaccatthiko cesa dhammo.

pe8:8.2

8.3

Tattha tattha yuttīnaṁ pīti parajjato cesa dhammo dukkaraṁ hoti, avattasantāsabhūmiparivajjayanto catūsu dukkhatāsu esa dhammo anuviddhāpanasaddhāya dukkhatāya ca na palibodhadukkhatāya ca abhiññādukkhatāya ca rogadukkhatāya ca, ime ādīnavā dutiye jhāne.

pe8:8.3

9.1

Tattha katame ādīnavā tatiye jhāne?

pe8:9.1

9.2

Upekkhāsukhasahagatāya tattha sātāvīnaṁ pañcannaṁ upekkhāsukhaṁ parivattito esa dhammo tena niccasaññitānañca yaṁ hoti.

pe8:9.2

9.3

Dukkhopaniyaṁ sukhaṁ cittassa saṅkhobhataṁ upādāya sukhadukkhāya gato savati.

pe8:9.3

9.4

Sukhadukkhānukatañca upādāya anabhihārakkhamaṁ cittaṁ hoti.

pe8:9.4

9.5

Abhiññāya sacchikiriyāsu sabbepi cete dhammā tīsu jhānasamāpattīsu catūhi ca dukkhatāhi anuviddhānaṁ sā bhayā dukkhatāya palibodhadukkhatāya ca abhiññāya dukkhatāya ca ime ādīnavā tatiye jhāne.

pe8:9.5

10.1

Tattha katame ādīnavā catutthe jhāne?

pe8:10.1

10.2

Ākiñcaññāsamāpattikā te dhammānusamāpattikā etissā ca bhūmiyaṁ sātānaṁ bālaputhujjanānaṁ anekavidhāni diṭṭhigatāni uppajjanti.

pe8:10.2

10.3

Oḷārikā sukhumehi ca rūpasaññāhi anuvidhāni etāni jhānāni sadā anudayamettājhānakalānudanukalāya sādhāraṇā, dukkarā ca sabbe cattāro mahāsambhārā samudāgatāni ca etāni jhānāni aññamaññaṁ nissāya samudāgacchanti.

pe8:10.3

10.4

Ettha samudāgatā ca ete dhammā na samattā honti.

pe8:10.4

10.5

Asamuggahitanimittā ca ete dhammā parihāyanti.

pe8:10.5

10.6

Nirujjhanti ca ete dhammā na upādiyanti nirujjhaṅgāni ca, etesaṁ dhammānaṁ jhānāni nimittāni na jhānanimittasaññā vokirati.

pe8:10.6

10.7

Appaṭiladdhapubbā ca jhāyīvasena ca bhavati.

pe8:10.7

10.8

Imehi ādīnavehi ayaṁ jhānaparihāni.

pe8:10.8

11.1

Nirodhasamāpattiyā apaṭisaṅkhāya avasesasaññino ākiñcaññāyatanasahagatā saññāmanasikārā samudācaranti, so nirodhasamāpattito parihāyati.

pe8:11.1

11.2

Āneñjasaññino asaññāyatanaṁ samāpannassa ākiñcaññāyatanasahagatā manasikārā samudācaranti, tañca bhūmiṁ na pajānāti, so tato parihāyati.

pe8:11.2

11.3

Ākiñcaññāyatanaṁ samāpannassa viññāṇañcāyatanasaññā manasikārā samudācaranti, tañca bhūmiṁ na pajānāti, so tato parihāyati.

pe8:11.3

11.4

Viññāṇañcāyatanaṁ samāpannassa rūpasaññāsahagatā.

pe8:11.4

11.5

Vitthārena …pe…

pe8:11.5

11.6

yāva paṭhame jhāne kāmasaññāsahagatā kātabbā.

pe8:11.6

11.7

Sakassa parihāyati, kalaṅkajjhāne kalaṅkaṁ jhāyati, parisamantato jhāyati, bhindanto jhāyati, na sajjhāyati, āyūhanto jhāyati, kiñci ca niparicito jhāyati.

pe8:11.7

11.8

Atividhāvanto jhāyati, atimaññanto jhāyati, kāyasaṅkhāre appaṭisambhāre jhāyati, pariyuṭṭhānassa nissaraṇaṁ ajānanto jhāyati, nīvaraṇābhibhūto jhāyati, assāpattimanasikaronto jhānassa assādo kāmarāgapariyuṭṭhānaṁ pahānaṁ jhānassa assādo kāmarāgahetūnaṁ dhammānaṁ udayanti, nirujjhaṅgāni etesaṁ dhammānaṁ jhānāni uparimā sukhupekkhā kāmakammakilesānaṁ pahānaṁ assādo, evaṁ kho puna jhānassa assādo mahāsaṁvāsamappīḷite lokasannivāse asambodhokāsā vigamessamidaṁ jhānappahānā.

pe8:11.8

11.9

Ayaṁ palirodhamappalirodhalokasannivāse esanidhamidaṁ jhānaṁ anamataggasaṁsārasamāpannānaṁ sattānaṁ saṁsārappahānanā ānisaṁso, yamidaṁ jhānassa assādo kāyassa ajhāniyajhāyino bhavati.

pe8:11.9

11.10

Ajhāniyajhāniyajhāyīhi aparāmasanto ajhāniyajhāyitaṁ jhāyati, yāni kalaṅkajjhāyino padāni, tāni anudhitāni paṭipakkhe.

pe8:11.10

12.1

Tattha katamaṁ jhānakosallaṁ?

