完整藏文原文 · 德格版页 当前仅加载第 53 函德格 173b 版页；藏文 NFD、目录标记与异常页序保留在来源切片中，重复版页行以稳定序号区分。
གཅིག་གིས་གཅིག་བསབས་ཤིང་རྒྱུན་མི་འཆད་པས། དེ་བཞིན་གཤེགས་པའི་བླ་ན་མེད་པའི་མཚན་སུམ་ཅུ་རྩ་གཉིས་དང་། དེ་བཞིན་གཤེགས་པའི་གཟུགས་རྟག་པ་ཐོབ་པའི་ཕྱིར་ཏེ། དེ་བཞིན་གཤེགས་པའི་གཟུགས་ནི་རྟག་པ་མི་འཆད་པའི་ཕྱིར་དེ་བས་ན་
D119.053.0173b01.01གཟུགས་ནི་སངས་རྒྱས་ཀྱི་རང་བཞིན་ནོ་ཞེས་ཟེར་ཏེ། དཔེར་ན་གསེར་ཡང་དག་པ་ཇི་ལྟར་བསྒྱུར་བ་ཡང་ཁ་དོག་རྟག་ཅིང་མི་འགྱུར་ཏེ། གདུ་བུ་བྱས་སམ། སྦྲུལ་དུ་བྱས་སམ། གཞོང་བར་བྱས་ཀྱང་རུང་སྟེ། ཁ་དོག་སེར་པོ་ཐོག་མ་ནས་མ་གྱུར་ཏོ། །སེམས་ཅན་གྱི་སངས་
D119.053.0173b02.01རྒྱས་ཀྱི་རང་བཞིན་ཡང་དེ་དང་འདྲ་བར་དབྱིབས་མི་རྟག་མོད་ཀྱི། གཟུགས་ནི་རྟག་པ་སྟེ། དེའི་ཕྱིར་གཟུགས་ནི་སངས་རྒྱས་ཀྱི་རང་བཞིན་ནོ་ཞེས་སྨྲའོ། །ཁ་ཅིག་ནི་འདི་སྐད་དུ་ཚོར་བ་ནི་སངས་རྒྱས་ཀྱི་རང་བཞིན་ནོ་ཞེས་ཟེར་རོ། །དེ་ཅིའི་ཕྱིར་ཞེ་ན། ཚོར་བའི་རྒྱུ་དང་རྐྱེན་
D119.053.0173b03.01གྱིས་དེ་བཞིན་གཤེགས་པའི་ཡང་དག་པའི་བདེ་བ་ཐོབ་སྟེ། དེ་བཞིན་གཤེགས་པའི་ཚོར་བ་ནི་མཐར་ཚོར་བ་དོན་དམ་པའི་ཚོར་བ་སྟེ། སེམས་ཅན་གྱི་ཚོར་བའི་རང་བཞིན་མི་རྟག་མོད་ཀྱི། འོན་ཀྱང་གཅིག་གིས་གཅིག་བསབས་ཏེ་རྒྱུན་མི་འཆད་པས་དེ་བཞིན་གཤེགས་
D119.053.0173b04.01པའི་ཚོར་བ་རྟག་པ་ཐོབ་སྟེ། དཔེར་ན། མིའི་རུས་ཀོའུ་ཤི་ཀ་ཞེས་བྱ་བ་མི་ཉིད་མི་རྟག་མོད་ཀྱི། རུས་རྟག་པ་ཡིན་ཏེ། རབས་སྟོང་ཕྲག་བརྒྱར་ཡང་མི་འགྱུར་བ་ལྟར། སེམས་ཅན་གྱི་སངས་རྒྱས་ཀྱི་རང་བཞིན་ཡང་དེ་དང་འདྲ་སྟེ། དེ་བས་ན་ཚོར་བ་ནི་སངས་རྒྱས་ཀྱི་
D119.053.0173b05.01རང་བཞིན་ནོ་ཞེས་སྨྲའོ། །དེ་ལ་ཁ་ཅིག་ནི་འདི་སྐད་དུ་འདུ་ཤེས་ནི་སངས་རྒྱས་ཀྱི་རང་བཞིན་ནོ་ཞེས་ཟེར་རོ། །དེ་ཅིའི་ཕྱིར་ཞེ་ན། འདུ་ཤེས་ཀྱི་རྒྱུ་དང་རྐྱེན་གྱིས་དེ་བཞིན་གཤེགས་པའི་འདུ་ཤེས་ཡང་དག་པར་ཐོབ་བོ། །དེ་ལ་དེ་བཞིན་གཤེགས་པའི་འདུ་ཤེས་ནི་འདུ་ཤེས་
D119.053.0173b06.01མེད་པའི་འདུ་ཤེས་སོ། །འདུ་ཤེས་མེད་པའི་འདུ་ཤེས་ནི་སེམས་ཅན་དུ་འདུ་ཤེས་པ་མ་ཡིན། བུད་མེད་དང་སྐྱེས་པར་འདུ་ཤེས་པ་མ་ཡིན། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པར་འདུ་ཤེས་པ་མ་ཡིན། འདུ་ཤེས་མ་
D119.053.0173b07.01