完整藏文原文 · 德格版页 当前仅加载第 4 函德格 76a 版页；藏文 NFD、目录标记与异常页序保留在来源切片中，重复版页行以稳定序号区分。
པ་འདི་ལྟ་བུ་ལ་བྱ་བ་བྱས་པ་གང་ཡིན་པའི་དགེ་བའི་རྩ་བ་འདིས་བདག་གིས་ཡོན་ཏན་འདི་ལྟ་བུ་དག་ཐོབ་པར་འགྱུར་བ་དང་། སྟོན་པ་འདི་ལྟ་བུ་མཉེས་པར་བྱེད་ཅིང་མི་མཉེས་པར་མི་བྱེད་པར་གྱུར་ཅིག་ཅེས་བཏབ་བོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་
D1.004.0076a01.01འཁོར་ལོས་སྒྱུར་བའི་རྒྱལ་པོ་ཀྲྀ་ཀཱི་ཞེས་བྱ་བ་འཁོར་དང་བཅས་པ་གང་ཡིན་པ་དེ་ནི་དེའི་ཚེ་དེའི་དུས་ན་རྒྱལ་པོ་གཟུགས་ཅན་སྙིང་པོ་འདི་ཉིད་ཡིན་ཏེ། འཁོར་དང་བཅས་པ་དེས་ཡང་དག་པར་རྫོགས་པའི་སངས་རྒྱས་རྩིབས་ཀྱི་ལྟེ་བའི་མཆོད་རྟེན་ལ་མཆོད་པ་བྱས་པ་གང་ཡིན་པ་དེའི་
D1.004.0076a02.01ལས་ཀྱི་རྣམ་པར་སྨིན་པས་འདིས་བསྐལ་པ་བྱེ་བ་བརྒྱ་སྟོང་ཕྲག་མང་པོར་ལྷ་དང་མི་རྣམས་ཀྱི་བདེ་བ་ཁྱད་པར་དུ་འཕགས་པ་ཉམས་སུ་མྱོང་བར་གྱུར་ཏོ། །འདི་ལྟ་བུའི་ཡོན་ཏན་དག་ཐོབ་པར་གྱུར་ཅིག་ཅེས་སྨོན་ལམ་བཏབ་པ་གང་ཡིན་པ་དེས་ནི་ངའི་སྤྱན་སྔར་འཁོར་དང་བཅས་པ་བདེན་པ་
D1.004.0076a03.01མཐོང་བར་བྱས་སོ། །སྟོན་པ་འདི་ལྟ་བུ་མཉེས་པར་བྱེད་ཅིང་མི་མཉེས་པར་མི་བྱེད་པར་གྱུར་ཅིག་ཅེས་སྨོན་ལམ་བཏབ་པ་གང་ཡིན་པས་ནི་ང་ཉིད་དང་ཡང་དག་པར་རྫོགས་པའི་སངས་རྒྱས་རྩིབས་ཀྱི་ལྟེ་བར་ལྷན་ཅིག་མཉམ་པར་མཉམ་སྟེ། སྟོབས་མཉམ་པ་དང་། ཤུགས་མཉམ་པ་དང་
D1.004.0076a04.01བརྩོན་འགྲུས་མཉམ་པ་དང་། ཐོབ་པ་མཉམ་པ་ཡིན་ཏེ། འདིས་སྟོན་པ་ང་མཉེས་པར་བྱས་ཀྱི། མི་མཉེས་པར་མ་བྱས་པ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་ནི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། གཅིག་ཏུ་དཀར་བ་རྣམས་ཀྱི་ནི་
D1.004.0076a05.01དཀར་བ་ཡིན། འདྲེན་མ་རྣམས་ཀྱི་ནི་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་དང་། འདྲེན་མ་རྣམས་ནི་སྤངས་ལ། ལས་གཅིག་ཏུ་དཀར་བ་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ། །དགེ་སློང་རྣམས་ཐེ་ཚོམ་
D1.004.0076a06.01སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ལྟེང་རྒྱས་འོད་སྲུང་གིས་ལས་ཅི་ཞིག་བགྱིས་ན། དེས་ན་ཆོ་འཕྲུལ་ལྔ་བརྒྱས་བཏུལ་བར་གྱུར་ལགས། ཆུ་ཀླུང་འོད་སྲུང་དང་། ག་ཡཱ་འོད་སྲུང་དག་ནི་ཚེགས་ཆུང་དུས་བཏུལ་
D1.004.0076a07.01