完整藏文原文 · 德格版页 当前仅加载第 36 函德格 268a 版页；藏文 NFD、目录标记与异常页序保留在来源切片中，重复版页行以稳定序号区分。
འདི་ལྟ་སྟེ་དཔེར་ན། རྒྱ་མཚོ་ཆེན་པོ་ནི་ཀླུའི་རྒྱལ་པོ་ཆེན་པོ་གཅིག་གིས་སྤྲིན་ཆེན་པོ་ཡང་བཟོད་དོ། །ལེན་ཏོ། འཛིན་ཏོ། །བདག་གིར་བྱེད་དོ། །ཀླུའི་རྒྱལ་པོ་ཆེན་པོ་གཉིས་དང་། གསུམ་ནས་ཚད་མེད་པའི་བར་གྱི་སྤྲིན་ཆེན་པོ་
D44.036.0268a01.01དག་ཀྱང་སྐད་ཅིག་ཡུད་ཙམ་ཐང་ཅིག་གིས་བཟོད་དོ། །ལེན་ཏོ། །འཛིན་ཏོ། །བདག་གིར་བྱེད་དོ། །དེ་ཅིའི་ཕྱིར་ཞེ་ན། རྒྱ་མཚོ་ཆེན་པོ་དེ་ཚད་{མྱེད་,མེད་}པར་རྒྱ་ཆེ་ཞིང་ཡངས་པའི་ཕྱིར་རོ། །ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་
D44.036.0268a02.01དཔའི་ས་ཆོས་ཀྱི་སྤྲིན་འདི་ལ་གནས་པའི་བྱང་ཆུབ་སེམས་དཔའ་ཡང་དེ་བཞིན་གཤེགས་པ་གཅིག་ལས་ཀྱང་སྐད་ཅིག་ཡུད་ཙམ་ཐང་ཅིག་ཏུ་ཆོས་ཀྱི་སྣང་བ་ཆེན་པོ་དང་། ཆོས་ཀྱི་འོད་ཆེན་པོ་དང་། ཆོས་ཀྱི་སྤྲིན་ཆེན་པོ་ཚད་མེད་པ་རྣམས་
D44.036.0268a03.01བཟོད་དོ། །ཡང་དག་པར་ལེན་ཏོ། །ཡང་དག་པར་འཛིན་ཏོ། །བདག་གིར་བྱེད་དོ། །དེ་བཞིན་གཤེགས་པ་གཉིས་དང་། གསུམ་ནས་ཚད་མེད་པའི་བར་དག་ལས་ཀྱང་སྐད་ཅིག་ཡུད་ཙམ་ཐང་ཅིག་ཏུ་ཆོས་ཀྱི་སྣང་བ་ཆེན་པོ་དང་།
D44.036.0268a04.01ཆོས་ཀྱི་འོད་ཆེན་པོ་དང་། ཆོས་ཀྱི་སྤྲིན་ཆེན་པོ་ཚད་མེད་པ་བཟོད་དོ། །ཡང་དག་པར་འཛིན་ཏོ། །ཡང་དག་པར་ལེན་ཏོ། །བདག་གིར་བྱེད་དོ། །དེ་ཅིའི་ཕྱིར་ཞེ་ན། ས་འདི་ཡང་ཆོས་ཀྱི་སྤྲིན་ཅེས་བྱའོ། །བྱང་ཆུབ་སེམས་དཔའ་རྣམ་པར་གྲོལ་བའི་ཟླ་
D44.036.0268a05.01བས་སྨྲས་པ། ཀྱེ་རྒྱལ་བའི་སྲས་དེ་བཞིན་གཤེགས་པ་ཇི་སྙེད་ཅིག་ལས་བྱང་ཆུབ་སེམས་དཔའ་སྐད་ཅིག་ཡུད་ཙམ་ཐང་ཅིག་ཏུ་ཆོས་ཀྱི་སྣང་བ་ཆེན་པོ་དང་། ཆོས་ཀྱི་འོད་ཆེན་པོ་དང་། ཆོས་ཀྱི་སྤྲིན་ཆེན་པོ་བཟོད་པར་བྱེད་པ་དང་། ཡང་དག་པར་འཛིན་པ་
D44.036.0268a06.01དང་། ཡང་དག་པར་ལེན་ཅིང་བདག་གིར་བྱེད་པ་དེ་དག་བགྲང་བར་ནུས་སམ། བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་དེ་བཞིན་གཤེགས་པ་འདི་སྙེད་ཅིག་ལས་བྱང་ཆུབ་སེམས་དཔའ་སྐད་ཅིག་ཡུད་ཙམ་ཐང་ཅིག་ཏུ་ཆོས་
D44.036.0268a07.01