德格《甘珠尔》D496

གཅིག་ཏུ་ཚིག་སྨྲས་པ། བྱང་ཆུབ་སེམས་དཔའ་དེའི་དུས་ལ་བབ་པར་མཁྱེན་ན་དེའི་དུས་ལགས་དེའི་ཚོད་ལགས་སོ། །དེ་ནས་བྱང་ཆུབ་སེམས་དཔའ་ལག་ན་རྡོ་རྗེས་དེའི་ཚེ་དེ་བཞིན་གཤེགས་པ་ཐམས་ཅད་ཀྱི་རྒྱན་གྱི་སྙིང་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་

པར་ཞུགས་མ་ཐག་ཏུ་བྱང་ཆུབ་སེམས་དཔའ་ལག་ན་རྡོ་རྗེས་དེའི་ཚེ་ན། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་རྒྱུ་མཐུན་པ་ལས་བྱུང་བ། དེ་བཞིན་གཤེགས་པ་ཐམས་ཅད་ཀྱི་རྒྱན་དུ་གྱུར་པའི་ཕྱག་རྒྱ་རབ་འབྱམ་སྨྲས་པ། ཐོག་མར་ལག་པ་གཉིས་སྙིམ་པ་སྦྱར་ལ་སྲིན་ལག་

གཉིས་ནང་དུ་གཞུག་གུང་མོ་གཉིས་གཤིབས་ཏེ་གྱེན་དུ་བསྒྲེང་ལ། མཛུབ་མོ་གཉིས་ཚིགས་གསུམ་པའི་ཐད་ཀ་ནས་གང་ཙམ་གྱིས་མ་རེག་ཙམ་དུ་གཞག །མཐེའུ་ཆུང་གཉིས་དང་མཐེ་བོ་གཉིས་ཀྱང་དེ་ལ་ཕྱོགས་པར་གྱེན་དུ་བསྒྲེང་ངོ་། །འདི་ནི་དམ་ཚིག་ཐམས་ཅད་ཀྱི་རྡོ་རྗེའི་ཕྱག་

རྒྱ་སྟེ་སྔགས་ལ། ན་མཿསརྦ་ཏ་ཐཱ་ག་ཏེ་ས་མ་ཡ་བཛྲ་ཧཱུཾ། དེ་ནས་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ཡ་མཚན་གྱིས་སྤྱན་རྒྱས་པར་གྱུར་ནས། དྲང་སྲོང་ཆེན་པོ་སངས་རྒྱས་དང་བྱང་ཆུབ་སེམས་དཔའ་ཀུན་གྱི་དམ་ཚིག་འདི་ནི་ངོ་མཚར་ཏོ། །

དེ་བཞིན་རྒྱལ་བའི་ཉན་ཐོས་དང་། །རང་རྒྱལ་གང་དག་འཇིག་རྟེན་ན། །གཉིས་མེད་བསེ་རུ་ལྟ་བུ་དང་། །ཚངས་པ་ལ་སོགས་འཕྲུལ་པོ་ཆེ། །འཇིག་རྟེན་ལྷ་རྣམས་གང་ཡིན་དང་། །གང་གཞན་གནོད་སྦྱིན་དྲི་ཟ་དང་། །མཁའ་ལྡིང་མིའམ་ཅི་ལ་སོགས། །སྲིན་པོ་{ཡི་དགས་,ཡི་དྭགས་}

གནོན་པོ་དང་། །གྲིབ་གནོན་བརྗེད་བྱེད་གྲགས་པ་རྣམས། །དེ་དག་ཀུན་གྱིས་ཚིག་སྨྲས་པ། །དམ་ཚིག་དམ་པ་ངོ་མཚར་ཏོ། །སངས་རྒྱས་སྐྱོབ་པ་ཐམས་ཅད་ཀྱི། །དམ་ཚིག་འདི་ལས་སུ་འདའ་བ། །སྡང་སེམས་ལྡན་པ་དེ་དག་གི། །མགོ་བོ་དཔལ་ལྡན་རྡོ་རྗེ་འཆང་། །

སེམས་ཅན་ཀུན་ལ་ཕན་བྱེད་པ། །མེ་ལྕེ་ཕྲེང་འཁྲུགས་མི་བཟད་པའི། །རྡོ་རྗེ་རྣམས་ཀྱིས་རྟག་ཏུ་འགེམས། །དམ་ཚིག་འདས་པ་ངེས་པར་ནི། །ངན་སོང་འགྲོ་ལ་སོགས་པར་འགྱུར། །སྐྱོབ་པ་བྱང་ཆུབ་སེམས་དཔའ་དང་། །རྫོགས་སངས་རྒྱས་རྣམས་མི་མཉེས་