完整藏文原文 · 德格版页 当前仅加载第 65 函德格 214a 版页；藏文 NFD、目录标记与异常页序保留在来源切片中，重复版页行以稳定序号区分。
རྟག་ཏུ་དགེ་བའི་བཤེས་གཉེན་དང་ཕྲད་ཅིང་དེའི་རྗེས་སུ་འགྲོ་བ་དང་། རྟག་ཏུ་སངས་རྒྱས་ཐམས་ཅད་མཐོང་བ་དང་མི་འབྲལ་ཞིང་བྱང་ཆུབ་སེམས་དཔའ་དང་ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང་། ཆོས་ཐོས་པ་དང་མི་འབྲལ་བ་དང་། དགེ་འདུན་ལ་མཆོད་པ་
D239.065.0214a01.01དང་བསྙེན་བཀུར་བྱེད་པ་དང་མི་འབྲལ་བ་དང་། དགེ་བའི་རྩ་བ་ཐམས་ཅད་ཚོལ་བ་ལ་བརྩོན་པས་སེམས་མི་ངོམས་པ་དང་། བྱང་ཆུབ་ཀྱི་སྤྱོད་པ་དང་སྨོན་ལམ་རྣམ་པ་སྣ་ཚོགས་ཀྱིས་སེམས་མི་ངོམས་པར་འགྱུར་ཏེ། འབྲས་བུ་གཞན་ཐོབ་པ་ཡང་ཇི་སྐད་བཤད་པ་བཞིན་
D239.065.0214a02.01ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ན་མ་འཚོའི་བར་དུ་ཆགས་སེམས་ཡོངས་སུ་སྤངས་ན་སེམས་ཅན་ཐམས་ཅད་ཀྱིས་བཀུར་ཞིང་བཙུན་པར་བྱེད་པ་དང་། སེམས་རྣམ་པར་དག་ཅིང་རྙོག་པ་དང་བྲལ་ཏེ། དེའི་དབང་གིས་དགེ་བའི་
D239.065.0214a03.01རྩ་བ་ཐམས་ཅད་ཡོངས་སུ་རྫོགས་པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར་འཁོར་བར་འཁོར་བའི་རྒྱ་མཚོར་འབྱིང་བ་ཡང་ཆགས་སེམས་ཀྱི་དབང་གིས་ལུས་དང་། ངག་དང་། ཡིད་སྡིག་པ་མི་དགེ་བའི་ལས་བདག་ཀྱང་བྱེད་ལ་གཞན་ཡང་བྱེད་དུ་འཛུད་ཅིང་མཐོང་བ་དང་
D239.065.0214a04.01ཐོས་པའི་རྗེས་སུ་ཡི་རང་བ་ལས་བྱུང་བ་ཉོན་མོངས་པའི་སྒྲིབ་པ་དང་། སེམས་ཅན་གྱི་སྒྲིབ་པ་དང་། ཆོས་ཀྱི་སྒྲིབ་པ་དང་། འདོད་སེམས་མེད་པ་ལ་སྒྲིབ་པས་བསྒྲིབས་པར་འགྱུར་རོ། །འདོད་སེམས་ཡོངས་སུ་སྤོང་བའི་འཁོར་ལོས་ལྷག་མ་མ་ལུས་པར་ཡོངས་སུ་བཅོམ་པས་རྣམ་པར་སྨིན་
D239.065.0214a05.01པའི་འབྲས་བུ་ཡོངས་སུ་མི་ལེན་ཏེ། ལུས་འདི་ཉིད་ལ་ཡང་ལྷ་དང་མི་ལ་སོགས་པ་ཀུན་དགའ་ཞིང་ཡིད་དུ་འོང་བ་དང་། དོགས་པ་མེད་པར་འགྱུར་བ་དང་། ལུས་དང་སེམས་རབ་ཏུ་བདེ་བ་དང་། སེམས་རྣམ་པར་དག་ཅིང་རྙོག་པ་དང་བྲལ་བར་འགྱུར་རོ། །འཆི་འཕོ་བའི་དུས་
D239.065.0214a06.01བྱེད་པ་ན་ཡང་ལུས་དང་སེམས་ལ་སྡུག་བསྔལ་གྱིས་མི་གདུང་བ་དང་། ཡིད་དུ་འོང་བའི་བུ་དང་། ཆུང་མ་དང་། འཁོར་གྱིས་ཡོངས་སུ་བསྐོར་བས་འཆི་འཕོ་བའི་དུས་བྱེད་པར་འགྱུར་གྱི། ཤིན་ཏུ་འཇིགས་པའི་གཤིན་རྗེའི་ཕོ་ཉ་མཐོང་བར་མི་འགྱུར་རོ། །ཡིད་དུ་འོང་བའི་དགེ་བའི་
D239.065.0214a07.01