完整藏文原文 · 德格版页 当前仅加载第 10 函德格 128a 版页；藏文 NFD、目录标记与异常页序保留在来源切片中，重复版页行以稳定序号区分。
མངོན་པར་འགྲུབ་པར་འགྱུར་རོ། །དགའ་བོ་དཔེར་ན་ཞོ་ལ་བརྟེན་ནས་སྲིན་བུ་སྐྱེའོ། །དགའ་བོ་དེ་ལ་སྲིན་བུ་ནི་ཞོ་ཡིན་པར་མི་བལྟ། སྲིན་བུ་ཞོ་ལས་གཞན་པར་ཡང་བལྟ་བར་མི་བྱའི། དགའ་བོ་འོན་ཀྱང་ཞོ་དེ་ཉིད་ལ་བརྟེན་ནས་རྒྱུ་དང་རྐྱེན་ཚོགས་པའི་དབང་གིས་སྲིན་བུ་ཁ་དོག་མཐུན་པའི་
D6.010.0128a01.01མཐུ་ཅན་སྐྱེ་ཞིང་ཁ་དོག་གི་མཐུ་དེས་ན་སྲིན་བུ་དེ་དེའི་ངོ་བོ་ཉིད་དེ་དཀར་པོར་འགྱུར་རོ། །དགའ་བོ་དེ་བཞིན་དུ་ནུར་ནུར་པོའི་ལུས་ཀྱང་ཕ་མའི་མི་གཙང་བ་ཡིན་པར་མི་བལྟ། ནུར་ནུར་པོའི་ལུས་ཕ་མའི་མི་གཙང་བ་ལས་གཞན་པ་ཡང་མ་ཡིན་གྱི། དགའ་བོ་འོན་ཀྱང་ཕ་མའི་མི་གཙང་བ་དེ་ཉིད་ལ་བརྟེན་
D6.010.0128a02.01ནས་རྒྱུ་དང་རྐྱེན་ཚོགས་པའི་དབང་གིས་ཕ་མ་དང་འདྲ་བའི་དབང་པོའི་འབྱུང་བ་ཆེན་པོ་དག་མངོན་པར་འགྲུབ་བོ། །དགའ་བོ་དེ་ལ་ཕ་མའི་རྒྱུ་ལས་བྱུང་བ་མི་གཙང་བ་ནུར་ནུར་པོའི་ལུས་ལ་སའི་ཁམས་ནི་སྲ་བ་ཉིད་དུ། ཆུའི་ཁམས་ནི་གཤེར་བ་ཉིད་དུ། མེའི་ཁམས་ནི་དྲོ་བ་ཉིད་དུ། རླུང་གི་ཁམས་ནི་
D6.010.0128a03.01ཡང་ཞིང་གཡོ་བ་ཉིད་དུ་ཉེ་བར་གནས་པ་ཡིན་ནོ། །དགའ་བོ་གལ་ཏེ་ཕ་མ་ལས་བྱུང་བ་མི་གཙང་བ་ནུར་ནུར་པོའི་ལུས་དེ་ལ་སའི་ཁམས་ཡོད་ཀྱི་ཆུའི་ཁམས་མེད་ན་སྐམ་པ་དང་འགྱེས་པར་འགྱུར་ཏེ། དཔེར་ན་ཕྱེ་སྤར་གང་ངམ་ཐལ་བ་སྤར་གང་ལྟ་བུའོ། །དགའ་བོ་གལ་ཏེ་ཕ་མའི་རྒྱུ་ལས་
D6.010.0128a04.01བྱུང་བ་མི་གཙང་བ་ནུར་ནུར་པོའི་ལུས་དེ་ལ་ཆུའི་ཁམས་ཡོད་ཀྱི་སའི་ཁམས་མེད་ན་གཤེར་བས་འབོ་བར་འགྱུར་ཏེ། དཔེར་ན་འབྲུ་མར་རམ་ཆུ་ལྟ་བུའོ། །དགའ་བོ་འོན་ཀྱང་ཆུའི་ཁམས་ཀྱིས་སའི་ཁམས་བསྡུས་པས་མི་འགྱེས་ལ་སའི་ཁམས་ཀྱིས་ཆུའི་ཁམས་བཟུང་བས་མི་འབོའོ། །
D6.010.0128a05.01དགའ་བོ་གལ་ཏེ་ཕ་མའི་རྒྱུ་ལས་བྱུང་བ་མི་གཙང་བ་ནུར་ནུར་པོའི་ལུས་དེ་ལ་སའི་ཁམས་དང་། ཆུའི་ཁམས་ཡོད་ཀྱི་མེའི་ཁམས་མེད་ན་གཤེར་བ་དང་། འཇིག་པ་དང་། འདྲུལ་བར་འགྱུར་ཏེ། དགའ་བོ་དཔེར་ན་སོ་ག་རྣམས་ཀྱི་ཟླ་བ་ཕྱི་མ་ལ་ཤའི་དུམ་བུ་མེའི་ཁམས་མེད་པས་གཤེར་བ་
D6.010.0128a06.01དང་། འཇིག་པ་དང་། འདྲུལ་བར་འགྱུར་བ་དེ་བཞིན་དུ་དགའ་བོ་གལ་ཏེ་ཕ་མའི་རྒྱུ་ལས་བྱུང་བ་མི་གཙང་བ་ནུར་ནུར་པོའི་ལུས་དེ་ལ་སའི་ཁམས་དང་། ཆུའི་ཁམས་ཡོད་ཀྱི་མེའི་ཁམས་མེད་ན་གཤེར་བ་དང་། འཇིག་པ་དང་། འདྲུལ་བར་འགྱུར་རོ། །དགའ་བོ་གལ་ཏེ་ཕ་མའི་རྒྱུ་ལས་བྱུང་བ་
D6.010.0128a07.01