完整藏文原文 · 德格版页 当前仅加载第 11 函德格 96b 版页；藏文 NFD、目录标记与异常页序保留在来源切片中，重复版页行以稳定序号区分。
ཁྱོད་ཀྱིས་རྒྱུད་ལྟག་མ་ལ་མ་རེག་ཅེས་དྲིས་པ་དང་། དེས་ཀྱེ་དེ་སྟེ་འདི་ལ་རེག་ན་ནི་ཉེས་པའི་དམིགས་སུ་འགྱུར་རོ་ཞེས་སྨྲས་པ་དང་། དེ་དག་གིས་བྲམ་ཟེའི་བུས་རེག་པ་ལྟ་ལ་ཉེས་པའི་དམིགས་སུ་འགྱུར་བ་ཅི་ཡོད་ཅེས་སྨྲས་ཏེ། དེ་དག་གིས་རེག་པ་དང་། དེ་དག་ཐམས་ཅད་མཆོང་རྒལ་
D6.011.0096b01.01ཞིང་གར་བྱེད་དོ། །དེ་དག་གར་བྱས་པས་འཕྱིས་པར་གྱུར་ཏེ་དེ་དག་ནུབ་ཀར་མཁན་པོའི་དྲུང་དུ་འོངས་པ་དང་། དེས་ཁྱེའུ་དག་ཅིའི་ཕྱིར་རིང་ཞིག་ལོན་ཏེ་འོངས་ཞེས་དྲིས་པ་དང་། དེ་དག་གིས་ཇི་ལྟར་གྱུར་པ་ཞིབ་ཏུ་སྨྲས་ནས་དེས་མྱུར་འགྲོ་དེ་ལ་ཁྱོད་པི་བང་ལེན་ཅིང་གླུ་ལེན་ཤེས་སམ་
D6.011.0096b02.01ཞེས་དྲིས་པ་དང་། འཚལ་ཏོ། །བྲམ་ཟེའི་བུ་དེ་ལྟར་ན་པི་བང་མཉན་གྱིས་ལོང་ཤིག །དེས་དེ་ལེན་ཅིང་གླུ་བླངས་ཏེ་དེས་རྒྱུད་ལྟག་མ་ལ་མ་རེག་པ་དང་། དེས་བྲམ་ཟེའི་བུ་ཅིའི་ཕྱིར་ཁྱོད་ཀྱིས་རྒྱུད་ལྟག་མ་ལ་མ་རེག་ཅེས་དྲིས་པ་དང་། དེས་སྨྲས་པ། མཁན་པོ་དེ་སྟེ་འདི་ལ་རེག་ན་ནི་ཉེས་
D6.011.0096b03.01པའི་དམིགས་སུ་འགྱུར་རོ། །དེས་བྲམ་ཟེའི་བུ་འདི་ལ་རེག་ན་ཉེས་པའི་དམིགས་སུ་འགྱུར་བ་ཅི་ཡོད། རེག་ཤིག་ཅེས་སྨྲས་པ་དང་། དེས་རེག་པ་དང་། བྲམ་ཟེ་ཆུང་མ་དང་བཅས་ཏེ་མཆོང་རྒལ་ཞིང་གར་བྱེད་དོ། །ཁྱིམ་དེ་ཐམས་ཅད་ཀྱང་མཆོངས་པས་ཞིག་པར་གྱུར་ཏོ། །དེ་ཞིག་
D6.011.0096b04.01པས་རྫ་མ་དང་སྣོད་ཐམས་ཅད་ཆག་པ་དང་། བྲམ་ཟེ་དེ་ཁྲོས་ནས་དེས་བྲམ་ཟེའི་བུ་དེའི་མགྲིན་པ་ནས་བཟུང་སྟེ་བསྐྲད་དོ། །བསྐྲད་པ་དང་དེ་པི་བང་བླངས་ཏེ་ལེན་པས་འཚོ་བ་སྦྱོར་བ་ལ་ཞུགས་སོ། །ཕྱི་ཞིག་ན་ཚོང་པ་ལྔ་བརྒྱ་ཙམ་ཞིག་རྒྱ་མཚོ་ཆེན་པོར་འདོང་བའི་ཟོང་རྣམས་སྦྱར་ཏེ་རྒྱ་མཚོ་ཆེན་
D6.011.0096b05.01པོར་ཆས་པ་དང་། དེ་དག་གིས་སྨྲས་པ། ཀྱེ་བདག་ཅག་རྒྱ་མཚོ་ཆེན་པོར་ཞུགས་ན་ཡིད་བསླང་བར་བྱས་རོལ་མོ་མཁན་ཞིག་བཀྲིའོ། །དེ་དག་ལ་གཅིག་གིས་གང་བཀྲི་ཞེས་སྨྲས་པ་དང་། གཞན་ཞིག་གིས་བྲམ་ཟེའི་བུ་མྱུར་འགྲོ་ཞེས་བྱ་བ་བཀྲིའོ་ཞེས་སྨྲས་སོ། །ཁ་ཅིག་གིས་
D6.011.0096b06.01ལེགས་གྱིས་དེ་བཞིན་བྱའོ་ཞེས་སྨྲས་ནས། དེ་དག་གིས་བྲམ་ཟེའི་བུ་མྱུར་འགྲོ་ཁྲིད་དེ་རྒྱ་མཚོ་ཆེན་པོར་ཞུགས་སོ། །དེ་ནས་རྒྱ་མཚོ་ཆེན་པོའི་ནང་དུ་དོང་བ་དང་། མྱུར་འགྲོ་རོལ་མོ་པི་བང་མཉན་གྱིས་ལོང་ཤིག་ཅེས་སྨྲས་པ་དང་། དེས་པི་བང་ལེན་ཅིང་གླུ་ལེན་པ་ལ་ཞུགས་ན་དེས་པི་
D6.011.0096b07.01