德格《甘珠尔》D119

དང་པོ་ལ་གནས་པར་གྱུར་ཏོ། །དེའི་ཚེ་བཅོམ་ལྡན་འདས་ཀྱིས་འཇམ་དཔལ་གཞོན་ནུ་དང་། བྱང་ཆུབ་སེམས་དཔའ་འོད་སྲུང་དང་། ཙུན་ད་ལ་ལུང་བསྟན་ནས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་བདག་གི་སེམས་ལ་ཤིན་ཏུ་ནན་ཏན་བྱོས་

ལ། བག་ཡོད་པར་གྱིས་ཤིག །ང་ནི་ད་ལྟར་རྒྱབ་ན་བས་ཐམས་ཅད་དུ་ན་བར་གྱུར་གྱིས། ང་ནི་ཇི་ལྟར་བུས་པ་ཆུང་ངུ་ན་བ་ལྟར་ཉལ་ལོ་སྙམ་དགོངས་སོ། །འཇམ་དཔལ་ལ་སོགས་པ་ཁྱེད་རྣམས་ཀྱིས་འཁོར་བཞི་པོ་ལ་ཐེག་པ་ཆེན་པོའི་ཆོས་རྒྱས་པར་སྟོན་ཅིག །

ད་ཆོས་འདི་དག་ཀྱང་ཁྱེད་ལ་ཡོངས་སུ་གདམས་སོ། །དེ་བཞིན་དུ་འོད་སྲུང་དང་། དགའ་བོ་ཁྱེད་ལ་ཡང་ཡང་དག་པའི་ཆོས་འདི་དག་གདམས་སོ། །དེའི་ཚེ་དེ་བཞིན་གཤེགས་པས་དེ་སྐད་ཅེས་གསུངས་ནས། སོ་སོའི་སྐྱེ་བོ་དག་གདུལ་བའི་ཕྱིར་ནད་པ་ལྟར་གློ་

གཡས་པ་ཕབ་སྟེ་གཟིམས་སོ། །དེ་ནས་བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ནི་ནད་ཀྱིས་སྡུག་བསྔལ་བའི་སྐྱོན་ཐམས་ཅད་དང་བྲལ་བ་ལགས་ཏེ། བསྙེངས་པ་མི་མངའ་ན། བཅོམ་

ལྡན་འདས་སེམས་ཅན་ཐམས་ཅད་ནི་གདུག་པའི་ཟུག་རྔུ་རྣམ་པ་བཞིས་ནད་ཀྱི་རྒྱུར་འགྱུར་བ་ནི་འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་མུག་དང་། ང་རྒྱལ་ལོ། །གལ་ཏེ་ནད་ཀྱི་རྒྱུ་མཆིས་ན། ནད་མང་པོ་སྐྱེ་བར་འགྱུར་བ་ནི་འདི་ལྟ་སྟེ། འདོད་པས་ཚ་བ་དང་། གློ་ན་བ་དང་།

དབུགས་རྒོད་པ་དང་། སྐྱུག་བྲོ་བ་དང་། ལུས་ཀུན་སྦྲིད་པ་དང་། སྙིང་འཁྲུག་ཅིང་མི་དྲན་པ་དང་། ཚད་པར་འཁྲུག་པ་དང་། ཟ་གུ་དང་། མིག་དང་། རྣ་བ་ཚ་ཞིང་ན་བ་དང་། རྒྱབ་འཛིངས་པ་དང་། ལྟོ་དབོ་བ་དང་། སྨྱོ་བ་དང་། རིད་ཅིང་སྐམ་པ་དང་། {ཡི་དགས་,ཡི་དྭགས་}

ཀྱིས་བརླམས་པ་ལ་སོགས་པ་སྟེ། ལུས་དང་སེམས་ཀྱི་ནད་རྣམ་པ་སྣ་ཚོགས་ནི་བཅོམ་ལྡན་འདས་ལ་མི་མངའ་ན་དེང་ཅིའི་སླད་དུ་དེ་བཞིན་གཤེགས་པ་སྐུ་ཚེ་ལ་གཟིགས་ཏེ། ང་རྒྱབ་ན་བར་འགྱུར་གྱིས་འཇམ་དཔལ་ཁྱོད་འཁོར་མང་པོ་ལ་ཆོས་སྟོན་ཅིག་ཅེས་བཀའ་སྩལ། རྒྱུ་དང་རྐྱེན་