完整藏文原文 · 德格版页 当前仅加载第 75 函德格 284b 版页；藏文 NFD、目录标记与异常页序保留在来源切片中，重复版页行以稳定序号区分。
ཞུ་གསལ་བཞེན་པ་སྐོར་བཞིན་དུ་ཚིགས་སུ་བཅད་དེ་སྨྲས་པ། འདྲེན་པ་རྫུ་འཕྲུལ་ཆེན་པོའི་རིན་ཆེན་སྐུ། །ཚངས་པའི་འཇིག་རྟེན་གཤེགས་པ་གང་ཡིན་ཏེ། །ཉིད་ཀྱི་སྐུ་ལས་བྱུང་བའི་མེ་ལྕེས་བསྲེགས། །དེ་ནི་ན་བཟའ་ལྔ་བརྒྱ་ཕྲུགས་ཀྱིས་དཀྲིས། །ན་བཟའ་ཆོས་གོས་
D343.075.0284b01.01སྟོང་དུ་ཚང་བ་ཡིས། །སངས་རྒྱས་སྐུ་ནི་ཡོངས་སུ་དཀྲིས་པར་གྱུར། །དེར་ནི་བཟའ་ཤིང་ནང་དང་ཕྱི་རོལ་གྱི། །རྣམ་པ་གཉིས་ནི་ཚིག་པར་ཡོང་མ་གྱུར། །སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་ནས་ལོ་བརྒྱ་ལོན་པའི་ཚེ་གྲོང་ཁྱེར་པ་ཏྲ་ལིའི་བུ་ཞེས་བྱ་བ་ན་
D343.075.0284b02.01རྒྱལ་པོ་མྱ་ངན་མེད་རྒྱལ་པོ་བྱེད་དེ། དེའི་རིང་ལ་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་དང་། སྐྱེ་བོ་དང་མི་མང་པོས་གང་བ་དང་། རྩོད་པ་དང་། འཐབ་པ་ཞི་བ་དང་། འཁྲུག་པ་དང་། ནང་འཁྲུག་དང་། ཆོམ་རྐུན་དང་། མུ་གེ་དང་། ནད་རྣམས་
D343.075.0284b03.01མེད་པ་དང་། འབྲས་སཱ་ལུ་དང་། བུ་རམ་ཤིང་དང་། བ་ལང་དང་། མ་ཧེ་དང་ལྡན་པར་འདུག་སྟེ། ཆོས་དང་ལྡན་པ་དང་། ཆོས་ཀྱི་རྒྱལ་པོ་ཆོས་བཞིན་དུ་རྒྱལ་པོ་བྱེད་དོ། །དེ་ནས་ཕྱིས་རེ་ཞིག་ན་བཙུན་མོ་དང་ལྷན་ཅིག་ཏུ་རྩེ་ཞིང་དགའ་ལ་དགའ་མགུར་སྤྱོད་དོ། །དེ་རྩེ་ཞིང་དགའ་ལ་དགའ་
D343.075.0284b04.01མགུར་སྤྱོད་པ་ལས་ཕྱིས་བཙུན་མོ་ལ་བུ་ཆགས་ནས་དེ་ཟླ་བ་བརྒྱད་དམ་དགུ་ལོན་པ་དང་བུ་བྱུང་སྟེ། ཁྱེའུ་གཟུགས་བཟང་ཞིང་བལྟ་ན་སྡུག་ལ་མཛེས་པ། མིག་བྱ་ཀུན་ལའི་མིག་འདྲ་བ་ཞིག་བཙས་སོ། །དེ་ནས་དེ་བཙས་པའི་བཙས་སྟོན་བྱས་ནས་ཁྱེའུ་འདིའི་མིང་ཇི་སྐད་
D343.075.0284b05.01གདགས་ཞེས་མིང་འདོགས་པར་བྱེད་དེ། ཉེ་དུ་རྣམས་ན་རེ་འདི་བཙས་མ་ཐག་ཏུ་མིག་བྱ་ཀུན་ལའི་མིག་འདྲ་བས་ན་དེའི་ཕྱིར་ཁྱེའུ་འདིའི་མིང་ཀུན་ལ་ཞེས་གདགས་སོ་ཞེས་ཟེར་རོ། །དེ་ནས་ཁྱེའུ་ཀུན་ལ་པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་
D343.075.0284b06.01འཁྲུ་བའི་མ་མ་གཉིས་དང་། རྩེ་བའི་མ་མ་གཉིས་ཏེ། མ་མ་བརྒྱད་ལ་གཏད་ནས། དེ་མ་མ་བརྒྱད་ཀྱིས་འོ་མ་དང་། ཞོ་དང་། མར་དང་། ཞུན་མར་དང་། མར་གྱི་ཉིང་ཁུ་དང་། གཞན་ཡང་ཡོ་བྱད་ཀྱི་ཁྱད་པར་བཟང་ངོ་ཅོག་གིས་བསྐྱེད་བསྲིངས་ཏེ་མཚོའི་ནང་གི་པད་མ་བཞིན་
D343.075.0284b07.01