pe8:12.1

12.2

Samāpattikosallaṁ jhānakosallaṁ, jhānavisesakosallaṁ jhānakosallaṁ, jhānantarikakosallaṁ jhānakosallaṁ, samāpattivuṭṭhānakosallaṁ jhānakosallaṁ, jhāne sabhāvakosallaṁ jhānakosallaṁ, jhāne ādīnavakosallaṁ jhānakosallaṁ, jhāne nissaraṇakosallaṁ jhānakosallaṁ, jhānaphalena upādāya kosallaṁ, jhānaphalena paṭisaṅkhānaphale aparihānadhammatā nibbattijhāne ca kīḷitāpi visesabhāgiyaṁ jhānaṁ paṭilabbhati.

pe8:12.2

12.3

Idaṁ panassāti bhavahāritā ca ārammaṇānimittaggāho anabhinīhārabalaṁ, cittekaggatā nimittāsu gatisahitā samathabalena asaṁsīdanañca jhāne maggaphalaṁ samathaṁ pavatte samādhino upekkhāpalipubbāparanimittāsayo paggāhino satibalaṁ taṁ pavattitānañca vipassanānaṁ samaññābale.

pe8:12.3

12.4

Tattha katamā jhānapāramitā?

pe8:12.4

13.1

Supāramitā mettā kāmesu sattā kāmasaṅgasattāti yamhi sutte desanāya vohārena dve saccāni niddiṭṭhāni, dukkhañca samudayo ca, vicayena hārena ye saṁyojanīyesu dhammesu vajjaṁ na passanti, te oghaṁ tarissantīti netaṁ ṭhānaṁ vijjati.

pe8:13.1

13.2

Na tarissantīti atthi esā yutti ca vicayo ca idaṁ nu kissa padaṭṭhānaṁ, kāmesu sattāti pañca kāmaguṇā, taṁ kāmataṇhāya padaṭṭhānaṁ.

pe8:13.2

13.3

Saṁyojane vajjamapassamānāti avijjāya padaṭṭhānaṁ, na hi jātu saṁyojanasaṅgasattā oghaṁ tareyyuṁ vipulaṁ mahantanti upādānassa padaṭṭhānaṁ.

pe8:13.3

13.4

Kāmesu sattāti kāmā dvidhā—

pe8:13.4

13.5

vatthukāmā ca kilesakāmā ca, tattha kilesakāmā kāmataṇhā kāmataṇhāya yuttā bhavanti rūpataṇhā bhavataṇhā lakkhaṇena hārena, saṁyojane vajjamapassamānāti saṁyojanassa.

pe8:13.5

13.6

Yo tattha chandarāgo tassa kiṁ padaṭṭhānaṁ?

pe8:13.6

13.7

Sukhā vedanā dve ca indriyāni—

pe8:13.7

13.8

sukhindriyañca somanassindriyañca.

pe8:13.8

13.9

Iti sukhāya vedanāya gahitāya tayopi vedanā gahitā honti.

pe8:13.9

13.10

Vedanākkhandhe gahite sabbe pañcakkhandhā gahitā honti.

pe8:13.10

13.11

Rūpasaddagandharasaphoṭṭhabbā gahitā, vatthukāmesu gahitesu sabbāni cha bāhirāni āyatanāni gahitāni honti.

pe8:13.11

13.12

Ajjhattikabāhiresu āyatanesu yo sato, ayaṁ vuccate lakkhaṇo hāro, tattha yo oḷārikamhi kilese ajjhāvasito sabbakilesesu yo na tato sukhumataresu na vītarāgo bhavati.

pe8:13.12

13.13

Tattha bāhirasaṁyojanaṁ mamanti ajjhattasaṁyojanaṁ ahanti.

pe8:13.13

13.14

Tattha bhagavato ko adhippāyo?

pe8:13.14

13.15

Ye oghaṁ taritukāmā te saṁyojanīyesu dhammesu ādīnavānupassino viharissantīti ayamettha bhagavato adhippāyo.

pe8:13.15

13.16

Kāmesu sattāti yesu ca sattā yena ca sattā yesañca sattā ayaṁ catubbidho ākāro sabbesaṁ hārabhāgiyo.

pe8:13.16

14.1

Tattha katamāni tīṇi vipallāsāni padaṭṭhānāni ca?

pe8:14.1

14.2

Cittavipallāsassa diṭṭhivipallāsassa saññāvipallāsassa tayo vipallāsā tīṇi akusalamūlāni padaṭṭhānaṁ.

pe8:14.2

14.3

Tīṇi akusalamūlāni hīnappaṇītakāriyakammassa padaṭṭhānaṁ.

pe8:14.3

14.4

Catunnañca upādānānaṁ doso akusalamūlaṁ dissati.

pe8:14.4

14.5

Hīnappaṇītakāriyakammassa padaṭṭhānaṁ.

pe8:14.5

14.6

Yathā mātuyā vā pituno vā aññatarassa vā puna uḷārassa bhikkhuno abhayaṁ deti.

pe8:14.6

14.7

Tattha añño micchā paṭipajjeyya kāyena vā vācāya vā.

pe8:14.7

14.8

Tattha so byāpādamupādāya tesaṁ uḷārānaṁ rakkhāvaraṇaguttiyā anupālayanto yo uḷārānaṁ abhayaṁ deti.

pe8:14.8

14.9

Tesaṁ abhaye dinne yo tattha micchā paṭipajjeyya.

pe8:14.9

14.10

Tattha so byāpādaṁ upādāyanto dosajaṁ kammaṁ karoti.

pe8:14.10