德格《甘珠尔》D95

གང་དག་དབང་པོ་མ་ཚང་བ་དེ་དག་ནི་དབང་པོ་ཡོངས་སུ་རྫོགས་པ་ཐོབ་པར་གྱུར་ཏོ། །ནད་ཀྱིས་བཏབ་པ་རྣམས་ནི་ནད་སོས་པར་གྱུར་ཏོ། །མི་བདེ་བ་ཐམས་ཅད་ནི་བདེ་བ་ཐོབ་པར་གྱུར་ཏོ། །འཇིགས་པས་ཉེན་པ་རྣམས་ནི་དབུགས་ཕྱིན་པ་ཐོབ་པར་གྱུར་ཏོ། །བཅིང་བས་བཅིངས་པ་རྣམས་

ནི་བཅིངས་པ་ལས་གྲོལ་བར་གྱུར་ཏོ། །སེམས་ཅན་དབུལ་པོ་རྣམས་ནི་ལོངས་སྤྱོད་དང་ལྡན་པར་གྱུར་ཏོ། །ཉོན་མོངས་པས་གདུངས་པ་རྣམས་ནི་ཡོངས་སུ་གདུང་བ་མེད་པར་གྱུར་ཏོ། །བཀྲེས་པ་རྣམས་ནི་ལྟོ་འགྲངས་པར་གྱུར་ཏོ། །སྐོམ་པ་རྣམས་ནི་སྐོམ་པ་མེད་པར་གྱུར་ཏོ། །སྦྲུམ་མ་རྣམས་ནི་

བདེ་བར་བཙས་པར་གྱུར་ཏོ། །ཞུམ་པ་ཉམ་ཆུང་བ་རྣམས་ནི་སྟོབས་ཕུན་སུམ་ཚོགས་པར་གྱུར་ཏོ། །དེའི་ཚེ་སེམས་ཅན་གང་ལ་ཡང་འདོད་ཆགས་དང་ཞེ་སྡང་དང་། གཏི་མུག་དང་། ཁྲོ་བ་དང་། ཆགས་པ་དང་། ཐ་བ་དང་། གནོད་སེམས་དང་། ཕྲག་དོག་གི་གནོད་པ་མེད་པར་གྱུར་ཏོ། །

དེའི་ཚེ་སེམས་ཅན་གང་ཡང་འཆི་བ་མེད། འཕོ་བ་མེད། སྐྱེ་བ་མེད་དོ། །དེའི་ཚེ་སེམས་ཅན་ཐམས་ཅད་བྱམས་པའི་སེམས་དང་། ཕན་པའི་སེམས་དང་ལྡན་ཞིང་གཅིག་ལ་གཅིག་ཕ་མར་འདུ་ཤེས་བསྐྱེད་པར་གྱུར་ཏོ། །དེ་ལ་འདི་སྐད་ཅེས་བྱ་སྟེ། མནར་མེད་པ་ལ་ཐུག་པའི་བར། །དམྱལ་བ་

མི་བཟད་སྣང་བ་ཡི། །སེམས་ཅན་རྣམས་ཀྱི་སྡུག་བསྔལ་ཞི། །བདེ་བའི་ཚོར་བ་ཐོབ་པར་འགྱུར། །དུད་འགྲོའི་སྐྱེ་གནས་སེམས་ཅན་རྣམས། །ཕན་ཚུན་གནོད་བྱེད་ཇི་སྙེད་པ། །ཐུབ་ཆེན་འོད་ཀྱིས་རེག་པས་ན། །དེ་དག་བྱམས་པའི་སེམས་ཀྱང་སྐྱེས། །{ཡི་དགས་,ཡི་དྭགས་}འཇིག་རྟེན་{ཡི་དགས་,ཡི་དྭགས་}

རྣམས། །བཀྲེས་སྐོམ་ཉེན་པ་ཇི་སྙེད་པ། །བྱང་ཆུབ་སེམས་དཔའི་གཟི་བརྗིད་ཀྱིས། །དེ་དག་ཟས་སྐོམ་རྙེད་པར་གྱུར། །མི་ཁོམ་ཐམས་ཅད་ཆད་གྱུར་ཅིང་། །ངན་འགྲོ་རྣམས་ཀྱང་སྐམས་པར་གྱུར། །སེམས་ཅན་ཐམས་ཅད་བདེར་གྱུར་ཏེ། །ལྷ་ཡི་བདེ་བས་རབ་ཏུ་ཚིམ། །མིག་དང་རྣ་བ་

མེད་པ་དང་། །གཞན་ཡང་གང་དག་དབང་པོ་ཉམས། །དེ་དག་དབང་པོ་ཀུན་རྫོགས་ཤིང་། །ཡན་ལག་ཐམས་ཅད་མཛེས་པར་གྱུར། །འདོད་ཆགས་ཞེ་སྡང་ལ་སོགས་པའི། །ཉོན་མོངས་རྣམས་ཀྱིས་སེམས་ཅན་གང་། །གནོད་གྱུར་དེ་ཚེ་ཉོན་མོངས་ཀུན། །ཞི་བར་གྱུར་ཏེ་བདེ་དང་ལྡན། །