完整藏文原文 · 德格版页 当前仅加载第 89 函德格 84b 版页；藏文 NFD、目录标记与异常页序保留在来源切片中，重复版页行以稳定序号区分。
བར་འགྱུར་བ་དང་། རྫུ་འཕྲུལ་ཡང་ཆེས་ལྷག་ཅིང་ཁྱད་པར་དུ་འཕགས་པར་འགྱུར་ལགས་སོ། །བཅོམ་ལྡན་འདས་བདག་ཅག་རྒྱལ་པོ་བཞི་ཡང་ཆོས་ཡང་དག་པ་མངོན་པར་སྒྲུབ་ཅིང་རྟག་པར་ཡང་དག་པའི་ཆོས་བསྟན་ནས་ཆོས་ཀྱིས་(འཇིན་,འཇིག་)རྟེན་འདུལ་བར་བགྱིད་པས་
D555.089.0084b01.01བདག་ཅག་གིས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། གྲུལ་བུམ་དང་། མི་འམ་ཅི་དང་། ལྟོ་འཕྱེ་ཆེན་པོ་དག་དང་། མིའི་རྒྱལ་པོ་རྣམས་ཀྱང་རྟག་པར་ཡང་དག་པའི་ཆོས་ཀྱིས་འཇིག་རྟེན་འདུལ་བ་ལ་དགོད་པར་
D555.089.0084b02.01བགྱིད་པས་སྡིག་པ་རྣམས་འགོག་ཅིང་ཡོངས་སུ་སེལ་བར་བགྱིད་དོ། །མིའི་མདངས་འཕྲོག་པར་བགྱིད་པའི་འདྲེ་སྲིན་བྱམས་པ་དང་སྙིང་རྗེ་མ་མཆིས་པ་ཅི་མཆིས་པ་ཐམས་ཅད་ཀྱང་ཐག་རིང་དུ་མཆི་བར་འགྱུར་ལགས་སོ། །བཅོམ་ལྡན་འདས་བདག་ཅག་རྒྱལ་པོ་བཞི་ཡང་
D555.089.0084b03.01གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང་། གནོད་སྦྱིན་བརྒྱ་སྟོང་ཚད་མ་མཆིས་པ་སྙེད་དང་བཅས་པས་ལྷའི་མིག་རྣམ་པར་དག་པ་མི་ལས་ཡང་དག་པར་འདས་པས་འཛམ་བུའི་གླིང་འདིར་ལྟ་བར་བགྱིད་ཅིང་ཡོངས་སུ་བསྐྱབ་པ་དང་ཡོངས་སུ་བསྲུང་བར་བགྱིད་དེ། བཅོམ་ལྡན་
D555.089.0084b04.01འདས་རྒྱུ་དང་རྐྱེན་དེས་ན་བདག་ཅག་རྒྱལ་པོ་རྣམས་ཀྱང་འཇིག་རྟེན་སྐྱོང་བ་ཞེས་བགྱི་བ་ལགས་སོ། །གཞན་ཡང་འཛམ་བུའི་གླིང་འདིར་ཡུལ་གྱི་རྒྱལ་པོ་གང་ལ་ལ་ཞིག་ལ་ཕས་ཀྱི་རྒོལ་བའི་དགྲ་རྣམས་རྟག་པར་ཉེ་བར་མཆིས་ཏེ་གནོད་པ་བགྱིས་པར་གྱུར་ཏམ། མུ་གེ་དང་རིམས་ནད་
D555.089.0084b05.01མང་པོས་གནོད་པར་གྱུར་ཏམ། ལྟས་ངན་གྱི་དངོས་པོ་བརྒྱ་སྟོང་ཚད་མ་མཆིས་པ་སྙེད་བྱུང་བར་གྱུར་ན། བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞི་པོ་དག་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་འདི་ལ་བཀུར་སྟི་དང་མཆོད་པ་བགྱིད་པའི་དགེ་སློང་ཆོས་
D555.089.0084b06.01སྨྲ་བ་གང་ལ་ལ་མདོ་སྡེ་འདི་ལེན་པ་དང་། འཛིན་པ་དང་། ཀློག་ཅིང་ཀུན་ཆུབ་བ་ཞིག་མཆིས་པར་གྱུར་ན་བདག་ཅག་རྒྱལ་པོ་ཆེན་པོ་བཞི་དེའི་ཐད་དུ་མཆིས་ཏེ་གོ་བར་བགྱིས་ནས་དེ་ལ་སྐུལ་ཞིང་གསོལ་བ་འདེབས་པར་བགྱིད་དེ། ཆོས་སྨྲ་བ་དེ་ཡང་བདག་ཅག་གི་རྫུ་འཕྲུལ་གྱིས་གོ་བར་
D555.089.0084b07.01